ભારે વરસાદ,ચક્રવાત મોન્થાને કારણે કપાસના ઉત્પાદનમાં 2% ઘટાડાની ધારણા

નવી દિલ્હી : વાવેતર વિસ્તારમાં ઘટાડો, ભારે વરસાદ અને ચક્રવાત મોન્થાને કારણે કપાસના ઉત્પાદન પર અસર થવાની ધારણા છે. ભારતમાં કપાસનું ઉત્પાદન ૨% ઘટીને ૩૦.૫ મિલિયન ગાંસડી થવાની ધારણા છે. દેશમાં ઓછા ઉત્પાદન અને શૂન્ય આયાત ડયુટીને કારણે, આ વર્ષે કપાસની આયાત રેકોર્ડ સ્તરે પહોંચી શકે છે.

કોટન એસોસિએશન ઓફ ઈન્ડિયા એ ૨૦૨૫-૨૬ કપાસની સિઝન માટે ૩૦.૫ મિલિયન ગાંસડી (દરેક ગાંસડી ૧૭૦ કિલોગ્રામ વજનની) કપાસનું ઉત્પાદન થવાનો અંદાજ લગાવ્યો છે, જે ગયા વર્ષે ૩૧.૨ મિલિયન ગાંસડી (દરેક ગાંસડી ૧૭૦ કિલોગ્રામ વજનની) હતી.

આ ઘટાડા પાછળના મુખ્ય કારણો ખેતરોમાં વધુ પડતો વરસાદ, કેટલાક વિસ્તારોમાં પૂર જેવી સ્થિતિ અને ચક્રવાત મોન્થાને કારણે પાકને થયેલા નુકસાનને આભારી છે.

કોટન એસોસિએશન મુજબ, ૨૦૨૫-૨૬માં કુલ કપાસનો પુરવઠો ૪૧૦.૫૯ લાખ ગાંસડી રહેવાની ધારણા છે, જે ગયા વર્ષના ૩૯૨.૫૯ લાખ ગાંસડી કરતા વધારે છે. આ મોટાભાગે સ્ટોક અને આયાતમાં વધારો થવાને કારણે છે.

સ્થાનિક ઉત્પાદનમાં ઘટાડો થયો હોવા છતાં, આયાતમાં નોંધપાત્ર વધારાથી કુલ પુરવઠામાં વધારો થવાની ધારણા છે. ઓક્ટોબર અને ડિસેમ્બર ૨૦૨૫ વચ્ચે આશરે ૩૦ લાખ ગાંસડી કપાસની આયાત થવાની ધારણા છે, જે ગયા વર્ષની સરખામણીમાં ત્રણ ગણો વધારો છે. 

આખા વર્ષ માટે આયાત ૪૫ લાખ ગાંસડી સુધી પહોંચી શકે છે, જે અત્યાર સુધીનો સૌથી વધુ છે. 

વર્ષના અંત સુધીમાં કપાસ પરની આયાત ડયુટી શૂન્ય હોવાથી, મિલોએ મોટા પ્રમાણમાં વિદેશી કપાસ બુક કર્યો છે. ગયા વર્ષે, જ્યારે ૧૧ ટકા ડયુટી અમલમાં હતી, ત્યારે વાર્ષિક આયાત ૪૧ લાખ ગાંસડી સુધી મર્યાદિત હતી.