- અલ્પવિરામ
- તમિલનાડુનું દિવ્યાંગ વ્યક્તિઓને રોજગાર આપવાનું પગલું દેશમાં આ પ્રકારનું પ્રથમ પગલું છે, જે હાંસિયામાં ધકેલાઈ ગયેલા સમુદાયને ઉત્થાન આપશે
વીતેલા ૨૦૨૪ના ગત વર્ષમાં અનુકૂળ ચોમાસુ રહ્યું અને લાંબા ગાળાની સરેરાશ કરતાં ૭.૬ ટકાનો વધારો જોવા મળ્યો. ભારતીય હવામાન વિભાગે તેની ચોમાસાની આગાહીમાં આ વખતે ફરી એકવાર સારા વરસાદની આગાહી કરી છે. તેનો અંદાજ છે કે ૨૦૨૫ માં દક્ષિણ-પશ્ચિમ ચોમાસાથી વરસાદ સામાન્ય કરતાં લગભગ પાંચ ટકા વધુ રહેશે. વિષુવવૃત્તીય પેસિફિક પ્રદેશ પરની પરિસ્થિતિઓ અને તટસ્થ અલ નીનો અસર અને લા નીના જેવી પરિસ્થિતિઓના નિર્માણને કારણે, એવી અપેક્ષા રાખવામાં આવે છે કે ભારતીય ઉપખંડમાં મજબૂત ચોમાસાનો પ્રવાહ વિકસિત થશે. જોકે, ચોમાસાનું વિતરણ એકસરખું રહેવાની અપેક્ષા નથી. બિહાર, તમિલનાડુ અને ઉત્તર-પૂર્વના કેટલાક વિસ્તારોમાં સામાન્ય કરતા ઓછો વરસાદ પડવાની શક્યતા છે.
સિંચાઈવાળા વિસ્તારમાં સુધારો થયો હોવા છતાં, દક્ષિણ-પશ્ચિમ ચોમાસામાં સુધારો કૃષિ ઉત્પાદન માટે મહત્ત્વપૂર્ણ છે. ્રરાષ્ટ્રીય આંકડાકીય કાર્યાલય દ્વારા જાહેર કરાયેલા GDPના બીજા એડવાન્સ અંદાજ મુજબ, કૃષિ અને સંલગ્ન ક્ષેત્રોનો વિકાસ દર ૨૦૨૪-૨૫માં ૪.૪ ટકા રહી શકે છે, જ્યારે ૨૦૨૩-૨૪માં તે ૨.૭ ટકા હતો. આ વર્ષે પણ સરેરાશથી વધુ વરસાદને કારણે એકંદર વિકાસ દરમાં વધારો થવાની ધારણા છે. સારું ચોમાસુ રવિ પાક માટે પણ ફાયદાકારક સાબિત થશે કારણ કે ભેજ વધશે અને જળાશયોમાં વધુ પાણી રહેશે.
ગયા વર્ષે થયેલા વધારાના વરસાદની ૨૦૨૪-૨૫માં કૃષિ ઉત્પાદન પર સકારાત્મક અસર પડી છે અને ખરીફ અને રવિ પાકના ખાદ્યાન્ન ઉત્પાદનમાં ગયા વર્ષની સરખામણીમાં અનુક્રમે ૭.૯ ટકા અને ૬ ટકાનો વધારો થવાનો અંદાજ છે. આનાથી ખાદ્યાન્નના ભાવ નિયંત્રણમાં રાખવામાં પણ મદદ મળી છે. હકીકત એ છે કે તાજેતરના ડેટા અનુસાર, દેશનો છૂટક ફુગાવાનો દર માર્ચમાં ૩.૩૪ ટકા હતો, જે ફેબુ્રઆરીમાં ૩.૬૧ ટકા કરતા થોડો વધારે હતો. આ દર ૨૦૧૯ પછીનો સૌથી ઓછો દર છે.
દરમિયાન, ખાદ્ય ફુગાવો, જેણે મુખ્ય ફુગાવાનો દર ઊંચો રાખ્યો છે, તે માર્ચમાં ઘટીને ૨.૬૯ ટકા થયો, જે ફેબુ્રઆરીમાં ૩.૭૫ ટકા હતો. નવેમ્બર ૨૦૨૧ પછી આ સૌથી નીચું સ્તર છે. સારા ચોમાસાને કારણે ખાદ્યાન્નના ભાવ નિયંત્રણમાં રહેશે. આનાથી નાણાકીય નીતિ સમિતિનું કાર્યક્ષેત્ર વધશે. જોકે, વૈશ્વિક અર્થતંત્રમાં વધતી અનિશ્ચિતતાને પણ ધ્યાનમાં લેવાની જરૂર છે. રિઝર્વ બેંકને ચાલુ નાણાકીય વર્ષમાં ફુગાવાનો દર સરેરાશ ચાર ટકા રહેવાની અપેક્ષા છે.
મધ્યમ ગાળાના નીતિગત દ્રષ્ટિકોણથી, સામાન્ય કરતાં વધુ સારા વરસાદની આગાહી હોવા છતાં, આપણે આબોહવા પરિવર્તનના પડકારોને અવગણવા જોઈએ નહીં. ભારે ઝંઝાવાતી હવામાનની ઘટનાઓ સતત વધી રહી છે. સન ૨૦૨૪મા, દેશભરમાં ૩૬૫ દિવસમાં આવી ૩૨૨ ઘટનાઓ બની હતી. રિઝર્વ બેંકે તેના ચલણ અને નાણાકીય અહેવાલમાં ચોમાસાની અસ્થિરતા અને આબોહવા પરિવર્તનની લાંબા ગાળાની અસરો વિશે પણ વાત કરી છે જેમાં ક્લાઈમેટ ચેઈન્જ ભારત માટે નવી અને વધતી જતી ઉપાધિ રૂપે ગંભીર ચર્ચા કરવામાં આવી છે. ભારે ગરમી, ચોમાસાની અસ્થિરતા અને આબોહવા પરિવર્તન, આ ત્રણેય મળીને દેશના અર્થતંત્રને અસર કરશે અને GDPમાં બે ટકા સુધીનો ઘટાડો લાવી શકે છે.
