સેન્સેક્સની ઐતિહાસિક 13 મહિનાની સફર:બજારનું Mcap રૂ.12.28 લાખ કરોડ વધીને રૂ.283.70 લાખ કરોડ

બેંકિંગ-એફએમસીજી-ઓટો વિનર : આઈટી શેરો સૌથી વધુ લુઝર

મુંબઈ : ભારતીય શેર બજારોમાં આજે નવો ઈતિહાસ રચાયો છે. વિશ્વ અત્યારે અનેક પડકારોનો સામનો કરી રહ્યું છે. આ ઐતિહાસિક ટોચને પાર કરવાની ૧૩ મહિનાની સફરમાં સેન્સેક્સ જે ૧૯,ઓકટોબર ૨૦૨૧ના ૬૨૨૪૫.૪૩ની અગાઉની વિક્રમી ટોચને પાર કરીને આજે ૬૨૪૧૨નો નવી ઐતિહાસિક ઊંચાઈનો વિક્રમ સર્જયો છે.

આ ૧૩ મહિનાની સફરમાં એક તરફ આઈટી જાયન્ટ વિપ્રો લિમિટેડના શેરનો ભાવ ૪૪ ટકાથી વધુ તૂટયો છે. જ્યારે એફએમસીજી  જાયન્ટ આઈટીસી લિમિટેડના શેરનો ભાવ આ સમયગાળામાં ૩૮ ટકાથી વધુ વધ્યો છે. 

આમ બેંકિંગ, એફએમસીજી, ઓટો શેરો આ સફરમાં સર્વાધિક વિનર રહ્યા છે, તો આઈટી શેરો સૌથી વધુ લુઝર રહ્યા છે. અલબત બજારનું માર્કેટ કેપિટલાઈઝેશન-રોકાણકારોની સંપતિ આ સમયગાળામાં રૂ.૨૭૧.૪૨ લાખ કરોડથી રૂ.૧૨.૨૮ લાખ કરોડ વધીને રૂ.૨૮૩.૭૦ લાખ કરોડ પહોંચ્યું છે. જે ૧૩,સપ્ટેમ્બર ૨૦૨૨ના રૂ.૨૮૬.૭૧ લાખ કરોડ સર્વોચ્ચ ઊંચાઈએ પહોંચ્યું હતું.  

કોરોના મહામારી બાદ યુક્રેન-રશિયા વચ્ચે યુદ્વના પરિણામે વિશ્વભરમાં ખોરવાયેલી સપ્લાય-પુરવઠાની ચેઈનના પરિણામે ફાટમફાટમ ફુગાવા-મોંઘવારીના કારણે એક તરફ અમેરિકા, યુરોપના દેશો સાથે ભારતમાં વ્યાજ દરોમાં તીવ્ર  વધારો કરવાની ફરજ પડી છે.

પરંતુ આ વિકટ પરિસ્થિતિમાં ભારતીય અર્થતંત્રને અડીખમ રાખવામાં સરકારની વિદેશ અને આર્થિક નીતિના સમન્વય સાથે ઘર આંગણે પુરવઠા સ્થિતિ જળવાઈ રહે એ માટે લેવાયેલા પગલાંથી પરિસ્થિતિ અંકુશમાં રહેતાં ફોરેન પોર્ટફોલિયો ઈન્વેસ્ટરો(એફપીઆઈઝ), વિદેશી સંસ્થાકીય રોકાણકારો જે પાછલા મહિનાઓમાં શેરોમાં નેટ વેચવાલ બન્યા હતા એ ફરી ખરીદદાર બન્યા સાથે સ્થાનિક સંસ્થાકીય રોકાણકારોની શેરોમાં ખરીદીના જોરે સેન્સેક્સે નવી ઊંચાઈનો ઈતિહાસ રચ્યો છે.

૧૩ મહિનાની આ વિક્રમી ઊંચાઈની સફરમાં આઈટી-સોફટવેર સર્વિસિઝ, ટેકનોલોજી શેરોમાં સૌથી વધુ ધોવાણ થયું છે. જેમાં વિપ્રો સર્વાધિક ૪૪.૦૬ ટકા ઘટી આવ્યા બાદ ટેક મહિન્દ્રા ૩૦.૫૪ ટકાનો ઘટાડો થયો છે. આ સિવાય ટાટા સ્ટીલમાં ૨૨.૮૮ ટકાનો ઘટાડો અને બજાજ ફિનસર્વ ૧૪.૨૩ ટકા, બજાજ ફાઈનાન્સ ૧૨.૩૯ ટકા, ઈન્ફોસીસ ૧૦.૫૨ ટકા ઘટયા છે.

જ્યારે આ સમયગાળામાં સેન્સેક્સની ગત વિક્રમી ટોચ સમયે શેરોના બંધ ભાવથી આજના બંધ મુજબઆઈટીસી સર્વાધિક ૩૮.૧૯ ટકા વધ્યો છે. આ સિવાય મહિન્દ્રા એન્ડ મહિન્દ્રા ૩૬.૭૪ ટકા, આઈસીઆઈસીઆઈ બેંક ૨૫.૪૫ ટકા, સન ફાર્મા ઈન્ડસ્ટ્રીઝ ૨૪.૯૫ ટકા, સ્ટેટ બેંક ઓફ ઈન્ડિયા ૨૪.૭૫ ટકા વધ્યા છે.

આગેવાન શેરોમાં જોવાયેલી ઊંચી વધઘટ