- સેન્ડ આર્ટિસ્ટ સુદર્શન પટનનાયકે મુંબઈના બીચ પર લતા મંગેશકરનું ચિત્ર બનાવી તેમને વિશેષ શ્રદ્ધાંજલિ આપી

મુંબઈ, તા. 06 ફેબ્રુઆરી 2023, સોમવાર

આજે સ્વરા કોકિલા લતા મંગેશકરની પ્રથમ પુણ્યતિથિ છે. 6 ફેબ્રુઆરી 2022ના રોજ તેમનું અવસાન થયું હતું. તેમણે 92 વર્ષની વયે દુનિયાને અલવિદા કહી દીધું હતું. લતા દીદીના નિધનને એક વર્ષ થઈ ગયું હોવા છતાં પણ તેમની યાદો તેમના ચાહકોના દિલમાં હજુ પણ તાજી છે.

દાયકાઓ સુધી પોતાના અવાજથી દુનિયા પર રાજ કરનાર લતા મંગેશકરે પોતાની કારકિર્દી દરમિયાન ઘણા યાદગાર ગીતો આપ્યા છે. જો કે ગયા વર્ષે તેમનું અવસાન થતાં તેમના ચાહકોને મોટો આઘાત લાગ્યો હતો. હવે તેમની પ્રથમ પુણ્યતિથિ પર અમે તમને તેમની સાથે જોડાયેલી કેટલીક રસપ્રદ બાબતો વિશે જણાવીએ.

લતા મંગેશકરને ઝેર આપીને મારવાનો પ્રયત્ન કરવામાં આવ્યો હતો

વર્ષ 1963માં લતા દીદીને સ્લો પોઈઝન આપીને મારવાનો પ્રયાસ કરવામાં આવ્યો હતો. આ કારણે તેની તબિયત એટલી ખરાબ થઈ ગઈ હતી કે તે પોતે પણ મહિનાઓ સુધી પથારીમાંથી ઊઠી શકતી નહોતી. આમ છતાં તેને કોઈપણ ઉંડી અસર તેના અવાજની ઓળખને દબાવવામાં સફળ થઈ શકી નહોતી. લતા મંગેશકરે આ દર્દનાક ઘટનાને લઈને ઘણા સુપરહિટ ગીતો પણ આપ્યા છે. જોકે સ્વર કોકિલા જાણતી હતી કે ઝેર કોણે આપ્યું હતું પરંતુ કોઈ નક્કર પુરાવાના અભાવે તેણે તે નામ જાહેર નહોતુ કર્યું.

સ્વર કોકિલાને લગ્નમાં પરફોર્મ કરવું પસંદ નહોતું

લોકપ્રિય ગાયિકા લતા મંગેશકરને લગ્નમાં ગાવાનું પસંદ નહોતું. આમ કરવું તેમના સન્માનને ઠેસ પહોંચાડવા જેવું હતું. આ વાતનો ખુલાસો ખુદ તેમની બહેન આશા ભોંસલેએ કર્યો હતો. આશાએ જણાવ્યું હતું કે, દિવંગત ગાયિકાને એક હાઈ-પ્રોફાઈલ લગ્નમાં ગાવા માટે લાખો રૂપિયાની ઓફર કરવામાં આવી હતી જેને તેણે વિલંબ કર્યા વિના ફગાવી દીધી હતી કારણ કે આવું કરવું તેના આદર્શોની વિરુદ્ધ હતું.

તેઓ બીજી વખત લતા મંગેશકર બનવા નહોતા ઈચ્છતા

એક ઈન્ટરવ્યુ દરમિયાન સ્વરા કોકિલાને પૂછવામાં આવ્યું કે શું તેઓ ફરીથી જન્મ લે તો લતા મંગેશકર બનવા ઈચ્છશે? તેના પર તેમણે કહ્યું હતું કે બીજો જન્મ ના મળે તો સારુ પરંતુ જો બીજો જન્મ મળે તો તે ક્યારેય લતા મંગેશકર બનવા માંગશે નહીં. કારણ કે લતા મંગેશકરે જે સંઘર્ષો, મુશ્કેલીઓનો સામનો કર્યો છે તે માત્ર તે જ જાણે છે. તે જાણીતું છે કે લતા મંગેશકરનું જીવન બાળપણથી લઈને અંતિમ શ્વાસ સુધી મુશ્કેલીઓથી ભરેલું હતું. ખૂબ નાની ઉંમરે તેમણે તેના ખભા પર ઘરની જવાબદારીઓનો બોજ ઉઠાવવો પડ્યો હતો.

લતા મંગેશકરની પ્રથમ સેલેરી 25 રૂપિયા હતી

પિતાના નિધન બાદ આર્થિક તંગીના કારણે લતા મંગેશકરે પ્રથમ વખત ફિલ્મ ઈન્ડસ્ટ્રીમાં કામ કર્યું હતું. એક ફિલ્મમાં તેમણે નાનો રોલ કર્યો હતો અને ફિલ્મનું ગીત 'નટલી ચેન્નાચી નવલાઈ'નો પોતાનો અવાજ આપ્યો હતો. ગીત ગાવા માટે તેમને 25 રૂપિયા મળ્યા હતા જ્યારે અભિનય કરવા માટે 300 રૂપિયા સેલેરી મળી હતી.

લતા મંગેશકરે 36 ભાષાઓમાં 50 હજારથી વધુ ગીતોને પોતાનો અવાજ આપ્યો 

મધુર અવાજ માટે પ્રખ્યાત લતા મંગેશકરે પોતાના જીવનમાં લગભગ 36 ભાષાઓમાં ગીત ગાયા છે. પોતાના 8 દાયકાના કરિયરમાં તેમણે 50 હજારથી વધુ ગીતોને પોતાનો અવાજ આપ્યો છે. 

આજે અનેક સેલેબ્સ લતા મંગેશકરને શ્રદ્ધાંજલિ આપી રહ્યા છે. ત્યારે સેન્ડ આર્ટિસ્ટ સુદર્શન પટનનાયકે મુંબઈના બીચ પર લતા મંગેશકરનું ચિત્ર બનાવી તેમને વિશેષ શ્રદ્ધાંજલિ આપી છે.