ગેરકાયદે ખોદકામ કરતા ત્રણ મશીન સહિત ૧.૮૦ કરોડનો મુદ્દામાલ જપ્ત

જિલ્લા ભુસ્તર તંત્રની ટીમ દ્વારા ખાનગી જમીનમાં

કલોલના હાજીપુર ગામમાં ખોદાયેલી જમીનનો સર્વે કરીને એેક્સેવેટરના માલિકને દંડ ફટકારવામાં આવશે

ગાંધીનગર :  ગાંધીનગર જિલ્લામાં ખનિજ માફિયાઓ સામે સતત કડક કાર્યવાહી ચાલુ છે. ગ્રામ્યના રસ્તા તથા હાઇવે માર્ગો ઉપર ગેરકાયદે રેતીની હેરાફેરી કરતા તત્વોને પકડવામાં આવી રહ્યા છે તેવી સ્થિતિ વચ્ચે હવે ખાનગી જમીનમાં ગેરકાયદે ખોદકામ કરતા વ્યક્તિઓ સામે પણ કાર્યવાહી હાથ ધરી છે. ભુસ્તર તંત્ર દ્વારા તાજેતરમાં કલોલ તાલુકાના હાજીપુર ગામે ખાનગી જગ્યામાં બિનઅધિકૃત સાદી માટીના ખનનની ગેરકાયદેસર પ્રવૃત્તિ ઝડપાઈ હતી.

ગાંધીનગર જિલ્લાના ભુસ્તર તંત્રની ટીમ દ્વારા શનિવારે બપોરે આશરે ચાર વાગ્યે હાજીપુર ખાતે આકસ્મિક તપાસ હાથ ધરી હતી. તપાસ દરમિયાન, ખાનગી માલિકીની જગ્યામાં તાજું ખોદકામ કરાયેલું જણાયું હતું જેમાં ત્રણ હિટાચી એક્સેવેટર મશીનોનો ઉપયોગ થઈ રહ્યો હતો.આ ત્રણેય એક્સેવેટર મશીનો ભુસ્તર તંત્રએ જપ્ત કરી લીધું છે. એટલુ જ નહીં, આ મશીનોના માલિક પરેશભાઈ દેસાઈ દ્વારા બિનઅધિકૃત ખનન અને વહન કરવામાં આવતું હોવાનું જણાઇ આવતા તંત્રની ટીમ દ્વારા તાત્કાલિક કાર્યવાહી શરૃ કરી છે.

તંત્ર દ્વારા આ ત્રણેય મશીનોને સાંતેજ પોલીસ સ્ટેશન ખાતે સીઝ કરી દેવામાં આવ્યું છે. જેની કુલ કિંમત આશરે ૧.૮૦ કરોડ રૃપિયા છે. આ ઉપરાંત, બિનઅધિકૃત ખોદકામથી બનાવેલા ખાડાના જથ્થાની માપણી કરી, દંડની રકમની વસૂલાત માટે કાર્યવાહી શરૃ કરવામાં આવી છે.આ મશીન માલિકો સામે ગુજરાત મિનરલના નિયમો હેઠળ દંડકીય કાર્યવાહી હાથ ધરવામાં આવશે.