ખાડી દેશોમાં યુદ્ધ વચ્ચે ભારતીય શેર બજારમાં ભારે ઉથલપાથલ, સેન્સેક્સમાં 1600થી વધુ અંકનો ઘટાડો

Stock Market Today: ખાડી દેશોમાં ભીષણ જંગના હાલત વચ્ચે ભારતીય શેર બજારમાં મોટો કડાકો જોવા મળ્યો છે. પ્રિ ઓપનિંગમાં સેન્સેક્સમાં 1600થી વધુ અંકનો ઘટાડો થયો છે. સેન્સેક્સ 1600થી વધુ પોઈન્ટ અથવા 2.13% ઘટીને 78,528 પર તો નિફ્ટી 477 પોઈન્ટ અથવા 1.92% ઘટીને 24,389ના સ્તરે કારોબાર કરી રહ્યો છે. બેંક અને ઓટો શેરમાં ભારે ઉથલપાથલ જોવા મળી છે. 

9 લાખ કરોડ સ્વાહા

મિડલ ઈસ્ટમાં વધી રહેલા તણાવ ભારતીય શેરબજારમાં હોળીનો રંગ ફિક્કો પડ્યો છે. સેન્સેક્સ અને નિફ્ટીમાં ભારે ઘટાડાને કારણે રોકાણકારોને ગણતરીની મિનિટોમાં અંદાજિત 9 લાખ કરોડ રૂપિયાનું નુકસાન થયું છે. શેર બજાર ખુલતા જ ચારેબાજુ લાલ નિશાન જોવા મળ્યું હતું. ઉલ્લેખનીય છે કે 3 માર્ચે હોળીના કારણે શેરબજારમાં રજા હતી, પરંતુ આજે બજાર ખુલતાની સાથે જ વૈશ્વિક નકારાત્મક સંકેતોની સીધી અસર જોવા મળી હતી.

ત્રણ દિવસમાં 20 લાખ કરોડનું ધોવાણ

શેરબજારમાં આ સતત ત્રીજો દિવસ છે જ્યારે ભારે વેચવાલી જોવા મળી રહી છે. છેલ્લા ત્રણ ટ્રેડિંગ સત્રમાં રોકાણકારોએ અંદાજે 20 લાખ કરોડ રૂપિયા ગુમાવ્યા છે. માત્ર ભારત જ નહીં, પરંતુ એશિયન બજારોમાં પણ ડરનો માહોલ છે. દક્ષિણ કોરિયાનું બજાર કોસ્પી (KOSPI) 8 ટકા જેટલું નીચે સરક્યું હતું. આ સાથે જ અમેરિકી બજારોમાં પણ ગત સત્રમાં મોટા ઘટાડા સાથે બંધ આવ્યા હતા, જેની અસર આજે ભારતીય શેરબજાર પર સ્પષ્ટપણે દેખાઈ રહી છે.

અમેરિકાના શેરબજારમાં ઐતિહાસિક કડાકો! 

ગઈકાલે પ્રમુખ ટ્રમ્પે જાહેરાત કરી હતી કે હાલ ચાલી રહેલું યુદ્ધ હજુ 4 થી 5 અઠવાડિયા સુધી ચાલુ રહી શકે છે. આ નિવેદન બાદ રોકાણકારોએ જોખમી એસેટ્સ વેચવાનું શરૂ કર્યું છે અને પોતાની મૂડી રોકડમાં શિફ્ટ કરી રહ્યા છે. આ અનિશ્ચિતતાને કારણે બજારમાં ભારે વેચવાલી જોવા મળી હતી. ડોલર મજબૂત થતા વોલ સ્ટ્રીટ પર પણ તેની નકારાત્મક અસર પડી.  રોકાણકારો સુરક્ષિત રોકાણ તરીકે ડોલર તરફ વળતા અમેરિકી ડોલર મજબૂત થયો છે. વિશ્વની છ મુખ્ય કરન્સી સામે ડોલરની મજબૂતી દર્શાવતો ઇન્ડેક્સ 99.28 પર પહોંચી હતી. 

• Dow Jones: 1,028 પોઈન્ટથી વધુ (2.10%) તૂટીને 47,876 પર પહોંચ્યો હતો

• Nasdaq: ટેક-હેવી નાસ્ડેકમાં 462 પોઈન્ટ (2.03%) નો ઘટાડો નોંધાયો હતો

સતત અપડેટ કરી રહ્યા છીએ...