ઉના: 4 સિંહે રસ્તો રોકતા 108 એમ્બ્યુલન્સમાં જ કરવી પડી પ્રસૂતિ!

ઉના, તા. 21 મે 2020, ગુરુવાર

ઉના નજીકના ગીર ગઢડા તાલુકાના ભીખા(ગીર) ગામે ગત રાતે અફસાના સાબિરશા નામની મહિલાને પ્રસૂતિની પીડા ઊપડતાં 108 એમ્બ્યુલન્સ મારફતે તેને ગીર ગઢડા લઈ જવામાં આવતી હતી, એ સમયે સુલપરાના પાટિયા પાસે રસ્તો રોકીને 4 સિંહ બેઠા હોવાથી એમ્બ્યુલન્સ થોભાવી દેવી પડી હતી.

મહિલાની પીડા ચરમસીમાએ પહોંચતાં ઇએમટી ડોક્ટર અને પાયલટે મળીને એમ્બ્યુલન્સમાં જ નોર્મલ ડિલિવરી કરાવી હતી. મહિલાને બાળકીનો જન્મ થયો હતો. અડધા કલાક પછી સિંહ ચાલ્યા ગયા બાદ માતા-પુત્રીને ગીરગઢડાના દવાખાને લઈ જઈને સારવાર આપવામાં આવી હતી. બન્ને ભયમુક્ત હોવાનું જાણવા મળ્યું હતું.