વડોદરા કોર્પોરેશનની ડોર ટુ ડોર કચરાની ગાડી કબજે કરી ડ્રાઇવરને ફટકારનાર ભાવનગરના બે હુમલાખોર પકડાયા

Vadodara Crime : વડોદરાના ગોરવા વિસ્તારમાં બે દિવસ પહેલા અકસ્માતના બનાવ બાદ કોર્પોરેશનના કચરાના વાહનને બાજુ પર મુકાવી દઈ ડ્રાઇવરને માર મારવાના ગુનામાં પોલીસે કારચાલક અને તેના સાગરીતની ધરપકડ કરી છે.

ગોરવા રોડ ઉપર કોર્પોરેશનનું ડોર ટુ ડોર કચરાનું વાહન સમતા ગાર્ડન તરફ કચરો કલેક્ટ કરવા માટે જઈ રહ્યું હતું તે દરમિયાન બરોડા સ્કાય ચાર રસ્તા પાસે ભાવનગરના કારચાલકે પાછળથી ટેમ્પા પાસે અકસ્માત કર્યો હતો. 

ત્યારબાદ કારચાલક અને તેનો સાગરિત આઈટીઆઈ ચાર રસ્તા પાસે ઉભા રહ્યા હતા અને ડોર ટુ ડોર કચરાનું વાહન આવતા જ તેને એક બાજુ પર મુકાવી દઈ ડ્રાઇવરને માર માર્યો હતો. ડ્રાઇવર સુપરવાઇઝરને બોલાવતા વાહન દૂર મુકાવી ફરીથી ડ્રાઇવરને માર માર્યો હતો. હુમલાખોરે મારું નામ રાજુ છે મારું કંઈ બગાડવાનું નથી થાય તે કરી લેજે તેમ કહી ધમકીઓ પણ આપી હતી. જેથી ગોરવા પોલીસે ગુનો દાખલ કર્યો હતો. 

આ બનાવમાં નશામાં ધૂત થઈ કાર ચલાવનાર ભાવનગરના કરદેજ ગામે રહેતા રાજુ સાદુળ ભાઈ કુવાડીયા તેમજ તેના સાગરીત ગૌરાંગ મુકેશભાઈ ત્રિવેદી (કાળિયા બીડ, ભાવનગર) ની દારૂના ગુનામાં ધરપકડ કર્યા બાદ કોર્પોરેશનના કર્મચારી ઉપર હુમલા કરવાના બનાવવામાં પણ ધરપકડ કરી કાન પકડીને ઉઠબેસ કરાવી હતી.