પ્રજ્ઞાચક્ષુ એથ્લેટ અને ચેસ સ્પર્ધામાં ૩૫૦ ખેલાડીઓએ ભાગ લીધો

લાયન્સ ક્લબ બરોડા અને ધ સોસાયટી ફોર ધ બ્લાઈન્ડના સંયુક્ત ઉપક્રમે સુભાનપુરામાં ધી બરોડા એસોસિએશન ફોર ધી બ્લાઈન્ડ ખાતે રાજ્ય સ્તરની પ્રજ્ઞાચક્ષુ એથ્લેટિક અને ચેસ સ્પર્ધાનું આયોજન કરાયું હતું.

ભાલા ફેંક, લોંગ જમ્પ, થ્રો ડિસ્ક જેવી એથ્લેટિક ઇવન્ટ્સ તેમજ ચેસ સ્પર્ધામાં રાજ્યમાંથી ૩૫૦ પ્રજ્ઞાચક્ષુ ખેલાડીઓએ ઉત્સાહપૂર્વક ભાગ લીધો હતો. સ્ટેટ, નેશનલ અને ઇન્ટરનેશનલ લેવલના પ્રતિભાશાળી બ્લાઈન્ડ ખેલાડીઓ હાજર રહ્યા હતા. શહેરની કુમારી મિત્તલ તાજેતરમાં ભારતીય મહિલા બ્લાઈન્ડ ક્રિકેટ ટીમમાં પસંદ થઈ હોઈ તેનું તથા રાષ્ટ્રીય અને આંતરરાષ્ટ્રીય સ્તરના ખેલાડીઓનું વિશેષ સન્માન સાંસદ અને જિલ્લા ગવર્નર દ્વારા કરાયું હતું. સ્પર્ધકોને ટ્રોફી તથા અનાજ કિટનું વિતરણ કરાયું હતું. આ ઉપરાંત તા. ૨૩ થી ૩૦ નવેમ્બર દરમિયાન આયોજિત મિશન એક લાખ ડાયાબિટીસ ચેકઅપ અભિયાનની પૂર્ણાહુતિ થઈ હતી. હવે આગામી જાન્યુઆરી ૨૦૨૬માં રાજ્ય સ્તરની મ્યુઝિકલ સ્પર્ધાનું આયોજન કરાશે.