અમદાવાદના વાસણામાં કમકમાટીભરી ઘટના: 14મા માળેથી ઝંપલાવી યુવતીનો આપઘાત

Ahmedabad News :  અમદાવાદના ગુપ્તા નગર વિસ્તારમાં આવેલી જાણીતી સિદ્ધિવિનાયક બિલ્ડિંગમાં એક યુવતીએ આપઘાત કર્યાની ઘટના સામે આવી છે. અહીં બિલ્ડિંગના પાંચમા માળેથી એક અજાણી યુવતીએ પડતું મૂકીને આત્મહત્યા કરી લીધી છે. આ ઘટનાને પગલે પોલીસે તાત્કાલિક કાર્યવાહી હાથ ધરી છે, પરંતુ હજુ સુધી યુવતીની ઓળખ કે આપઘાતનું કારણ જાણી શકાયું નથી.

પ્રાથમિક માહિતી અનુસાર, આ દુઃખદ ઘટના સાંજે લગભગ 5:45 વાગ્યે બની હતી. યુવતી બિલ્ડિંગમાં પ્રવેશી હતી અને ગણતરીના સમયમાં જ તેણે આ અંતિમ પગલું ભર્યું હતું. આ કેસમાં પોલીસ માટે સૌથી મોટી મુશ્કેલી એ છે કે યુવતીએ બિલ્ડિંગના મુલાકાતી રજિસ્ટરમાં પોતાનું નામ પણ સ્પષ્ટ રીતે લખ્યું નહોતું, જેના કારણે તેની ઓળખ કરવી મુશ્કેલ બની છે. યુવતી રજિસ્ટરમાં એન્ટ્રી કરતી હોય એવા CCTV ફૂટેજ પણ સામે આવ્યા છે.

પોલીસે કરેલી તપાસમાં સામે આવ્યું છે કે યુવતીએ બિલ્ડિંગમાં પ્રવેશવા માટે જે કામ અર્થે આવવાનું જણાવ્યું હતું, તે સંબંધિત ઓફિસ પણ તે સમયે બંધ હતી. યુવતીએ આવું પગલું ભરવા માટે આ બિલ્ડિંગ અને સમયની પસંદગી શા માટે કરી તેની પણ તપાસ કરવામાં આવી રહી છે. શું તે જાણી જોઈને અહીં આવી હતી? શું તે કોઈ માનસિક તણાવ અથવા અંગત સમસ્યાઓથી પીડાઈ રહી હતી? આ તમામ સવાલોના જવાબ પોલીસ શોધી રહી છે.

આ ઘટનાની જાણ થતાં પોલીસની ટીમ તાત્કાલિક સ્થળ પર પહોંચી હતી અને યુવતીના મૃતદેહને પોસ્ટમોર્ટમ માટે ખસેડ્યો હતો. પોલીસે હાલમાં અકસ્માતે મોત (AD)નો ગુનો નોંધીને ઝીણવટભરી તપાસ શરૂ કરી છે.

પોલીસ અધિકારીઓએ જણાવ્યું હતું કે, "અમે યુવતીના મોબાઈલ ફોન અને આસપાસના સીસીટીવી ફૂટેજની ચકાસણી કરી રહ્યા છીએ, જેથી યુવતીની ઓળખ થઈ શકે અને તેના મોતનું ચોક્કસ કારણ જાણી શકાય. અમે એ દિશામાં તપાસ કરી રહ્યા છીએ કે યુવતી ક્યાંની રહેવાસી હતી અને તેણે આત્મહત્યા શા માટે કરી. યુવતીની ઓળખ થયા બાદ જ તેના પરિવારજનોને પૂછીને મોતનું કારણ જાણી શકાશે.