સલમાનની બિલ્ડીંગમાં ઘૂસી ગયેલ મોડલે અગાઉ આરટીઓમાં તોડફોડ કરી હતી

ઈશા સામે થોડા સમય પહેલાં જ ગુનો નોંધાયો હતો

બે મહિલા કર્મચારીઓને માર મારનારી ઈશાના સલમાનના ઘર સુધી પહોંચવાના ઈરાદા અંગે તપાસ

બાંદરા પોલીસ સ્ટેશનના અધિકારીએ જણાવ્યું હતું કે મંગળવાર અને બુધવારે બનેલી ઘટનાઓના સંદર્ભમાં બે એફઆઈઆર નોંધવામાં આવી છે. છત્તીસગઢનો ૨૩ વર્ષીય જીતેન્દ્રકુમાર સિંહ મંગળવારે બે વખત ગેલેક્સી એપાર્ટમેન્ટની ઈમારતમાં ઘુસવાનો પ્રયાસ કર્યો હતો અને બંને સમયે પોલીસે તેને પકડી પાડયો હતો. આ બાદ તેને બાંદરા પોલીસને સોંપી દીધો હતો. 

તો ગુરુવારે ઈશા છાબરાએ સવારે લગભગ ૩.૩૦ વાગ્યે આવી જ કોશિશ કરી હતી અને એપાર્ટમેન્ટની લીફ્ટનો ઉપયોગ કરીને સલમાનની ઘરે પહોંચી ગઈ હતી અને દરવાજો ખટખટાવ્યો હતો. આ બાદ સુરક્ષા ગાર્ડે તેને પૂછતા તેણે  દાવો કર્યો હતો કે  સલમાન ખાને તેને ત્યાં બોલાવી હતી.  જો કે આ વાત ખોટી સાબિત થતા તેની ધરપકડ કરવામાં આવી હતી. આ કેસમાં બંને આરોપીની ધરપકડ કરવામાં આવી હતી. વધુમાં પોલીસે આ બંને સામે કોઈ ગુનાહિત પૃષ્ઠભૂમિ છે કે તે અંગે વધુ તપાસ હાથ ધરી હતી. જેમાં ઈશા છાબરા સામે અંધેરી આરટીઓમાં વિવાદ અને તોડફોડનો અગાઉ પણ કેસ નોંધાયેલો મળી આવ્યો હતો. 

જેમાં જીપ  કારના દસ્તાવેજો બાબતે થયેલા ઝઘડા દરમિયાન ઈશાએ બે મહિલા આરટીઓ અધિકારીઓને માર માર્યો હતો. જેમાં ઈશાએ વિવાદ દરમિયાન આરટીઓ ઓફિસમાં કોમ્પ્યુટરની  તોડફોડ કરી હતી અને એક મહિલા કર્મચારીનો ફોન પણ તોડી નાખ્યો હતો તથા ધમકીઓ આપી હતી. આ બાદ જોર જોરથી ચીસો પાડવા લાગી હતી.  અંબોલી પોલીસે આ મામલે ઈશા સામે કેસ નોંધ્યો હતો અને તેની અટકાયત કરી હતી. 

પોલીસે આ મામલે પૃષ્ટિ કરી હતી કે એપ્રિલમાં તે અંધેરી પશ્ચિમમાં ઈશા રહેતી હતી ત્યારે આ કેસ નોંધવામાં આવ્યો હતો. આ બાદ તે ગત પહેલી મેના રોજ તે ખાર પશ્ચિમના કાર્ટર રોડમાં રહેવા ગઈ હતી. ખારમાંથી ધરપકડ કરવામાં આવતા ઈશાએ દાવો કર્યો હતો કે તે એક જુનિયર કલાકાર તરીકે કામ કરે છે અને તે ફક્ત સલમાન ખાનને મળવા માંગતી હતી.