છઠ્ઠા નેશનલ વોટર એવોર્ડમાં ભારતમાં ભાવનગર મનપાએ બીજા ક્રમ મેળવ્યો

- ભારત સરકારના મીનીસ્ટ્રી ઓફ જલ શક્તિ વિભાગે એવોર્ડનું આયોજન કર્યુ હતુ 

- બેસ્ટ અર્બન લોકલ બોડી કેટેગરીમાં પ્રથમવાર એવોર્ડ પ્રાપ્ત કર્યો, ગુજરાતમાં એવોર્ડ મેળવનાર એકમાત્ર ભાવનગર મહાનગરપાલિકા 

ભારત સરકારના મીનીસ્ટ્રી ઓફ જલ શક્તિ વિભાગ દ્વારા સમગ્ર ભારતમાં છઠ્ઠા નેશનલ વોટર એવોર્ડમાં ભાગ લેવા માટે આ વર્ષના શરૂઆતમાં જાહેરાત કરી હતી, જેમાં ભાવનગર મહાનગરપાલિકાએ નોમિનેશન નોંધાવ્યુ હતુ, જેનું સરકાર દ્વારા આજરોજ પરિણામ જાહેર કરવામાં આવ્યુ છે. છઠ્ઠા નેશનલ વોટર એવોર્ડમાં બેસ્ટ યુએલબી (અર્બન લોકલ બોડી એટલે કે મહાનગરપાલિકા) કેટેગરીમાં ભાવનગર મહાનગરપાલિકાએ સમગ્ર દેશમાં બીજો ક્રમ પ્રાપ્ત કર્યો છે અને ગુજરાતમાંથી એવોર્ડ મેળવનાર એકમાત્ર મહાનગરપાલિકા ભાવનગર મહાનગરપાલિકા છે.

છઠ્ઠા નેશનલ વોટર એવોર્ડમાં દેશની ઘણી મહાનગરપાલિકાએ ભાગ લીધો હતો અને શહેરમાં પાણી વિતરણ વ્યવસ્થાને લગતા વિવિધ પેરામીટર્સનો મીનીસ્ટ્રી દ્વારા ડેટા મેળવવામાં આવ્યો હતો અને તેના આધારે કેન્દ્રીય ટીમ દ્વારા ગત જુન-૨૦૨૫ દરમિયાન વિઝીટ કરી તમામ સુવિધાઓનો સર્વે કરવામાં આવ્યો હતો. આ એવોર્ડ ભાવનગર મહાનગરપાલિકા દ્વારા પ્રથમવાર મેળવેલ છે અને દેશના રાષ્ટ્રપતિના હસ્તે આગામી તા. ૧૮ નવેમ્બરના રોજ નવી દિલ્લી ખાતે ભાવનગર મહાનગરપાલિકાને એવોર્ડ અને રોકડ પુરસ્કાર આપવામાં આવશે. પ્રથમવાર આ એવોર્ડ મળતા મહાપાલિકાના પદાધિકારીઓ અને અધિકારી-કર્મચારીઓમાં આનંદની લાગણી ફરી વળી છે.  

શહેરમાં પાણી વિતરણ વ્યવસ્થાને લગતા વિવિધ પેરામીટર્સ ધ્યાને લેવાયા 

છઠ્ઠા નેશનલ વોટર એવોર્ડમાં શહેરમાં પાણી વિતરણ વ્યવસ્થાને લગતા વિવિધ પેરામીટર્સ ધ્યાને લેવાયા હતા, જેમાં પાણી વિતરણ વ્યવસ્થા, પાણી વિતરણ માટેની ઉપલબ્ધ અને પ્રગતિ હેઠળની સુવિધાઓ, જળસંચય અને જળ સંરક્ષણ, પાણીની ગુણવત્તામાં સુધારો, રીસાયકલિંગ અને રી-યુઝ ઓફ વેસ્ટવોટર, સ્ટોર્મ વોટર મેનેજમેન્ટ, સંશાધનોનો મહતમ ઉપયોગ અને તેના થકી આઉટપુટમાં વધારો, ગત વર્ષની સરખામણીએ આ વર્ષે કરવામાં આવેલ વિવિધ સુધારાઓ અને મેળવવામાં આવેલ સિધ્ધિઓ, જનજાગૃતિ અને જન ભાગીદારી વધારવા માટેના પ્રયાસો વગેરે પેરમીટર્સનો સમાવેશ થાય છે.