વાહનમાં 'સુપર' કે 'પ્રીમિયમ' પેટ્રોલ નંખાવો છો? જાણો તેનો કોઈ ફાયદો છે પણ કે નહીં

Premium Petrol: તમે પેટ્રોલ પંપ પર વિવિધ ઇંધણ વિકલ્પો જોયા હશે. વિવિધ ઇંધણ વિકલ્પ એટલે પેટ્રોલ, ડીઝલ અને સીએનજી નહિ, પરંતુ પેટ્રોલ પંપ પર નોર્મલ પેટ્રોલ અને પ્રીમિયમ પેટ્રોલ. પ્રીમિયમ પેટ્રોલને હાઇ-ઓક્ટેન ફ્યુઅલ, એક્સ્ટ્રા માઇલ, સુપર ફ્યુઅલ વગેરે નામોથી પણ ઓળખવામાં આવે છે. તેમજ આ પ્રીમિયમ સાંભળીને જ સમજાય જાય કે આ ચોક્કસ મોંઘુ જ હશે. એવામાં પ્રશ્ન થાય કે નોર્મલ પેટ્રોલની સરખામણીમાં પ્રીમિયમ પેટ્રોલ કેટલું ફાયદાકારક છે અને કોને કોને વાપરવું જોઈએ?   

પ્રીમિયમ પેટ્રોલ શું છે?

જેમ વાહન જુનું થતું જાય છે તેમ તેના એન્જિનમાં કાર્બન ડિપોઝિટ એકઠા થવા લાગે છે, જે એન્જિનની કાર્યક્ષમતાને ઘટાડે છે, પરંતુ પ્રીમિયમ પેટ્રોલમાં રહેલા એક્સ્ટ્રા એડિટીક્સ આ કાર્બન ડિપોઝિટને સાફ કરે છે, જેથી એન્જિનની કાર્યક્ષમતા વધે છે અને સારી રીતે કામ કરે છે. 

તેમજ પ્રીમિયમ પેટ્રોલને હાઇ-ઓક્ટેન પેટ્રોલ કહેવા પાછળનું કારણ એ છે કે સામાન્ય પેટ્રોલમાં ઓક્ટેનનું લેવલ 87 સુધી હોય છે, જ્યારે પ્રીમિયમ પેટ્રોલમાં તે 91 થી 94 ની આસપાસ હોય છે. સામાન્ય શબ્દોમાં કહીએ તો પેટ્રોલમાં ઓક્ટેનનું પ્રમાણ જેટલું વધારે હશે, તે એન્જિનને ઓછું નુકસાન પહોંચાડશે. એવામાં જો એન્જિન સારી સ્થિતિમાં હોય તો વાહન પણ સારું માઈલેજ આપે છે. 

આથી એવું કહી શકાય કે પ્રીમિયમ પેટ્રોલ ઉપયોગી છે. પણ હવે પ્રશ્ન એ થાય કે શું તે દરેક કાર માટે ઉપયોગી છે. 

પ્રીમિયમ પેટ્રોલ શેના માટે છે?

ટેકનિકલ વિગતો પરથી, એ સમજી શકાય છે કે પ્રીમિયમ પેટ્રોલ ખરેખર સામાન્ય પેટ્રોલ કરતાં વધુ સારું છે. હવે તમારે આ પેટ્રોલ ભરાવવું જોઈએ કે નહીં, તે તમારા વાહ  પર આધાર રાખે છે. જો તમારી પાસે અલ્ટ્રા પ્રીમિયમ વાહન હોય તો તમારે પ્રીમિયમ પેટ્રોલનો ઉપયોગ કરવો જોઈએ. 

જો તમારી કારના મેન્યુઅલમાં ઓટો ઉત્પાદકે તમારી કારના એન્જિન માટે ફક્ત સામાન્ય પેટ્રોલનો ઉપયોગ કરવાની સલાહ આપી હોય, તો ભૂલથી પણ પ્રીમિયમ પેટ્રોલ ભરશો નહીં, આ એન્જિનને નુકસાન પહોંચાડી શકે છે.

તેમજ જો તમારું વાહન જૂનું હોય, તો પણ તમે પ્રીમિયમ પેટ્રોલનો ઉપયોગ કરી શકો છો. પરંતુ નવી કારમાં પ્રીમિયમ પેટ્રોલનો ઉપયોગ કરવાનો કોઈ મતલબ નથી.