'ધ કાશ્મીર ફાઈલ્સ' એ જીત્યો ગોલ્ડન ફિલ્મ એવોર્ડ, વિવેક અગ્નિહોત્રીએ ટ્રોફી સાથે તસવીર શેર કરી

- ઈઝરાયેલના ફિલ્મ નિર્માતા નાદવ લેપિડે 'ધ કાશ્મીર ફાઈલ્સ'ને 'વલ્ગર પ્રોપગેન્ડા' ગણાવી હતી

મુંબઈ, તા. 13 ડિસેમ્બર 2022, મંગળવાર

બોલિવૂડ ફિલ્મમેકર વિવેક રંજન અગ્નિહોત્રીની ફિલ્મ 'ધ કાશ્મીર ફાઈલ્સ'ના નામે વધુ એક ખિતાબ જોડાઈ ગયો છે. તાજેતરમાં યોજાયેલ ભારતીય ટેલિવિઝન એવોર્ડ્સ 2022 (ITA એવોર્ડ્સ 2022)માં આ ફિલ્મનું સન્માન કરવામાં આવ્યું છે.

ફિલ્મને વધુ એક સમ્માન મળ્યું

આ વર્ષે રિલીઝ થયેલી ફિલ્મ 'ધ કાશ્મીર ફાઈલ્સ'ને લઈને ઘણો વિવાદ રહ્યો છે. ફિલ્મ કેટલાક દર્શકોને પસંદ આવી તો કેટલાક લોકોએ તેને પ્રોપગેન્ડા ગણાવીને તેની ટીકા કરી. વિવેક અગ્નિહોત્રીની આ ફિલ્મે તેની રસપ્રદ વાર્તા સાથે ભારતીય સિનેમામાં ભારે પ્રભાવ ઉભો કર્યો છે. અગ્નિહોત્રીને ડાયરેક્ટર તરીકે પણ ઘણી પ્રશંસા મળી છે. હાલમાં આ ફિલ્મને ભારતીય ટેલિવિઝન એવોર્ડ્સ (ITA)માં ભારતીય સિનેમાની ગોલ્ડન ફિલ્મ તરીકે સમ્માનિત કરવામાં આવી હતી.

હિંદુઓ માટે સમર્પિત કર્યો એવોર્ડ

ફિલ્મ નિર્દેશકે પોતે  સોશિયલ મીડિયા પર ટ્રોફી સાથેના ફોટા શેર કરીને દર્શકોનો આભાર વ્યક્ત કર્યો છે. એવોર્ડ શોના ફોટા શેર કરતા વિવેક અગ્નિહોત્રીએ લખ્યું, #TheKashmirFiles ને ગોલ્ડન એવોર્ડ આપવા બદલ @TheITA_Official તમારો આભાર..આ લોકોની ફિલ્મ છે. હું માત્ર એક માધ્યમ છું...અમે આ એવોર્ડ નરસંહારથી પીડિત તમામ કાશ્મીરી હિન્દુ પીડિતોને સમર્પિત કરીએ છીએ. 

ફિલ્મનો એવોર્ડ મળ્યા બાદ વિવેક અગ્નિહોત્રીએ અનેક ટ્વીટ કર્યા. તેમણે લખ્યું, #TheKashmirFiles માટેનો આ એવોર્ડ ભારતીય સિનેમાની ગોલ્ડન ફિલ્મ તરીકે આપવામાં આવી રહ્યો છે, જે ધાર્મિક આતંકવાદના તમામ પીડિતોને સમર્પિત છે. @TheITA_Official #KashmirHinduGenocide

This award for #TheKashmirFiles being honoured as the Golden Film of Indian cinema is dedicated to all the victims of religious terrorism. @TheITA_Official #KashmirHinduGenocide pic.twitter.com/Uc6RpREPbm

— Vivek Ranjan Agnihotri (@vivekagnihotri) December 12, 2022

તાજેતરમાં ઈન્ટરનેશનલ ફિલ્મ ફેસ્ટિવલ ઓફ ઈન્ડિયા (IFFI)ના જ્યુરી હેડ અને ઈઝરાયેલના ફિલ્મ નિર્માતા નાદવ લેપિડે 'ધ કાશ્મીર ફાઈલ્સ'ને 'વલ્ગર પ્રોપગેન્ડા' ગણાવી હતી. આ અંગે ઘણો વિવાદ થયો હતો. 'ધ કાશ્મીર ફાઈલ્સ' ઉપરાંત વિવેક અગ્નિહોત્રી ટૂંક સમયમાં કોરાના મહામારી પર પોતાની નવી ફિલ્મ 'ધ વેક્સીન વોર' માટે તૈયારી કરી રહ્યા છે જે 15 ઓગસ્ટ, 2023 ના રોજ રિલીઝ થવાની છે. નિર્દેશકની પત્ની પલ્લવી જોશી દ્વારા નિર્મિત આ ફિલ્મ 10 થી વધુ ભાષાઓમાં રિલીઝ થશે.