અંકોડિયા કેનાલમાં ડૂબેલા યુવકનો મૃતદેહ બહાર કાઢવા ફાયર બ્રિગેડની મદદ લીધી

Vadodara Fire Brigade : વડોદરા પાસેની અંકોડિયા કેનાલમાં ગઈકાલે યુવક ડૂબ્યો હોવાની આશંકા અને પગલે ફાયર દ્વારા શોધખોળ કરવામાં આવી હતી. આજે સવારે યુવકનો મૃતદેહ મળી આવતા તેને બહાર કાઢી પોસ્ટમોર્ટમ માટે હોસ્પિટલમાં લઈ જવાયો છે.
લક્ષ્મીપુરા વિસ્તારમાં રહેતો ગજેન્દ્ર નામનો 30 વર્ષીય યુવક ગઈકાલે ગુમ થઈ જતા શોધખોળ દરમિયાન અંકોડિયા કેનાલ પાસે બાઈક અને મોબાઈલ મળી આવ્યા હતા. જ્યારે થોડે દૂર ચંપલ પણ મળી આવ્યા હતા.
યુવકની ચાર કલાક સુધી શોધખોળ કરવામાં આવી હતી પરંતુ કોઈ પત્તો મળ્યો ન હતો. આજે સવારે તેનો મૃતદેહ તરી આવતા ફાયર બ્રિગેડને જાણ કરી બહાર કાઢવામાં આવ્યો હતો. ગોરવા પોલીસે આ બાબતે વધુ તપાસ હાથ ધરી છે. નોંધનીય છે કે ત્રણ દિવસ પહેલા પણ વડોદરાની ભીમપુરા કેનાલમાં બે વિદ્યાર્થી ડૂબી ગયા હતા.