કરમસદ આણંદ મનપામાં 17 સામાન્ય અને 35 અનામત બેઠક

- ચૂંટણી આયોગે નવું સીમાંકન જાહેર કરાતાં જ રાજકીય ગતિવિધિઓ તેજ બની

- 13 વોર્ડમાં કુલ ૨,૯૭,૪૨૦ની વસ્તીનો સમાવેશ કરાયો : વોર્ડ દિઠ સરેરાશ ૨૨,૫૭૧ની વસ્તી : સૌથી વધુ વોર્ડ નં.-૧૩માં ૨૪,૫૯૪ અને સૌથી ઓછી ૨૦,૩૭૯ની વસ્તી : કુલ 26 સ્ત્રી બેઠકો

આણંદ : કરમસદ આણંદ મહાનગરપાલિકાના અસ્તિત્વને ૮ મહિના બાદ હવે રાજ્ય ચૂંટણી પંચ દ્વારા નવું સીમાંકન જાહેર કરવામાં આવ્યું છે. જેમાં મહાનગરપાલિકામાં સમાવેશ કરવામાં આવેલા તમામ ગામોની ૨,૯૭,૪૨૦ની વસ્તી સામે ૧૩ વોર્ડની નવરચના અને બાવન બેઠકોની સંખ્યા નક્કી કરાઈ છે. દરેક વોર્ડ દીઠ સરેરાશ ૨૨,૫૭૧ની વસતી થાય છે. જેમાં કુલ સ્ત્રી બેઠકો ૨૬ રહેશે. 

રાજ્ય ચૂંટણી પંચના જાહેરનામા મુજબ કરમસદ આણંદ મનપાની નવરચનામાં કુલ ૨.૯૭.૪૨૦ની વસ્તીનો સમાવેશ કરાયો છે. જેમાં આણંદ, વિદ્યાનગર, ગામડી, જીતોડિયા, લાંભવેલ, કરમસદ અને મોગરી ગામને પણ મનપામાં સમાવેશ કરાયા છે. મનપામાં ૧૩ વોર્ડમાં ૫૨ નગર સેવકોની સંખ્યા નક્કી કરાઈ છે. 

નવા સીમાંકન પ્રમાણે ૩૫ બેઠકો અનામત જાહેર કરાઈ છે. જ્યારે સામાન્ય બેઠકોની સંખ્યા માત્ર ૧૭ નક્કી કરાઈ છે. અનામત બેઠકોમાં પછાત વર્ગ માટે ૧૬ તથા અનુસૂચિત જાતિ અને જનજાતિ માટે ૧-૧ બેઠક નક્કી કરવામાં આવી છે. 

કરમસદ આણંદ મનપાના ૧૩ વોર્ડની સંખ્યા ૨૦,૦૦૦થી ૨૪,૫૯૪ સુધી રાખવામાં આવેલી છે. જેમાં સૌથી વધુ સંખ્યા વોર્ડ નં.-૧૩માં ૨૪,૫૯૪ તથા સૌથી ઓછી ૨૦,૩૭૪ નક્કી કરાઈ છે.

કરમસદ આણંદ મહાનગરપાલિકા ૧૩ વોર્ડના સીમાંકનમાં દરેક વોર્ડમાં સમાવેશ કરાયેલા તમામ વિસ્તારોના સર્વે નંબર તથા રોડ વિસ્તાર મુજબ જાહેર કરાયેલા છે.

 જેથી દરેક વોર્ડમાં કયા વિસ્તાર, કઈ સોસાયટીઓ, કયા વર્ગના કેટલા મતદારો અંગે સર્વેની પૂરક માહિતી મનપા દ્વારા સર્વે કર્યા બાદ ૧૫ દિવસ પછી જાણવા મળશે. 

રાજ્ય ચૂંટણી પંચ દ્વારા નવા જાહેર કરાયેલા સીમાંકન સંદર્ભે કોઈ નાગરિકોને વાંધા સૂચન અથવા અન્ય કોઈ બાબતે વાંધો હોય તો નવા સીમાંકન પ્રસિદ્ધ થયાના ૧૦ દિવસમાં લેખિતમાં રાજ્ય ચૂંટણી પંચને જણાવવાનું રહેશે તેવું પણ નવા સીમાંકનમાં જણાવ્યું છે. 

હાલ રાજ્ય ચૂંટણી પંચ દ્વારા નવા સીમાંકન બહાર પાડી દેવામાં આવેલ છે અને વાંધા અરજીઓ બાદ આખરી સીમાંકન જાહેર કરવામાં આવશે ત્યારબાદ વોર્ડના વિસ્તારો અને સોસાયટીઓ નું નામાંકન કરવામાં આવશે ત્યાર પછી મતદારયાદી સંદર્ભે કામગીરી શરૂ થશે જે કામગીરી ના આયોજન પ્રમાણે આગામી કરમસદ  આણંદ મહાનગરપાલિકાની પ્રથમ સામાન્ય ચૂંટણીઓ યોજાય તેવી સંભાવનાઓ જોવા મળી રહી છે.

વોર્ડદીઠ પછાત વર્ગની વસ્તી અને તેની ટકાવારી

વોર્ડદીઠ અનુ.જાતિની વસ્તી અને તેની ટકાવારી

મનપાના વોર્ડ મુજબ વસ્તી અને બેઠકોનો પ્રકાર તેમજ ફાળવણી

વોર્ડદીઠ અનુ.આદિજાતિની વસ્તી અને તેની ટકાવારી

નવા સીમાંકનમાં કયા વોર્ડમાં કયા વિસ્તારનો સમાવેશ

સીમાંકન જાહેર થતા ચૂંટણી લડવા ઈચ્છૂક ઉમેદવારો ગોડફાધરના શરણે

કરમસદ આણંદ મનપામાં સામાન્ય બેઠકો માત્ર ૧૭ રાખવામાં આવી છે. ત્યારે ૨૦ વર્ષથી સત્તા મેળવી રહેલા ભાજપના મોટા માથાઓ અને ઉમેદવાર માટે દાવેદાર ગણાતા કાર્યકરો માટે હવે મેન્ડેટ મેળવવા માટે ગળાકાપ સ્પર્ધાઓ યોજાવાની સંભાવનાઓ છે. બિનઅનામત બેઠકોની સંખ્યા ઓછી હોવાથી મેન્ડેટ માટે લોઢાના ચણા ચાવવા જેવી સ્થિતિ સર્જાશે. ત્યારે હવે સીમાંકન જાહેર થતા ચૂંટણી લડવા ઈચ્છૂક દાવેદારો ગોડફાધરના શરણે ગયા હોવાનું જાણવા મળ્યું છે.