Hunarbaaz : સ્ટ્રીટ લાઇટ પર પોલ ડાન્સની પ્રેક્ટીસ કરનારા બિહારનાં આકાશે જીત્યુ ટાઇટલ

-કલર્સ ચેનલ પરના હુનરબાઝ નામના શોમાં એક બિહારી સ્ટ્રીટ ડાન્સરે બાજી મારી છે.

નવી મુંબઇ, તા. 18 એપ્રિલ 2022, સોમવાર

કલર્સ ચેનલ પરના હુનરબાઝ નામના શોમાં એક બિહારી સ્ટ્રીટ ડાન્સરે બાજી મારી છે. સ્ટ્રીટ ડાન્સર આકાશે  આકાશે એરિયલ આર્ટ અને ફ્લાઈંગ પોલ પર પોતાની કલા બતાવીને રિયાલિટી શો હુનરબાઝનું ટાઈટલ જીત્યું છે.આકાશને ઈનામ તરીકે 15 લાખ રૂપિયાનો ચેક મળ્યો છે. રવિવારે ગ્રાન્ડ ફિનાલે યોજાઈ હતી, જેમાં આકાશને ટાઈટલ મળ્યું હતું.

હુનરબાઝના ગ્રાન્ડ ફિનાલેમાં નીતુ સિંહ અને નોરા ફતેહીએ આકાશને ટ્રોફી આપી હતી. આ શોના જજ પરિણીતી ચોપરા, મિથુન ચક્રવર્તી અને કરણ જોહર હતા. આ શો 22 જાન્યુઆરીથી શરૂ થયો હતો. આકાશે પોતાના અભિનયથી તમામ જજના દિલ જીતી લીધા હતા.

આકાશે તેની જીત પર ખુશી વ્યક્ત કરતા કહ્યું કે, “આ ટ્રોફીનો અને જીતનો શ્રેય તે માતા-પિતાને આપવા માંગે છે. માણસ જો ઇચ્છે તો દરેક સમસ્યાઓને સરળ બનાવી શકે છે, ગરીબી કોઈની સફળતાના માર્ગમાં અડચણ ન બની શકે, તેને કરવા માટે જુસ્સો હોવો જોઈએ, સફળતામાં થોડો વિલંબ થઈ શકે છે પરંતુ તે અશક્ય નથી.”

આ મહેનતુ સ્ટ્રીટ ડાન્સર આકાશ બિહારના ભાગલપુરમાં રહે છે, તે 4 વર્ષથી પોલ ડાન્સિંગની પ્રેક્ટ્રીસ કરી રહ્યો હતો.તે લાઇટનાં પિલર પર પાર્કોમાં લગાવેલા પિલર પર ડાન્સની પ્રેક્ટ્રીસ કરતો હતો. એમ કહી શકાય કે આકાશનો ભાગલપુરથી મુંબઇની સફર ખૂબ પીડાદાયક રહી હતી.