- સતત ચોથા દિવસે કમોસમી વરસાદની માર

- બરવાળામાં રાત્રે વીજળીના બિહામણાં કડાકા-ભડાકા સાથે વરસાદ

બોટાદમાં આજે મંગળવારે આખો દિવસ વાતાવરણ સ્વચ્છ રહ્યું હતું. ત્યારબાદ મોડી સાંજના સમયે વાતાવરણમાં એકાએક આવેલા પલટાને કારણે આકાશમાં વીજળીના ચમકારા શરૂ થયા હતા. તેની સાથે સુસવાટા મારતો પવન ફૂંકાતા ધૂળની ડમરીઓ ઉડી હતી. થોડીવારમાં જ પ્રથમ છાંટા વરસવાનું શરૂ થયા બાદ કરા વરસ્યા હતા. આશરે ૧૫થી ૨૦ મિનિટ સુધી કરાનો વરસાદ થયા બાદ ઝરમર છાંટા શરૂ રહ્યા હતા. બોટાદ પંથકમાં છેલ્લા ચાર દિવસથી કમોસમી વરસાદ વરસી રહ્યો હોવાથી ખેતીપાકોને નુકશાની થતાં ખેડૂતોની ચિંતામાં વધારો થયો છે.

બોટાદમાં કરા વરસાવ્યા બાદ બરવાળામાં રાત્રે સાડા નવ કલાક બાદ અચાનક જ વાતાવરણમાં પલટો આવ્યો હતો. તોફાની પવન અને વીજળીના કડાકા-ભડાકા સાથે કમોસમી વરસાદ શરૂ થતાંની સાથે જ વીજળી ડૂલ થઈ ગઈ હતી. કાન ફાડી નાંખે તેવા વીજ કડાકાથી લોકો ભયભીત થયા હતા.