વડોદરાઃ વડોદરામાં વર્ષ દરમિયાન ડ્રગ્સના ૨૩ જેટલા કેસો કરી પોલીસે બે કરોડથી વધુ રકમની મતા કબજે કરી છે.વડોદરામાં આવતા ડ્રગ્સના તાર ગુજરાતને અડીને આવેલા રાજ્યો સુધી પહોંચે છે.
વડોદરા પોલીસ દ્વારા મિશન ક્લિન હાથ ધરવામાં આવ્યું છે.ેજ અંતર્ગત શહેર પોલીસ દ્વારા એક વર્ષ દરમિયાન જુદાજુદા સ્થળોએ દરોડા પાડીને એમડી ડ્રગ્સ,ચરસ અને ગાંજાના ૪૨ આરોપી પકડવામાં આવ્યા છે,જ્યારે રૃ.બે કરોડનો મુદ્દામાલ કબજે કરવામાં આવ્યો છે.ડ્રગ્સ માફિયાઓની નજર શૈક્ષણિક સંકુલો અને બ્રિજોની આસપાસ વધુ રહેતી હોય છે.
દરમિયાનમાં આજે પોલીસેડ્રગ્સના વધુ બે કેસ કર્યા હતા.જેમાં મચ્છીપીઠ વિસ્તારમાં મોદી હાઉસ નામના મકાનના ત્રીજા માળેથી પોલીસે મોહંમદ રફીક ઈકબાલભાઈ મલેકને રૃ.૧.૭૫ લાખના ૫૮ ગ્રામ એમડી ડ્રગ્સ સાથે ઝડપી પાડયો હતો.પોલીસે રોકડા રૃ.૧૪૭૦૦, અને મોબાઇલ પણ કબજે કર્યા હતા.
આવી જ રીતે મકરપુરા પોલીસે ગાંજાના જથ્થા સાથે કાર પકડી કુલ રૃ.૧૦લાખ ઉપરાંતની મતા સાથે પ્રિતુલ નામના કેરિયરને પકડયો હતો.તો બીજીતરફ પોલીસ કમિશનર દ્વારા ડ્રગ્સના કેસો રોકવા માટે મિશન ક્લિન અમલમાં મુકવામાં આવ્યું છે.જે અંતર્ગત ડ્રગ્સના કેસોની સાથેસાથે સ્કૂલ, કોલેજો સહિતના સ્થળોએ જાગૃતિ લાવવામાં આવી રહી છે.
વડોદરામાં પકડાયેલા ડ્રગ્સના મોટાભાગના કેસોનું કનેક્શન સુરત, યુપી, પંજાબ,મહારાષ્ટ્ર,રાજસ્થાન અને ઓરિસ્સા સાથે જોડાય છે.પરંતુ વડોદરામાં કેરિયર પકડાયા બાદ આગળનું પગેરું શોધવામાં પોલીસને ધારી સફળતા મળતી નથી.
ડ્રગ્સની હેરાફેરી માટે ટ્રેન અને બસોનો ઉપયોગ
ડ્રગ્સની હેરાફેરી માટે પોલીસની નજરથી બચવા માટે ટ્રેન અને બસનો ઉપયોગ કરવામાં આવતો હોવાના પણ બનાવો બન્યા છે.અગાઉ યુપીથી ટ્રેનમાં મોટી સંખ્યામાં ઇંજેક્શનો લાવવામાં આવતા હોવાના કેસો પણ કરવામાં આવ્યા હતા.
તાંદલજાના એક જ પરિવારના ત્રણ સભ્યોની સંડોવણી
તાંદલજા વિસ્તારમાં ડ્રગ્સના કેસોમાં એક જ પરિવારના ત્રણ સભ્યો સામે થોડા સમય પહેલાં પોલીસે ડ્રગ્સના કેસ કર્યા હતા.જેમાં સૂત્રધાર અબ્દુલ પટેલ,તેનો પુત્ર આદીબ અને પત્ની ઝરીના નો સમાવેશ થાય છે.
મોકસી અને સિંધરોટમાં ડ્રગ્સની ફેકટરી પકડાઇ હતી,1500 કરોડનું ડ્રગ્સ મળ્યું હતું
છેલ્લા એક દાયકા દરમિયાન વડોદરા જિલ્લાના સાવલી તાલુકામાં મોકસી ગામે તેમજ વડોદરા નજીક સિંધરોટ ગામેથી ડ્રગ્સની ફેકટરી પકડાવાના બનાવો બન્યા હતા.
પ્રાપ્ત વિગતો મુજબ,વડોદરાની આસપાસમાં ડ્રગ્સ તૈયાર કરવામાં આવતું હોવાની અને તેને સ્ટોરેજ કરવામાં આવતું હોવાની વિગતોને પગલે એટીએસ તેમજ વડોદરા ગ્રામ્ય એસઓજી દ્વારા જુદાજુદા સમયે કેસ કરવામાં આવ્યા હતા અને ૧૫૦૦ કરોડ જેટલી કિંમતનું એમડી ડ્રગ્સ અને તેનું મટિરિયલ કબજે લેવામાં આવ્યું હતું.
પોલીસની પ્રાથમિક તપાસમાં વડોદરાની ફેક્ટરીમાં બનેલું ડ્રગ્સ મુંબઇ તેમજ દુબઇ સપ્લાય કરવામાં આવ્યું હોવાની પણ વિગતો બહાર આવી હતી.
