Gold Loan : હવે સોના પર વધુ લોન મળશે, નવા નિયમો પર RBI ગવર્નરે આપી અપડેટ

Gold Loan: મોનેટરી પોલિસી રિવ્યૂ મીટિંગ બાદ પત્રકારો સાથે વાત કરતા, RBI ગવર્નરે જણાવ્યું હતું કે 2.5 લાખ રૂપિયા સુધીની ગોલ્ડ લોન પર લોન-ટુ-વેલ્યુ (LTV) રેશિયો વધારીને 85% કરવામાં આવી રહ્યો છે, પરંતુ આ રકમમાં વ્યાજની રકમ પણ સામેલ હશે. જેથી એવું કહી શકાય કે હવે સોના પર વધુ લોન મળશે. અગાઉ ડ્રાફ્ટ રેગ્યુલેશનમાં LTV વધારીને 75% કરવાનો પ્રસ્તાવ હતો. જો કોઈ પાસે તેના સોનાનું બિલ ન હોય, તો પણ તે ગોલ્ડ લોન મેળવી શકશે. આ માટે એક ડિક્લેરેશન ફોર્મ ભરવાનું રહેશે. 

આ દરમિયાન RBI ગવર્નરે ખાતરી આપી હતી કે આ ફક્ત એક ડ્રાફ્ટ પ્રસ્તાવ છે. તેને લાગુ કરતા પહેલા સ્ટોકહોલ્ડર્સ સાથે ચર્ચા કરવામાં આવશે. આ ઉપરાંત, તેની અસરનું પણ એનાલિસિસ કરવામાં આવશે. આ પછી જ તેનો અમલ કરવામાં આવશે.

નવા નિયમો પર RBI ગવર્નરે આપી અપડેટ

RBI ગવર્નરે કહ્યું કે આ નિયમોમાં કંઈ નવું નથી. બધા જૂના નિયમોને તેમાં એકીકૃત કરવામાં આવી રહ્યા છે. કારણ કે કેટલીક સંસ્થાઓ આ નિયમોનું પાલન કરતી ન હતી, તેથી તેમને નવા નિયમો તરીકે રજૂ કરવામાં આવી રહ્યા છે.

નાણા મંત્રાલયે RBI ને 1 જાન્યુઆરી, 2026 થી આ નિયમો લાગુ કરવા કહ્યું છે. તેની ભલામણોમાં, નાણા મંત્રાલયે RBI ને નાની ગોલ્ડ લોન લેનારાઓને કોઈ સમસ્યા ન થાય તેનું ધ્યાન રાખવા કહ્યું હતું.

નાણા મંત્રાલયે ભલામણ કરી હતી કે આ પ્રસ્તાવિત માર્ગદર્શિકામાંથી 2 લાખ રૂપિયાથી ઓછી ગોલ્ડ લોન લેનારાઓને બહાર રાખવામાં આવે જેથી તેમને ઓછા સમયમાં લોન મળી શકે. 

આ પણ વાંચો: મસ્કને 'મોંઘો' પડશે ટ્રમ્પ સાથેનો વિવાદ! ટેસ્લાને એક જ દિવસમાં 152 અબજ ડૉલરનું નુકસાન

RBI ના ગોલ્ડ લોન ડ્રાફ્ટમાં શું કહેવામાં આવ્યું છે

RBI એ એપ્રિલમાં ગોલ્ડ લોન સંબંધિત ડ્રાફ્ટ જારી કર્યો હતો અને 12 મે સુધીમાં સ્ટોકહોલ્ડર્સ પાસેથી તેના પર સૂચનો માંગ્યા હતા. પ્રસ્તાવિત માર્ગદર્શિકામાં જણાવાયું હતું કે ગોલ્ડ લોન પર લોન-ટુ-વેલ્યુ (LTV) રેશિયો 75% થી વધુ ન હોવો જોઈએ. એટલે કે, લોનની રકમ ગીરવે મૂકેલા સોનાના મૂલ્યના 75% થી વધુ ન હોવી જોઈએ.