રિઝર્વ બેંક દ્વારા એકી સામટા 150 NBFCના લાયસન્સ રદ કરાયા

અમદાવાદ : ભારતીય રિઝર્વ બેંકે દેશમાં એનબીએફસી  પર પોતાની પકડ વધુ કડક બનાવી છે, એક જ ઝાટકે ૧૫૦ એનબીએફસીના નોંધણી પ્રમાણપત્રો રદ કર્યા છે. કેન્દ્રીય બેંક દ્વારા આ કડક કાર્યવાહી RBI અધિનિયમ, ૧૯૩૪ ની કલમ ૪૫-IA (૬) હેઠળ કરવામાં આવી છે.

આ કાર્યવાહીનો અર્થ એ છે કે આ કંપનીઓ હવે કોઈપણ નાણાકીય વ્યવસાય અથવા ધિરાણ વ્યવસાય કરી શકશે નહીં. વધુમાં, સાત અન્ય કંપનીઓએ સ્વેચ્છાએ તેમના લાઇસન્સ પરત કર્યા છે. આ પછી, તેમના નોંધણી પણ રદ કરવામાં આવ્યા હતા.રિઝર્વ બેંકની આ કાર્યવાહીથી પ્રભાવિત મોટાભાગની કંપનીઓ પશ્ચિમ બંગાળ અને દિલ્હી સ્થિત છે.

જો કે, આ ઉપરાંત તેલંગાણા, કર્ણાટક, તમિલનાડુ, બિહાર, હરિયાણા, મધ્યપ્રદેશ અને રાજસ્થાન જેવા રાજ્યોની કંપનીઓનો પણ સમાવેશ થાય છે. કોલકાતાની અકિન વિનકોમ, એડમાયર એક્સચેન્જ અને દિલ્હીની ગોલ સિક્યોરિટીઝ જેવી ઘણી જાણીતી કંપનીઓને પણ બ્લેકલિસ્ટ કરવામાં આવી છે. 

કાર્યવાહી વચ્ચે, કેટલીક કંપનીઓએ સ્વેચ્છાએ વ્યવસાય છોડી દેવાનો નિર્ણય લીધો છે. રિઝર્વ બેંકના જણાવ્યા અનુસાર, અશોક વિનિયોગ અને ગુરુ કૃપા ફિનવેસ્ટ સહિત ચાર કંપનીઓએ સ્વેચ્છાએ તેમના લાઇસન્સ પરત કરી દીધા છે, જેનાથી તેમના વ્યવસાયો બંધ થઈ ગયા છે.

દરમિયાન, આરઆર  હોલ્ડિંગ્સ અને અંજલિ કેપફિન જેવી કંપનીઓને હવે રિઝર્વ બેંકની નોંધણીની જરૂર નથી કારણ કે તેઓ અનરજિસ્ટર્ડ કોર ઇન્વેસ્ટમેન્ટ કંપનીઓ (CIC) ની શ્રેણીમાં આવે છે. વધુમાં, એચડીએફસી હોલ્ડિંગ્સ લિમિટેડનું લાઇસન્સ પણ રદ કરવામાં આવ્યું છે કારણ કે મર્જર પછી તેનું સ્વતંત્ર કાનૂની અસ્તિત્વ નથી.