અમારી દુકાનમાં મળશે જી-20, એટલે કે 20 પ્રકારના ગાંઠિયા
Updated: Nov 20th, 2022
- સ્માઇલ ઇન્ડેક્સ : વ્યર્થશાસ્ત્રી
- નેતાઓ ચૂંટાયા વગર ૨૦ પ્રકારના ગોટાળા મારે કે ટિકિટથી વંચિત રહીને બીજા માટે ૨૦ પ્રકારના ગાભા મારે એ પણ જી-૨૦ જ છે
વારા ફરતી વારો, તારા પછી મારો એ ક્રમમાં ભારતને જી-૨૦નું પ્રમુખપદ મળી ગયું છે, પણ ભારતની પ્રજાની લાઈફમાં તો પહેલેેથી કેટકેટલાંય પ્રકારના જી-૨૦ મોજુદ છે.
જેમ કે, અમદાવાદનો આઈસગોળા જી-૨૦ ગોળાની જાહેરાત કરી શકે. કોઈ પૂછે કે આ ગોળામાં ૨૦ શું છે તો એ કહેશે કે, 'જી-૨૦ એટલે બરફ પ્લસ સળી પ્લસ બીજી ૧૮ આઈટમો, જેમાં ચાર જાતના શરબત પણ છે.' અમદાવાદી ગ્રાહક સરવાળો માંડીને પૂછે કે બાકીની ૧૪ આઈટમો કઈ તો ગોળાવાળો કહેશે , 'બોસ, તમને ખબર પડે તો મને કહેજો, મને ખબર પડે તો હું કહીશ.'
ગોળાની લારી આસપાસ એકાદ ટીનેજરને પૂછો કે જી-૨૦ વિશે તારું શું કહેવું છે તો એ કતરાશે કે, 'વડીલ, તારું નહીં તમારું શું કહેવું છે એમ પૂછો. હું ૨૦-૨૦ ગ્રુપમાં એડમિન છું. એકસાથે ૨૦ ગૂ્રપમાં તમને વાયરલ કરી શકું કે બ્લોક કરી શકું એવી તાકાત છે મારી.'
કોઈ ગુજરાતી છોકરીને જી-૨૦ વિશે પૂછશો તો એ કહેશે, 'લે , તમને નથી?' ખબર ટાઈપના મનોભાવ સાથે કહેશે કે, 'જી-૨૦ એટલે અમારા તો ૨૦ ટાઈપનાં ગરબા સ્ટેપ્સ.' આપણે વળી દોઢડહાપણ ડહોળીએ કે નવ દિવસના નોરતાંમાં ૨૦ ટાઈપના સ્ટેપની શું જરૂર તો તમારાં જ્ઞાાનમાં વધારો કરી શકે કે, 'અમારે સ્કૂલ-કોલેજના ગરબા, જ્ઞાાતિના ગરબા, કોઈના મેરેજના ગરબા, ઉત્તરાયણના અગાશીએ કરવાના ગરબા એમ એક વર્ષમાં ૨૦ જગ્યાએ ને પ્રસંગે ગરબા કરવાના હોય, એમાં કોઈ સ્ટેપ રિપીટ ના કરાય, શું સમજ્યા?'
આ મેડમની સમજણ એમને મુબારક પણ એ જે પાર્ટી પ્લોટ કે ગ્રાઉન્ડ પર ગરબા ગાવા જતાં હોય ત્યાંના ગરબા ગાયકો કહી શકશે કે ,'અમારે મન તો જી-૨૦ એટલે એ ૨૦ હિટ ગરબા જેના આધારે અમે વષોનાં વર્ષો સુધી અમારું ગાડું ગબડાવે રાખ્યું છે.' આ ગરબા ગાયકોએ જોકે મનમાં ઓછું લાવવાની જરૂર નથી, કારણ કે અસ્સલના જમાનાની ગુજરાતી ફિલ્મોમાં પણ જી-૨૦ એટલે કે ૨૦ ગર્લ્સ એકસરખી ૨૦ ગાગર લઈને રાસડા લેતી હોય તે પ્રકારનાં ગીતો જ ચાલ્યાં કરતાં.
આવી ફિલ્મોવાળાઓએ વર્ષોનાં વર્ષો સુધી એક જ તેલમાં ભજીયાં, ગોટા, ગાંઠિયા, બુંદી બધું તળ્યે રાખ્યું એના પરથી યાદ આવે કે ડાકોરની બજારમાં અસ્સલ અમુકભાઈ તમુકભાઈના ગોટા અહીં જ મળે છે એવું ૨૦ દુકાન પર વાંચીએ તો આપણે જી-૨૦ છાપ ગોટાળે ચડી જઈએ કે આમાંથી અસ્સલ ભાઈ કયા. એમ તો આપણે ત્યાં ભાવનગર કે રાજકોટ અને હવે ઈવન અમદાવાદના ગાંઠિયાવાળાઓ પણ આ જી-૨૦ની રેસમાં એમ કહીને જોડાઈને શકે કે અમારે ત્યાં જી-૨૦ એટલે કે ૨૦ પ્રકારના ગાંઠિયા મળશે. જોકે, એવું કોઈ નહીં કહે કે આ ૨૦ પ્રકારના ગાંઠિયા સાથે ચટણી એક જ પ્રકારની એટલે કે આગલા દિવસના વધેલા વીસે વીસ પ્રકારના ગાંઠિયામાંથી જ બનાવેલી મળશે.
ગઈકાલના ગાંઠિયા વાટીને ચટણી પીરસતા ગાંઠિયાવાળાઓ કદાચ તેમની પ્રેરણા આપણા નેતાઓ પાસેથી લેતા હશે જેઓ ગઈકાલની જ જાહેરાતો, યોજનાઓ, પ્રોજેક્ટ્સને ચૂંટણી ભાષણોમાં વાટી વાટીને આપણને ચટણી તરીકે પીરસી દે છે અને આપણે પાછા હોંશે હોંશે એ બધી ચાટી પણ જઈએ છીએ.
બાકી નેતાઓ તો આપણે ત્યાં બે પ્રકારના હોય છે. એક તો ચૂંટાઈને જી-૨૦ એટલે કે ૨૦ પ્રકારના ગોટાળા કરી જાણે ને બીજા એ જેમને ટિકિટ ના મળી હોય એટલે વર્ષોનાં વર્ષો સુધી હરીફ પક્ષમાંથી આવેલા આયાતીઓ માટે જી-૨૦ એટલે કે ૨૦ પ્રકારના ગાભા માર્યા કરે. શું કહો છો?
સ્માઈલ ટીપ
કોઈપણ પ્રકારનું ચૂંટણી ભાષણ જી-૨૦ વગર અધૂરું ગણાવું જોઈએ, જી-૨૦ એટલે ૨૦ પ્રકારના ગપગોળા.