નેપોટિઝમ અંગે ગ્લેમરસ એક્ટ્રેસ પલક તિવારીએ કહ્યું - 'અમારે ક્યારેય માતા-પિતાની બરાબરી...'

Palak Tiwari On Nepotism: ગ્લેમરસ એક્ટ્રેસ પલક તિવારી હાલમાં પોતાની તાજેતરમાં રિલીઝ થયેલી ફિલ્મને કારણે ચર્ચામાં છે. ફિલ્મમાં પલકના અભિનયને ખાસ પ્રતિસાદ નથી મળ્યો. ઈન્ડસ્ટ્રીમાં પોતાનું નામ બનાવવાનો પ્રયાસ કરી રહેલી પલક તિવારી પર અભિનેત્રી શ્વેતા તિવારીની પુત્રી હોવાને કારણે નેપોટિઝમનો પણ આરોપ લાગ્યો છે. તેને પણ ઘણી વખત આ ચર્ચાનો સામનો કરવો પડે છે. જોકે પલકે હંમેશા નેપોટિઝમ વિશે ખુલ્લેઆમ વાત કરી છે. તેનું માનવું છે કે, 'ઈન્ટરનેટની દુનિયામાં લોકો ખૂબ જ કઠોર છે અને તેઓ ટ્રોલ કરે છે પરંતુ અમારું કામ અમારા માતા-પિતાના વારસાને જીવંત રાખવાનું છે.' 

ઈન્ટરનેટ પર લોકો થોડા ક્રૂર હોય છે

તાજેતરની વાતચીત દરમિયાન પલક તિવારીને પૂછવામાં આવ્યું કે તેની સમકક્ષ સ્ટાર કિડ્સ જેવા કે અનન્યા પાંડે, ખુશી કપૂર, ઈબ્રાહિમ અલી ખાન અને જુનૈદ ખાન તેમના ફિલ્મી બેકગ્રાઉન્ડને કારણે કેવી રીતે ટ્રોલિંગનો સામનો કરે છે. ત્યારે પલક તિવારીએ જવાબ આપ્યો કે, જ્યારે સ્ટાર કિડ્સની વાત આવે છે, ત્યારે ઈન્ટરનેટ પર લોકો થોડા ક્રૂર હોય છે પણ મને લાગે છે કે તેની સાથે એક જવાબદારી પણ આવે છે. 

લોકો અમારા માતા-પિતા પ્રત્યે પ્રોટેક્ટિવ છે

એક્ટ્રેસે આગળ કહ્યું કે, 'લોકો અમારા માતા-પિતા પ્રત્યે પ્રોટેક્ટિવ છે કારણ કે તેઓ તેમને જોઈને મોટા થયા છે. તેઓ તેમને પ્રેમ કરે છે. મને ખબર છે કે પ્રેરણાના પાત્રએ લોકોને પ્રેમનો અર્થ શીખવ્યો છે. તેઓ શ્વેતા તિવારી સાથે એટલો લગાવ ધરાવે છે કે તેઓ ખૂબ પ્રોટેક્ટિવ છે કે જ્યારે તે મને તેની પુત્રી તરીકે અભિનય કરતી જુએ છે ત્યારે તેમને લાગે છે કે હું ક્યારેય તેની સાથે બરોબરી કરી શકીશ નહીં. આ ફક્ત લોકોનો અમારા માતા-પિતા પ્રત્યેનો સ્નેહ અને પ્રેમ છે.' 

અમે ક્યારેય અમારા માતા-પિતાની બરાબરી કરવા નથી માગતા

પલકે કહ્યું કે, 'અમે સ્ટાર કિડ્સ ક્યારેય અમારા માતા-પિતા સાથે બરાબરી કરી શકીશું નહીં. લોકો ભૂલી જાય છે કે અમે ક્યારેય અમારા માતા-પિતાની બરાબરી કરવા નથી માગતા, અમે ક્યારેય તે મુકામ સુધી પહોંચી શકીશું નહીં અને અમે તેમના સૌથી મોટા ચાહકો છીએ. તેથી જો તમે મારી માતાની પ્રશંસા કરો છો તો કલ્પના કરો કે હું તેમની કેટલી પ્રશંસા કરું છું, ઓછામાં ઓછી દસ વાર. મને લાગે છે કે હું બધા સ્ટાર કિડ્સ વતી કહી શકું છું કે અમારું એકમાત્ર લક્ષ્ય ફક્ત તે વારસાને જાળવી રાખવાનું છે અને તેને નુકસાન પહોંચાડવાનું નથી. આખરે સમય જતાં અમે ત્યાં પહોંચીશું.'