ખંભાતમાં ભારે પવન સાથે 3 અને પેટલાદમાં 2 ઈંચ વરસાદ ખાબક્યો

- આણંદ જિલ્લામાં 24 કલાકમાં સરેરાશ 1 ઈંચ

- શહેરમાં 3 કલાક વીજળી ડૂલ, ઝાડ પણ પડી ગયા, સોજીત્રા, તારાપુરમાં 1 ઈંચ, આંકલાવ અને બોરસદમાં નહિવત્ વરસાદ

આણંદ શહેર અને જિલ્લામાં શનિવારે લગભગ સાંજે ૮.૩૦ વાગ્યા પછી વાવાઝોડા અને વીજળીના કડાકા- ભડાકા સાથે વરસાદ તૂટી પડયો હતો. રાતે ૯ કલાકે વરસાદનું જોર વધતા આણંદ શહેરના મોટાભાગના વિસ્તારો, કાંઠાગાળાના વિસ્તારોમાં વીજળી ડૂલ થઈ ગઈ હતી. લગભગ ૩ કલાક બાદ વીજ પૂરવઠો ફરી શરૂ થયો હતો. હવામાન વિભાગના આંકડા મુજબ છેલ્લા ૨૪ કલાકમાં આણંદ જિલ્લાના ખંભાત તાલુકામાં ૩ ઈંચ, પેટલાદમાં બે ઈંચ જ્યારે સોજીત્રા, તારાપુર અને આણંદ તાલુકામાં એક-એક ઇંચ વરસાદ પડયો હતો. આંકલાવ અને બોરસદ તાલુકાઓમાં નહિવત્ વરસાદ પડયો હતો.

આણંદ કૃષિ હવામાન વિભાગના જણાવ્યા અનુસાર ચરોતરમાં અંશતઃ વાદળછાયા વાતાવરણ વચ્ચે ભેજનું પ્રમાણ વધુ રહેશે. મહત્તમ તાપમાન ૪૦ ડિગ્રી આસપાસ રહેવાની સાથે આગામી સપ્તાહમાં ચોમાસું બેસવાની સંભાવના છે. શરૂઆતના દિવસોમાં સામાન્ય વરસાદ પડે તેવી શક્યતાઓ રહેલી છે. 

ખેડા જિલ્લાના નડિયાદ તાલુકામાં અઢી ઈંચ વરસાદ પડયો

નડિયાદ ઃ ખેડા જિલ્લામાં પણ વીજળીના કડાકા સાથે વરસાદ ખાબક્યો હતો. જિલ્લામાં ગઈકાલ સાંજે ૬થી સવારે ૬ સુધીના આંકડા મુજબ ખેડામાં ૬ મિ.મી., માતર ૨૭ મિ.મી, નડિયાદ ૬૦ મિ.મી, મહુધા ૬ મિ.મી, ઠાસરા ૧૧ મિ.મી, ગલતેશ્વર ૧૨ મિ.મી, વસો ૫૫ મિ.મી, કપડવંજ ૩ મિ.મી, કઠલાલ ૬ મિ.મી, મહેમદાવાદ ૨૯ મિ.મી વરસાદ નોંધાયો હતો. ખેડા જિલ્લામાં સરેરાશ ૨૧.૫ મિ.મી. વરસાદ વરસી ગયો હતો. નડિયાદ શહેરના પશ્ચિમ વિસ્તારમાં રેલવે સ્ટેશન પાછળ એનઇએસ સ્કૂલ આગળનો ખોદેલ રોડ બેસી જતાં વાહન ચાલકો કફોડી હાલતમાં મુકાયા છે.