NRI ખાતાઓની થાપણોમાં 10%નો વધારો, વર્ષમાં 16 બિલિયન ડોલર જમા

અમદાવાદ : નાણાકીય વર્ષ ૨૦૨૪-૨૫ ના ૧૨ મહિના દરમિયાન ભારતીયોએ બિન-નિવાસી ભારતીય (NRI) ખાતાઓમાં ૧૬.૧૬ બિલિયન ડોલર જમા કરાવ્યા છે. આ આંકડો ૨૦૨૩-૨૪ કરતા ૯.૯ ટકા વધુ છે. તે ગયા વર્ષે ૧૪.૭૦ અબજ ડોલર જમા થયા હતા. ભારતીયો દ્વારા વિદેશ મોકલવામાં આવેલા રેમિટન્સમાં ૬.૮૫%નો ઘટાડો થયો છે.

માર્ચ ૨૦૨૫ ના અંતમાં કુલ NRI થાપણો વધીને ૧૬૪.૭ બિલિયન ડોલર થઈ છે જે માર્ચ ૨૦૨૪ ના અંતમાં ૧૫૧.૯ બિલિયન ડોલર હતી. ફેબ્રુઆરી ૨૦૨૫ માં, થાપણો ૧૬૦.૩૩ બિલિયન ડોલર હતી. એનઆરઆઈ ડિપોઝિટ સ્કીમ્સમાં ફોરેન કરન્સી નોન રેસિડેન્ટ (FCNR) ડિપોઝિટ, નોન રેસિડેન્ટ એક્સટર્નલ (NRE) ડિપોઝિટ અને નોન રેસિડેન્ટ ઓર્ડિનરી (NRO) ડિપોઝિટનો સમાવેશ થાય છે. 

એપ્રિલ ૨૦૨૪થી માર્ચ ૨૦૨૫ દરમિયાન સૌથી વધુ રકમ FCNR (બેંક) અથવા FCNR (B) ખાતાઓમાં જમા કરવામાં આવી છે. રિઝર્વ બેંકના ડેટા અનુસાર, FCNR (બેંક) ખાતાઓમાં ૭.૧ બિલિયન ડોલર આવ્યા છે, જ્યારે એક વર્ષ પહેલાના સમાન સમયગાળામાં ૬.૩ બિલિયન ડોલર જમા કરવામાં આવ્યા હતા. માર્ચ ૨૦૨૫ના અંત સુધીમાં FCNR (B) ખાતાઓમાં ૩૨.૮ બિલિયન ડોલરની થાપણો હતી. 

નાણાકીય વર્ષ ૨૦૨૫માં ભારતીયોએ લિબરલાઇઝ્ડ રેમિટન્સ સ્કીમ  હેઠળ ૨૯.૫૬ બિલિયન ડોલર મોકલ્યા છે, જે નાણાકીય વર્ષ ૨૦૨૪ માં ૩૧.૭૩ બિલિયન ડોલરથી ૬.૮૫ ટકા ઓછા છે. આ ઘટાડો વૈશ્વિક અનિશ્ચિતતા, સ્થાનિક આવકમાં ધીમી વૃદ્ધિ અને ઊંચા આધારને કારણે થયો છે. આંતરરાષ્ટ્રીય મુસાફરીમાં વધારાને કારણે માર્ચ ૨૦૨૫માં વિદેશમાં રેમિટન્સ ગયા વર્ષના માર્ચની તુલનામાં ૧૦.૬૫ ટકા વધીને ૨.૫૫ બિલિયન ડોલર થયું હતું. માર્ચમાં આંતરરાષ્ટ્રીય મુસાફરી પર ખર્ચ ૧૨.૩ ટકા વધીને ૧.૧૨ અબજ ડોલર થયો હતો.