વડોદરાઃ વડોદરા સહિત સમગ્ર ગુજરાતમાં શિક્ષક બનવા માટે જરુરી ટેટ( ટીચર્સ એલિજિબિલિટી ટેસ્ટ) પરીક્ષા તા.૨૧ ડિસેમ્બર, રવિવારે લેવામાં આવશે.જેને લઈને વડોદરામાં ડીઈઓ કચેરીના તંત્ર દ્વારા તૈયારીઓ પૂર્ણ કરાઈ છે.
વડોદરામાં ૧૪૭ પરીક્ષા કેન્દ્રો પર ૩૦૪૭૫ ઉમેદવારો આ પરીક્ષા આપશે.પરીક્ષાને ધ્યાનમાં રાખીને દરેક કેન્દ્ર પર પોલીસ બંદોબસ્ત પણ ગોઠવવામાં આવશે.બપોરે ૧૨ થી બે દરમિયાન લેવનારી પરીક્ષાને ધ્યાનમાં રાખીને તમામ પરીક્ષાર્થીઓને નિયત સમયના અડધો કલાક પહેલા પરીક્ષા કેન્દ્ર પર હાજર થવાનું રહેશે.
ઈન્ચાર્જ ડીઈઓ મહેશ પાંડેએ કહ્યું હતું કે, મોટાભાગના ઉમેદવારો વડોદરા અને મધ્ય ગુજરાતના દાહોદ, પંચમહાલ, આણંદ, છોટાઉદેપુર જેવા જિલ્લાઓમાંથી પરીક્ષા આપવા માટે આવશે.ઉમેદવાર પરીક્ષા કેન્દ્રમાં કોઈ પણ પ્રકારનું ઈલેક્ટ્રોનિક ઉપકરણ સાથે લઈ જઈ શકશે નહીં. પરીક્ષાના પેપરો અને બીજુ સાહિત્ય મૂકવા માટે સ્ટ્રોંગરુમ કાર્યરત કરવામાં આવ્યો છે.પરીક્ષા માટેના પેપરો પોલીસ બંદોબસ્ત સાથે કેન્દ્રો પર પહોંચાડાશે.પરીક્ષા કેન્દ્રો પર પણ સરકારી અધિકારીઓ નિરિક્ષક તરીકે ફરજ બજાવશે.
