અંકલેશ્વરના જૂની દીવી ગામે ગેસ રિફિલિંગ કૌભાંડ ઝડપાયું એક શખ્સની અટકાયત કરાઇ

અંકલેશ્વર તા.25 ડિસેમ્બર 2019 બુધવાર

અંકલેશ્વર તાલુકાના જૂની દીવી ગામે  શહેર પોલીસે જાહેરમાં  ગેસ રિફિલિંગ કૌભાંડ ને ઝડપી પાડી એક  શખ્સની અટકાયત કરી  ગેસના 40  બોટલ અને પીકઅપ ગાડી તેમજ અન્ય સાધન મળી રૂ.3.59   લાખ  નો મુદ્દામાલ કબ્જે કરી  કાર્યવાહી હાથ ધરી છે . 

 અંકલેશ્વર શહેર પોલીસ ને  જૂની દીવી ગામ પાસે આવેલા   ક્રિકેટ ગ્રાઉન્ડ પર ગેસ ની બોટલ માંથી અન્ય ખાલી ગેસ બોટલમાં ગેસ  રિફિલિંગ કરી રહ્યા  હોવાની મળેલી બાતમી ના   આધારે શહેર પોલીસ ની ટીમેં  જૂની દીવી ગામે ક્રિકેટ ગ્રાઉન્ડ  પર  દરોડા પાડતા સ્થળ ઉપર   પીકઅપ વાન  મળી આવી હતી .

જેમાં ગેસની ખાલી તેમજ ભરેલી બોટલ સાથે મૂળ રાજસ્થાનના અને  હાલ  કાપોદ્રા ગામ ની  મનમંદિર  સોસાયટી માં રહેતા  ધર્મરાજ જોતરામ રાજાણી નામનો શખ્સ  ગેસ રિફિલિંગ કરતા રંગે હાથો ઝડપાય ગયો હતો. 

પોલીસે તેની ધરપકડ કરી  રૂ.59,700  ની કિંમતના ગેસ ના ખાલી તેમજ ભરેલા 40 નંગ  બોટલ તેમજ   ૩ લાખ ની પીકઅપવાન  અને અન્ય  સાધનો  મળી કુલ 3.59.800 રૂપિયાનો  મુદ્દામાલ  કબ્જે  કર્યો હતો. પ્રાથમિક તપાસ દરમ્યાન  ભારત ગેસની બોટલ માંથી અન્ય ગેસ ની બોટલમાં ધર્મરાજ રાજાણી રીફીંલીગ કરતો હતો. શહેર પોલીસે ગુનો નોંધી વધુ તપાસ હાથ ધરી છે .