આને કારણે, સન ૨૦૫૦ સુધીમાં દેશની અડધી વસ્તીના જીવનધોરણ પર અસર પડશે. જો આનો સામનો કરવા માટે બહુપક્ષીય અને સર્વગ્રાહી નીતિ અપનાવવામાં નહીં આવે તો આવી ઘટનાઓની અસર વધશે.
તામિલનાડુમાં દિવ્યાગ
કર્મચારીઓની સંખ્યા વધશે
ઐતિહાસિક ભૂલો અને પ્રણાલીગત વંચિતતાને સુધારવા માટે હકારાત્મક પગલાં સૌથી અસરકારક રીતોમાંની એક છે. તમિલનાડુમાં વિકલાંગ વ્યક્તિઓ સામેના ઊંડા મૂળિયાવાળા ભેદભાવને દૂર કરવાના તાજેતરના પ્રયાસની સમુદાય પર દૂરગામી અસર થવાની શક્યતા છે. મુખ્યમંત્રી એમ.કે. સ્ટાલિને રાજ્યની તમામ સ્થાનિક સંસ્થાઓમાં અપંગ વ્યક્તિઓની સંખ્યા વધારવા માટે ગયા અઠવાડિયે વિધાનસભામાં બે બિલ રજૂ કર્યા.
તમામ નગર પંચાયતો, મ્યુનિસિપલ કાઉન્સિલો અને મ્યુનિસિપલ કોર્પોરેશનોમાં અપંગ વ્યક્તિઓના નામાંકનની જોગવાઈ કરવા માટે તમિલનાડુ શહેરી સ્થાનિક સંસ્થાઓ અધિનિયમમાં સુધારો કરતું બિલ, બીજા બિલમાં તમિલનાડુ પંચાયત કાયદામાં સુધારો કરીને તમામ ગ્રામ પંચાયતો, પંચાયત સંઘ પરિષદો અને જિલ્લા પંચાયતોમાં અપંગ વ્યક્તિને નોમિનેટ કરવાના નિર્ણયને કાયદેસર બનાવવામાં આવ્યો છે. સ્ટાલિને કહ્યું કે એકવાર આ બિલો લાગુ થઈ ગયા પછી, શહેરી સ્થાનિક સંસ્થાઓમાં ૬૫૦, ગ્રામ પંચાયતોમાં ૧૨,૯૧૩, પંચાયત યુનિયનોમાં ૩૮૮ અને જિલ્લા પંચાયતોમાં ૩૭ અપંગ વ્યક્તિઓ માટે ગેરંટીકૃત જગ્યાઓ હશે. તેમણે ગૃહને જણાવ્યું કે હાલમાં આખા રાજ્યમાં મળીને કુલ શહેરી સ્થાનિક સંસ્થાઓમાં ફક્ત ૩૫ દિવ્યાંગ વ્યક્તિઓ છે.
આ પરિવર્તન આખરે તો વિકલાંગ વ્યક્તિઓનું ગૌરવ સુનિશ્ચિત કરવા અને કલંક અને ભેદભાવ દૂર કરવા ઉપરાંત, સમુદાયને સશક્ત બનાવશે અને પાયાના સ્તરે નિર્ણય લેવાની પ્રક્રિયામાં તેમના પ્રતિનિધિઓનો સમાવેશ કરશે. સરકારની ભૂમિકા તેના તમામ નાગરિકો સાથે સંલગ્ન રહેવાની છે, ખાસ કરીને એવા લોકો સાથે જેમને એવા અવરોધોનો સામનો કરવો પડી શકે છે જે તેમને બાકીની વસ્તી જેટલી સમાન તકોનો આનંદ માણતા અટકાવી શકે છે. બંધારણના ૭૩મા અને ૭૪મા સુધારા બાદ, જેમાં પંચાયતી રાજ સંસ્થાઓ અને શહેરી સ્થાનિક સંસ્થાઓમાં તમામ બેઠકોના એક તૃતીયાંશ મહિલાઓ માટે અનામત રાખવાની મંજૂરી આપવામાં આવી હતી, તમિલનાડુ સહિત કેટલાક રાજ્યોએ મહિલાઓનું પ્રતિનિધિત્વ ૫૦ ટકા સુધી વધારી દીધું હતું.
ત્યારથી, ઘણા હોબાળા અને લાંબા સમયથી ચાલતી લડાઈનો આખરે ૨૦૨૩માં ઉકેલ આવ્યો જ્યારે લોકસભા અને રાજ્ય વિધાનસભાઓમાં મહિલાઓ માટે ૩૩ ટકા અનામતની જોગવાઈ અંગે મહિલા અનામત કાયદો પસાર કરવામાં આવ્યો. આ કાયદાના અમલ પછી કરવામાં આવેલી વસ્તી ગણતરીના ડેટાના પ્રકાશન પછી આ જોગવાઈ અમલમાં આવશે. દરમિયાન, તમિલનાડુનું દિવ્યાંગ વ્યક્તિઓને રોજગાર આપવાનું પગલું દેશમાં આ પ્રકારનું પ્રથમ પગલું છે, જે હાંસિયામાં ધકેલાઈ ગયેલા સમુદાયને ઉત્થાન આપશે.
