મોડાસા માર્કેટયાર્ડમાં સેસ કૌભાંડનો આક્ષેપ વેપારીઓએ રજૂ કરેલા બિલમાં વિસંગતતા

મોડાસા,તા. 26

મોડાસા માર્કેટયાર્ડ ખાતે કેટલાક વેપારીઓ દ્વારા યાર્ડમાં ફરજિયાત પણે ભરવી પડતી સેશની રકમથી બચવા કે ઓછી સેશ ભરવા ખોટા બીલ રજૂ કરાતાં હોવાનો આક્ષેપ ઉઠયો હતો.ખેડૂત એકતા મંચ દ્વારા આ પ્રકરણે કેટલાક વેપારીઓ દ્વારા ખેડૂતને અપાયેલ કાચા બીલ અને આજ વેપારીએ આજ ખેડૂતના યાર્ડમાં રજૂ કરેલા પાકા બીલની રકમમાં મસમોટો તફાવત આવતો હોવાનો આક્ષેપ કરી આ સેશ કૌભાંડ પ્રકરણે તપાસની માંગ કરી હતી.

મોડાસા માર્કેટયાર્ડમાં પણ રૃ.૧૦૦ ની ખરીદી ઉપર પરવાનેદાર વેપારીઓ પાસેથી ૬૫ પૈસે લેખે સેશ અંકે કરાય છે. પરંતુ  સેશ પેટે યાર્ડમાં જમા કરાવવાી પડતી મોટી રકમથી બચવા અને માર્કેટયાર્ડની આવકને ચૂનો લગાવવા યાર્ડના કેટલાક વેપારીઓ દ્વારા સેશ કૌભાંડ આચરવામાં આવતું હોવાનો આક્ષેપ ખેડૂત એકતા મંચના અગ્રણી નિકુલ પટેલ અને જિલ્લાના અગ્રણી રાહુલ ગામેતી દ્વારા કરાયો હતો.મોડાસા માર્કેટયાર્ડમાં આચરવામાં આવેલા કરોડો રૃપિયાના સેશ કૌભાંડમાં યાર્ડના કર્મીઓ પણ સંડોવાયેલા હોવાનો આક્ષેપ કરાયો હતો અને આ પ્રકરણે એસીબીમાં ફરીયાદ કરવાની ચીમકી ઉચ્ચારાતાં મોડાસા યાર્ડના વહીવટદારોમાં દોડધામ મચી હતી.  યાર્ડના કેટલાક વેપારીઓ દ્વારા ખેડૂતો પાસેથી ખરીદવામાં આવેલી જણસના ભાવ ખેડૂતને અપાયેલા કાચાબીલ (ચીઠ્ઠીમાં)અને યાર્ડમાં વેપારીઓ દ્વારા રજૂ કરાતાં પાકા બીલમાં મોટો તફાવત જણાતાં આવા કેટલાક પુરાવા પણ ખેડૂત એકતા મંચ દ્વારા ૧૦ થી ૧૫ બીલના રજૂ કરાયા હતા.

કઈ રીતે કરાય છે સેશની ચોરી ?

મોડાસા યાર્ડના તમામ લાયસન્સ ધારક વેપારીઓને યાર્ડ દ્વારા બીલ બુક અપાય છે. આ બીલ બુકની ત્રણ પ્રતમાંથી એક ખેડૂતને આપવાની હોય છે. એક વેપારીએ પોતાની પાસે રાખી એક પ્રત યાર્ડમાં જમા કરવાની રહે છે. અને આ બીલમાં જણાવેલ કુલ ખરીદ કિંમત મુજબ રૃ.૧૦૦ ની ખરીદીએ ૬૫ પૈસા લેખે સેશ યાર્ડમાં જમા કરાવવાની રહેશે. પરંતુ ખેડૂત એકતા મંચ દ્વારા રજૂ કરાયેલ પુરાવાઓમાં ખેડૂતને અપાયેલા કાચા બીલ એવી ચીઠ્ઠીમાં જણાવેલ ખરીદીની કુલ કિંમત કરતા વેપારી દ્વારા યાર્ડ કચેરીએ જમા કરાવેલ રકમમાં મોટો તફાવત જણાઈ આવ્યો હોવાનો આક્ષેપ કરાયો હતો.