સાંસદ ખેલ મહોત્સવ ફિનાલેમાં જ્યાં આમ પ્રજાજનો નહોતા ત્યાંથી ચોરી : તપાસ માટે ગાંધીનગરથી આદેશ થયો ને પોલીસ ધંધે લાગી
જૂનાગઢ, : જૂનાગઢમાં ગત તા. 25ના પોરબંદર સાંસદ ખેલ મહોત્સવ ફિનાલે કાર્યક્રમ દરમ્યાન ધોરાજી-ઉપલેટાના ધારાસભ્યના એકી સાથે બે મોબાઈલ ગુમ થઈ જતા મામલો છેક ગાંધીનગર સુધી પહોંચ્યો હતો. ત્યાંથી થયેલા આદેશ મુજબ પોલીસ દ્વારા તપાસનો ધમધમાટ શરૂ કરવામાં આવ્યો હતો. તપાસનો રેલો ભાજપના જ અમુક કાર્યકરો સુધી પહોંચતાં પોલીસ અને ભાજપના આગેવાનોમાં ચર્ચાનો મુદ્દો બન્યો છે. જો ધ્યાન ન રાખે તો ચોર ભાજપના ધારાસભ્યને પણ છોડતા નથી તેનો આ દાખલો છે.
જૂનાગઢના ગાંધીગ્રામમાં આવેલા સ્પોર્ટસ સંકુલ ખાતે કેન્દ્રીય મંત્રી મનસુખ માંડવીયાની હાજરીમાં જૂનાગઢ, રાજકોટ, પોરબંદર જિલ્લાના ધારાસભ્યો, સાંસદ, તંત્રના અધિકારીઓ, ભાજપના આગેવાનો, કાર્યકરો સહિતનાઓની ઉપસ્થિતિમાં સાંસદ ખેલ મહોત્સવ ફિનાલે કાર્યક્રમ યોજાયો હતો. આ કાર્યક્રમ દરમ્યાન ધોરાજી-ઉપલેટાના ભાજપના ધારાસભ્ય મહેન્દ્ર પાડલીયાના એકીસાથે બે મોબાઈલ ચોરાઈ ગયા હતા. ધારાસભ્યના મોબાઈલ ચોરાઈ જતા કાર્યક્રમમાં ચર્ચાનો મુદ્દો બન્યો હતો. આ મામલો છેક ગાંધીનગર સુધી પહોંચતા ત્યાંથી તપાસના આદેશ થતા પોલીસના ઉચ્ચ અધિકારીઓ ધારાસભ્યના ગુમ થયેલા મોબાઈલ શોધવા ધંધે લાગ્યા હતા. મોબાઈલના અંતિમ લોકેશન સહિતની હિસ્ટ્રી તપાસતા ભાજપના મહિલા અગ્રણી શંકાના દાયરામાં આવ્યા હતા. તેમના પર તથા ભાજપના અન્ય એક કાર્યકર પર પોલીસને શક છે. હાલ તેના પર વોચ રાખવામાં આવતી હોવાનું પણ જાણવા મળ્યું છે. પોલીસ દ્વારા તેમની ગુપ્ત રાહે તપાસ કરવામાં આવી પરંતુ હજુ સુધી પોલીસને કોઈ નક્કર કડી હાથ લાગતી નથી. આ અંગે હાલ પોલીસમાં કોઈ ફરિયાદ દાખલ થઈ નથી પરંતુ ધારાસભ્ય હોવાના નાતે પોલીસ દ્વારા તેમના ચોરી થયેલા બંને મોબાઈલ શોધવા ધમધમાટ ચાલી રહ્યો છે. જ્યારે મોબાઈલ ગુમ થયાની ઘટના બની ત્યારે કોઈ સામાન્ય વ્યક્તિ ત્યાં હાજર ન હતો, માત્ર ભાજપના કાર્યકરો અને હોદ્દેદારો તથા તંત્રના અધિકારીઓ જ હાજર હતા.
