દોઢ કરોડની સામે 4.39 કરોડ ચૂકવી દેવા છતાં 80 લાખની માગણી કરતા ત્રણ આરોપીઓ જેલ ભેગા

Vadodara : વડોદરાના તરસાલીમાં મનહર પાર્ક સોસાયટીમાં રહેતા 61 વર્ષના શશીલીયા એન્ડ્રુ પિન્ટો રીક્રુટમેન્ટ એન્ડ મેન પાવર સપ્લાયનું કામ કરે છે. તેમણે મકરપુરા પોલીસ સ્ટેશનમાં ફરિયાદ નોંધાવી જણાવ્યું હતું કે, કોરોના મહામારીના કારણે મને અમુક કંપનીઓ તરફથી સમયસર નાણાં નહીં મળતા અમારી કંપની આર્થિક સંકડામણમાં આવી ગઇ હતી. મેં સી.એ. કેયૂર પટેલને બેન્કમાંથી લોન માટે વાત કરી હતી. પરંતુ, બેન્કમાંથી લોન નહીં મળતા મેં તેઓને નાણાં આપી શકે તેવી વ્યક્તિનો સંપર્ક કરવા કહ્યું હતું. તેમણે મારો સંપર્ક સુનિલ નલીનભાઇ પરીખ (રહે. તિરૂપતિ એપાર્ટમેન્ટ, જનતા રોડ, ઘાટલોડિયા, અમદાવાદ) સાથે કરાવ્યો હતો.. મે-2021થી જૂન-2024 સુધી મેં તેઓની પાસેથી કુલ 1.57 કરોડ લીધા હતા. તેની સામે મેં 4.39 કરોડ ચૂકવી દીધા હતા.

તેમ છતાં તેઓ મારી પાસે વધુ 80 લાખની માગણી કરી તેઓ ફોન પર ધમકી આપતા હતા. પોલીસે આ ગુનામાં (1) સુનિલ નલીનભાઈ પરીખ (રહે. આર્યમાન બંગલોઝ, થલતેજ, શીલજ રોડ, અમદાવાદ) (2) રજનીકાંત અંબાલાલ રાવત (રહે. રથી એપાર્ટમેન્ટ, ધરમનગર, સાબરમતી, અમદાવાદ) તથા (3) જયેશ બાબુભાઈ પરમાર (રહે. એ બ્લોક 201, સેક્ટર 5, જુના વાડજ રામાપીરના ટેકરા પાસે, અમદાવાદ) ની ધરપકડ કરી હતી. પોલીસે આરોપીઓના બે દિવસના રિમાન્ડ લીધા હતા. રિમાન્ડ પુરા થતા આરોપીઓને કોર્ટમાં રજૂ કરવામાં આવતા જેલમાં મોકલી આપવામાં આવ્યા છે.