અણીયોર પાસે માલપુર અને બાયડના બે નાયબ મામલતદાર દારૂના નશાની હાલતમાં ઝડપાયા

મોડાસા,તા.1

અરવલ્લી જિલ્લામાં કેટલાક સ્થળોએ થર્ટી ફર્સ્ટની ઉજવણીઓ હાથ ધરાઈ હતી. આ ઉજવણી ઉપર બાજ નજર માંડી બેઠેલ જિલ્લા પોલીસે માલપુર તાલુકાના અણીયોર ગામ નજીકથી દારૂ ઢેંચેલી હાલતમાં બે નાયબ મામલતદારો ઝડપાતાં ચકચાર મચી હતી. અરવલ્લી પોલીસે થર્ટી ફર્સ્ટની ઉજવણીને લઈ દારૂ પીધેલી હાલતમાં બે સરકારી કર્મીઓ સહિત કુલ ૩૬ જણાને જિલ્લાના જુદાજુદા પોલીસ સ્ટેશનોની હદમાંથી ઝડપી હવાલાતે કર્યા હતા.

અરવલ્લી જિલ્લાના ઈન્ચાર્જ પોલીસવડા બી.બી.બસીયાના માર્ગદર્શન હેઠળ જિલ્લાભરમાં પોલીસ દ્વારા બાજનજર ગોઠવી સ્પેશ્યલ ડ્રાઈવ યોજાઈ હતી.અને જિલ્લાના આંતર રાજય સરહદની ૧૦ ચેકપોસ્ટો ઉપર સઘન વિશેષ બંદોબસ્ત ગોઠવાયો હતો.જેમાં માલપુર તાલુકાના અણીયોર નજીક થર્ટી ફસ્ટની મધ્યરાત્રીએ એક પેટ્રોલપંપની પાછળ ખુલ્લી જૈગ્યામાં આવેલ ઓરડીમાં મહેફીલ માનતા બે નાયબ મામલતદારને પોલીસે દબોચી લીધા હતા.

જિલ્લાના ડીવાયએસપીને મળેલ બાતમીના આધારે માલપુર પોલીસ દ્વારા કરાયેલ રેડમાં માલપુર અને બાયડના નાયબ મામલતદાર જૈમીનભાઈ બાબુભાઈ પટેલ (રહે.તિરૂપતિ બંગ્લોઝ, મોડાસા) અને નિલેશભાઈ અરવિંદભાઈ પટેલ (રહે.રચનાપાર્ક સોસાયટી, મોડાસા)નાઓને દારૂ પીધેલ હાલતમાં ઝડપી હવાલાતે કરાયા હતા.

આ બંને સરકારી કર્મીઓ સામે માલપુર પોલીસ સ્ટેશને પ્રોહીબીશન એકટ હેઠળ ગુનો નોંધી કાયદેસરની કાર્યવાહી હાથ ધરાઈ હતી. જયારે અરવલ્લી જિલ્લા ઈન્ચાર્જ પોલીસવડા ભરત બસીયાના માર્ગદર્શન હેઠળ જિલ્લાની ૧૦ આંતર રાજય ચેકપોસ્ટે ખાસ બંદોબસ્ત ગોઠવી દારૂ ઢેંચી કે દારૂ ભરી જિલ્લામાં આવતા ૩૬ ઈસમો વિરૂધ્ધ ગુનો નોંધી કાર્યવાહી હાથ ધરાઈ હતી.