એશિયન પેરા ગેમ્સ 2026: ભારતીય પેરા તીરંદાજ શીતલ દેવીએ 720માંથી 704 પોઇન્ટ મેળવી રચ્યો ઇતિહાસ

જમ્મુ અને કાશ્મીરની 19 વર્ષીય ભારતીય પેરા તીરંદાજ શીતલ દેવીએ 19 ઓક્ટોબર 2026ના રોજ જાપાનના આઈચી-નાગોયા સ્થિત ઓકાઝાકી ચુઓ સોગો પાર્ક મલ્ટીપર્પઝ સ્ક્વેર ખાતે યોજાયેલ એશિયન પેરા ગેમ્સ 2026 માં મહિલા કમ્પાઉન્ડ તીરંદાજીની રેન્કિંગ રાઉન્ડમાં 720માંથી 704 પોઇન્ટ મેળવીને વર્લ્ડ રૅકોર્ડની બરાબરી કરી છે અને નવો એશિયન રૅકોર્ડ સ્થાપિત કર્યો છે.

મુખ્ય પ્રદર્શન અને સિદ્ધિઓ 

શીતલ દેવીએ 704 પોઇન્ટ મેળવી તુર્કીની તીરંદાજ ઓઝનુર ક્યુરેના વિશ્વ રૅકોર્ડની બરાબરી કરી છે. તેમણે માર્ચ 2026 માં બેંગકોક ખાતે બનાવેલા પોતાના 698 પોઇન્ટના એશિયન રૅકોર્ડમાં 6 પોઇન્ટનો સુધારો કર્યો. 2023 માં હાંગઝોઉ એશિયન પેરા ગેમ્સમાં બનાવેલા 680 પોઇન્ટના પોતાના જ ગેમ્સ રૅકોર્ડને તોડ્યો.

72 તીરના રેન્કિંગ રાઉન્ડમાં તેણે 57 વાર 10 પોઇન્ટ મેળવ્યા, જેમાં 32 તીર X-રિંગ(સૌથી અંદરનું ટાર્ગેટ સર્કલ)માં વિંધાયા હતા.

ભારતીય તીરંદાજ પાયલ નાગે 675 પોઇન્ટ મેળવ્યા. શીતલ અને પાયલે મળીને 1,379 પોઇન્ટનો સરવાળો કરીને મહિલા પેરા કમ્પાઉન્ડ ડબલ્સ રેન્કિંગમાં પ્રથમ સ્થાન મેળવ્યું હતું. 

કમ્પાઉન્ડ તીરંદાજી અને સ્કોરિંગ નિયમો 

કમ્પાઉન્ડ ધનુષ્યમાં કેબલ અને કેમ (Cam) પ્રણાલીનો ઉપયોગ થાય છે. આ પ્રણાલીને કારણે ધનુષ્યને સંપૂર્ણ ખેંચેલી સ્થિતિમાં પકડી રાખવા માટે જરૂરી બળ ઘટે છે. 72-તીરના રેન્કિંગ રાઉન્ડમાં દરેક તીરના મહત્તમ 10 પોઇન્ટ હોય છે, એટલે કે કુલ મહત્તમ સ્કોર 720 હોય છે.

• X-રિંગ: લક્ષ્યનું સૌથી અંદરનું વર્તુળ જે પોઇન્ટ્સ ટાઈ (સરખા) થાય ત્યારે ટાઈ-બ્રેકર તરીકે ઉપયોગમાં લેવાય છે.

પેરા તીરંદાજી

પેરા તીરંદાજી એ શારીરિક ક્ષતિ ધરાવતા ખેલાડીઓ માટે તીરંદાજીનું એક અનુકૂલનશીલ સ્વરૂપ છે. આંતરરાષ્ટ્રીય પેરા-તીરંદાજી સ્પર્ધાઓમાં રિકર્વ, કમ્પાઉન્ડ અને W1 ઇવેન્ટ્સનો સમાવેશ થાય છે, જેમાં રમતવીરો પાત્રતા માપદંડ અને ક્ષતિના આધારે વર્ગીકરણમાં ભાગ લે છે. 

પરીક્ષાલક્ષી પ્રશ્ન
પ્રશ્ન 1. એશિયન પેરા ગેમ્સ 2026માં મહિલા કમ્પાઉન્ડ તીરંદાજીની રેન્કિંગ રાઉન્ડમાં વર્લ્ડ રૅકોર્ડની બરાબરી કરનાર ભારતીય ખેલાડી કોણ છે?

(A) પાયલ નાગ
(B) શીતલ દેવી
(C) દીપિકા કુમારી
(D) અવની લેખરા