બાંધકામ ખર્ચ વર્ષમાં 10-12% વધ્યો, હજી 8 ટકા વધવા સંભવ

મુંબઈ : ઇંટ, સિમેન્ટ, લોખંડ સહિતના કાચા માલની કિંમતો વધવાને કારણે મકાન-બિલ્ડિંગના બાંધકામનો સરેરાશ ખર્ચ છેલ્લા એક વર્ષમાં ૧૦થી ૧૨ ટકા વધ્યો છે અને હજી તેમાં ૮-૯ ટકા સુધીનો વધારો થઈ શકે છે.

એક અહેવાલ મુજબ સિમેન્ટ અને સ્ટીલ જેવા કાચા માલના ભાવમાં વધારો થવાને કારણે છેલ્લા એક વર્ષમાં હાઉસિંગ પ્રોજેક્ટના બાંધકામનો સરેરાશ ખર્ચ ૧૦-૧૨ ટકા વધી છે અને ડિસેમ્બર સુધીમાં તેમાં ૮-૯ ટકાનો વધારો થઈ શકે છે. 

છેલ્લા એક વર્ષમાં સપ્લાયમાં વિક્ષેપ પડતા ભાવ વધ્યા છે જેના લીધે રિયલ્ટી કંપનીઓ માટે બાંધકામનો સરેરાશ ખર્ચ ૧૦-૧૨ ટકા વધ્યો છે.

 સિમેન્ટ અને સ્ટીલ જેવી મુખ્ય સામગ્રીની કિંમતોમાં માર્ચ ૨૦૨૨ સુધીમાં વાર્ષિક ધોરણે ૨૦ ટકાથી વધારે વૃદ્ધિ છે. આ બાંધકામના કુલ ખર્ચમાં મુખ્ય હિસ્સો ધરાવે છે.   

અહેવાલ મુજબ જથ્થાબંધ ભાવનો ફુગાવો  અને મટીરીયલ કોસ્ટ બંનેમાં વધારો જોતા ડિસેમ્બર ૨૦૨૨ સુધીમાં બાંધકામ ખર્ચ હજી ૮થી ૯ ટકા વધી શકે છે.

માર્ચ ૨૦૨૨માં મકાન, ફ્લેટ જેવી રહેણાંક મિલક્તોના બાંધકામનો સરેરાશ ખર્ચ વધીને રૂ. ૨,૩૦૦ પ્રતિ ચોરસ ફૂટ થયો છે જે એક વર્ષ અગાઉ રૂ. ૨,૦૬૦ પ્રતિ ચોરસ ફૂટ હતો. આ બાંધકામ ખર્ચમાં જીએસટીનો સમાવેશ કરાયો નથી.