વડોદરાઃ છેલ્લા કેટલાક વર્ષોમાં રોકાણ માટે શેર બજાર અને મ્યુચ્યુલ ફંડના તથા બીજા સ્ત્રોતની વધેલી બોલબાલા વચ્ચે પણ પોસ્ટ પર લોકોનો ભરોસો કાયમ છે.મળતા આંકડા પ્રમાણે વડોદરાવાસીઓએ પોસ્ટની વિવિધ યોજનાઓમાં ૧૨૦૦૦ કરોડ ઉપરાંતની રકમનું રોકાણ કરેલું છે.
વડોદરા ડિવિઝનમાં પોસ્ટ વિભાગના વડોદરા ઈસ્ટ અને વડોદરા વેસ્ટમાં વડોદરા અને આસપાસના મોટાભાગના વિસ્તારોનો સમાવેશ થઈ જાય છે. વડોદરા ડિવિઝનમાં ૧૫.૯૪ લાખ લોકોના વિવિધ યોજનાઓમાં એકાઉન્ટ છે.
પોસ્ટની સ્થાપના સરકારે આમ તો સંદેશા વ્યવહારને ધ્યાનમાં રાખીને કરી હતી પણ હવે પોસ્ટની બોલબાલા વિવિધ નાણાકીય યોજનાઓના કારણે વધારે છે.પોસ્ટની જે પણ યોજનાઓ અત્યારે ચાલે છે તેમા સૌથી વધારે લોકપ્રિય યોજના રિકરિંગ ડિપોઝિટની છે અને તેમાં ૫.૪૩ લાખ ગ્રાહકોના એકાઉન્ટ છે.વડોદરાના લોકોએ તેમાં લગભગ ૧૧૦૦ કરોડ રુપિયાનું રોકાણ કરેલું છે.
કઈ યોજનાઓમાં વડોદરાવાસીઓના કેટલા પૈસા ( અંદાજીત આંકડો)
યોજના એકાઉન્ટ રકમ
કિસાન વિકાસ પત્ર ૧.૬૦ લાખ ૧૩૦૦ કરોડ
મન્થલી ઈનકમ સ્કીમ ૯૪૫૩૧ ૨૩૦૦ કરોડ
પબ્લિક પ્રોવિડન્ટ ફંડ ૧૭૧૩૦ ૧૦૦૦ કરોડ
સુકન્યા સમૃધ્ધિ એકાઉન્ટ ૧.૦૭ લાખ ૪૫૦ કરોડ
રિકરિંગ ડિપોઝિટ ૫.૪૩ લાખ ૧૧૦૦ કરોડ
સિનિયર સિટિઝન સેવિંગ સ્કીમ ૧.૬૪ લાખ ૨૦૦૦ કરોડ
સેવિંગ્સ એકાઉન્ટ ૨.૬૩ લાખ ૯૦૦ કરોડ
મહિલા સન્માન સેવિંગ સ્કીમ ૧૧૬૪૫ ૮૦ કરોડ
ટર્મ ડિપોઝિટ ૧.૬૪ લાખ ૧૮૦૦ કરોડ
કિસાન વિકાસ પત્ર ૧.૬૦ લાખ ૧૩૦૦ કરોડ
નેશનલ સેવિંગ સર્ટિફિકેટ ૧.૭૮ લાખ ૧૫૦૦ કરોડ
સિનિયર સિટિઝન્સનો ઝૂકાવ પોસ્ટ તરફ વધારે
સૂત્રોનું કહેવું છે કે, બેન્ક ફડચામાં જાય તો લોકોને પોતાની રકમ ગુમાવવાની બીક લાગે છે.જ્યારે પોસ્ટમાં મૂકેલા પૈસા પાછા મળવાની ગેરંટી હોવાથી લોકો પોસ્ટમાં પૈસા રોકવાનું પસંદ કરે છે.
સિનિયર સિટિઝનને સૌથી વધારે વ્યાજ પોસ્ટના રોકાણમાં મળતું હોવાથી વરિષ્ઠ નાગરિકોમાં પોસ્ટ તરફનો ઝૂકાવ વધારે છે.
સુકન્યા સમૃધ્ધિ એકાઉન્ટની સંખ્યામાં પણ બે વર્ષથી વધારો થઈ રહ્યો છે.કારણકે તેમાં પણ વ્યાજનો દર વધારે છે.
મહિલા એજન્ટોના કારણે રિકરિંગ ડિપોઝિટના એકાઉન્ટ વધી રહ્યા છે
૨૦૦૦ જેટલી મહિલાઓને રોજગારી
રિકરિંગ ડિપોઝિટ માટે પોસ્ટ દ્વારા માત્ર મહિલાઓને એજન્ટ બનાવવામાં આવે છે.જેમને ગ્રાહકો દ્વારા રોકવામાં આવતી રકમ પર કમિશન આપવામાં આવે છે.વડોદરામાં લગભગ ૨૦૦૦ મહિલાઓ એજન્ટ તરીકે કામ કરી રહી છે અને તેના કારણે તેમને રોજગારી મળી રહી છે.
માત્ર ૧૫ ટકા ગ્રાહકો ઓનલાઈન સર્વિસનો ઉપયોગ કરે છે
પોસ્ટ સામે સૌથી મોટો પડકાર ગ્રાહકોને રાહ જોવડાવ્યા વગર સેવા આપવાનો છે.આ માટે પોસ્ટ દ્વારા ઈન્ડિયા પોસ્ટલ પેમેન્ટ બેન્ક સ્કીમ હેઠળ ઓનલાઈન સર્વિસ શરુ કરવામાં આવી છે.બેન્કની જેમ ગ્રાહકો પોતાનું એકાઉન્ટ ઓનલાઈન ઓપરેટ કરી શકે છે પણ હજી બહુ ઓછા ગ્રાહકો તેનો ઉપયોગ કરી રહ્યા છે.વડોદરામાં ઓનલાઈન સર્વિસ હેઠળન ગ્રાહકોની સંખ્યા ૨ લાખ જેટલી છે.જેની સામે વડોદરા ડિવિઝનમાં ૧૫ લાખ જેટલા એકાઉન્ટ છે.આમ માંડ ૧૫ ટકા ગ્રાહકો ઓનલાઈન સર્વિસનો ઉપયોગ કરી રહ્યા છે.
