ટેરિફ દ્વિપક્ષીય વેપાર અને મહત્વના ક્ષેત્રોને અસર કરશે

ભારતમાંથી અમેરિકા થતી બધી નિકાસ પર ૨૫% આયાત ડયુટી

અમદાવાદ : યુએસ રાષ્ટ્રપતિ ડોનાલ્ડ ટ્રમ્પે ભારતમાંથી થતી બધી નિકાસ પર ૨૫% આયાત ડયુટીની જાહેરાત કરી છે. આ ટેરિફ ૧ ઓગસ્ટ, ૨૦૨૫થી અમલમાં આવશે અને સ્માર્ટફોન, દવાઓ, ઓટો પાર્ટ્સ અને જ્વેલરી જેવા ઘણા મહત્વપૂર્ણ ક્ષેત્રોને અસર કરશે. ટ્રમ્પ વહીવટીતંત્રનો દાવો છે કે આ પગલું ભારતના બિન-રાજકોષીય વેપાર અવરોધો અને રશિયા સાથેના તેના સંરક્ષણ અને ઉર્જા સંબંધોના જવાબમાં લેવામાં આવ્યું છે.

યુએસ ટેરિફથી દ્વિપક્ષીય વેપારને મોટો ફટકો પડવાનો ભય ઉદભવ્યો છે. વર્ષ ૨૦૨૪માં ભારત અને અમેરિકા વચ્ચે કુલ દ્વિપક્ષીય વેપાર ૧૨૯ બિલિયન ડોલર (લગભગ ૧૦.૭ લાખ કરોડ) હતો. ઓગસ્ટના છેલ્લા અઠવાડિયામાં નવી દિલ્હીમાં વેપાર વાટાઘાટોનો આગામી રાઉન્ડ પ્રસ્તાવિત છે. આ માટે, યુએસ પ્રતિનિધિમંડળ ૨૫ ઓગસ્ટથી ભારતની મુલાકાત લેશે. યુએસ ટેરિફથી કયા ક્ષેત્રો સૌથી વધુ પ્રભાવિત થશે તેના પર નજર કરીએ તો,

સ્માર્ટફોન અને ઇલેક્ટ્રોનિક્સ

નાણાકીય વર્ષ ૨૦૨૪-૨૫માં, ભારતે યુએસને ૨૪.૧ બિલિયન ડોલર (૫૫% વાષક વધારો) ના સ્માર્ટફોન નિકાસ કર્યા હતા. પરંતુ હવે ૨૫% ટેરિફ લાગુ થયા પછી, અમેરિકામાં તેમના ભાવ વધી શકે છે અને માંગ પર અસર પડી શકે છે.

ટેક્સટાઇલ અને ગાર્મેન્ટ ક્ષેત્ર

ભારતે ૨૦૨૪માં ૧૦.૮ અબજ ડોલરના ટેક્સટાઇલ અને એપેરલની નિકાસ અમેરિકામાં કરી હતી, જે કુલ ટેક્સટાઇલ નિકાસના ૨૮.૫% હિસ્સો ધરાવે છે. ૧૦-૧૨%ની હાલની ડયુટી ઉપરાંત ૨૫% ની નવી ડયુટી ભારતીય કપડાને યુએસ બજારમાં બિન-સ્પર્ધાત્મક બનાવી શકે છે. વિયેતનામ અને બાંગ્લાદેશ જેવા દેશોને આનો ફાયદો થઈ શકે છે.

ઝવેરાત અને રત્ન ક્ષેત્ર

ભારતે નાણાકીય વર્ષ ૨૫માં ૧૨ બિલિયન ડોલરના દાગીનાની નિકાસ કરી હતી, જેમાં યુએસનો હિસ્સો લગભગ ૩૦% છે. હાલની ૨૭% ડયુટી ઉપરાંત વધારાની ૨૫% ટેરિફ આ ક્ષેત્રના માર્જિનને ગંભીર અસર કરી શકે છે અને ઓર્ડર રદ કરવા અથવા યુએસ ખરીદદારોને સપ્લાયર્સ બદલવા તરફ દોરી શકે છે.

ઓટો પાર્ટ્સ અને એન્જિનિયરિંગ ક્ષેત્ર 

ભારતે ૨૦૨૪માં યુએસને ૨.૨ બિલિયન ડોલરના ઓટો ઘટકોની નિકાસ કરી હતી. જ્યારે ફિનિશ્ડ વાહનોની નિકાસ ફક્ત ૧૦ મિલિયન ડોલરની આસપાસ હતી, ઓટો પાર્ટ્સ પર ૨૫% ડયુટી મેક ઇન ઇન્ડિયા હેઠળ એન્જિનિયરિંગ નિકાસને નુકસાન પહોંચાડી શકે છે.

સીફૂડ નિકાસ

ભારતના દરિયાઈ નિકાસ ઉદ્યોગનું કુલ કદ ૭.૨ બિલિયન ડોલર છે, જેમાં યુએસનો હિસ્સો લગભગ ૨.૪ બિલિયન ડોલર છે. સીફૂડ પર ટેરિફ વધારવાથી લેટિન અમેરિકન નિકાસકારોની તુલનામાં ભારતના ભાવ બિનસ્પર્ધાત્મક બની શકે છે.