અમદાવાદ : પેસેન્જર વાહનો અને ટુ-વ્હીલર્સના ડીલર શિપમેન્ટમાં બે આંકડાનો વધારો નોંધાયો છે, જે જાન્યુઆરીમાં અત્યાર સુધીનું સૌથી વધુ વેચાણ છે. આ સૂચવે છે કે જીએસટી સુધારા પછી મળેલી ગતિ પાટા પર સડસડાટ દોડી રહી છે.
જાન્યુઆરીમાં પેસેન્જર વાહનોનું જથ્થાબંધ વેચાણ ૧૨.૬ ટકા વધીને ૪૪૯,૬૧૬ યુનિટ થયું છે, જ્યારે ટુ-વ્હીલરનું વેચાણ વાર્ષિક ધોરણે ૨૬.૨ ટકા વધીને ૧૯૨૫,૬૦૩ યુનિટ થયું છે. ડીલરોને ટુ-વ્હીલર શિપમેન્ટમાં સ્કૂટર્સે ૩૭ ટકાનો વધારો નોંધાવ્યો છે, જ્યારે મોટરસાઇકલમાં ૨૦ ટકાનો વધારો જોવા મળ્યો છે. જોકે, મોટરસાઇકલ એક ઉચ્ચ-વોલ્યુમ શ્રેણી છે, જે કુલ ટુ-વ્હીલર વેચાણમાં ૫૮ ટકાથી વધુ ફાળો આપે છે.
ઓટોમોબાઈલ્સ ક્ષેત્રની સંસ્થા સિયામે જણાવ્યું હતું કે, જાન્યુઆરી ૨૦૨૬માં પેસેન્જર વાહનો, ટુ-વ્હીલર અને થ્રી-વ્હીલર વાહનોએ જાન્યુઆરી ૨૦૨૫ની સરખામણીમાં બે આંકડામાં વૃદ્ધિ સાથે અત્યાર સુધીનું સૌથી વધુ જાન્યુઆરી વેચાણ નોંધાવ્યું હતું. ગયા વર્ષના જાન્યુઆરીની સરખામણીમાં થ્રી-વ્હીલર શ્રેણીમાં ૩૦.૨ ટકાનો મજબૂત વધારો જોવા મળ્યો હતો, જેમાં ૭૫,૭૨૫ યુનિટનું વેચાણ થયું હતું.
નવું વર્ષ સકારાત્મક રીતે શરૂ થયું છે, જે જીએસટી દરોમાં ઘટાડા બાદ માંગમાં સતત વધારો થવાને કારણે પાછલા ક્વાર્ટરમાં જોવા મળેલી મજબૂત ગતિને વિસ્તૃત કરે છે. એપ્રિલ-જાન્યુઆરી સમયગાળા દરમિયાન પેસેન્જર વાહન નિકાસ વાર્ષિક ધોરણે ૧૭.૬ ટકા વધીને ૭૪૭,૭૫૨ વાહનોની થઈ છે, જ્યારે ટુ-વ્હીલર નિકાસમાં ૨૩.૭ ટકાનો વધારો થયો હતો.
