વડોદરાથી શિરડી, શિરપુર, માલેગાંવ જતી એસ.ટી. બસનો પ્રવાસ ફક્ત સાપુતારા સુધી

-ઔરંગાબાદથી વડોદરા પરત આવતી બસ ચાલીસગાંવમાં અટવાઈ

વડોદરા, તા.3 જાન્યુઆરી 2018,બુધવાર

મહારાષ્ટ્રમાં ગઈકાલે ' કોરેગાંવ' ઉજવણીમાં દલિતો- મરાઠા વચ્ચે થયેલી હિંસક અથડામણના પડઘારૃપે વડોદરાથી મહારાષ્ટ્ર જતી એસ.ટી. બસ ગાડીઓને રસ્તામાં જ રોકી લેવી પડતા પ્રવાસીઓને અધવચ હાલાકીઓનો સામનો કરવો પડયો છે.

પ્રાપ્ત વિગતો અનુસાર ૨૦૦ વર્ષ અગાઉ પૂણેમાં, ભારતના તત્કાલીન શાસકો અંગ્રેજો સાથે મળીને દલિતોએ મરાઠી પેશ્વા શાસકો સામે લડેલા યુધ્ધમાં દલિતો અને અંગ્રેજોનું સંયુક્ત જૂથ જીત્યુ હતુ.

ગઈકાલે આ વિજયને ૨૦૦ વર્ષ થયા હોઈ દલિતો એની ઉજવણી કરી પરત ફરી રહ્યા હતા. ત્યારે રસ્તામાં મરાઠાઓ સાથે ઘર્ષણ થયુ હતુ. જેમાં એક દલિત યુવકનું મોત થયુ હતુ. આ પછી બંને જૂથો વચ્ચે મોટા પાયે હિંસા ફાટી નિકળી હતી

મહારાષ્ટ્રની આ અશાંત પરિસ્થિતિની વિપરિત અસરરૃપે ગુજરાત રાજય માર્ગ વાહન વ્યવહાર નિગમ (એસ.ટી.) ના વડોદરા ડિવિઝનમાંથી ઉપડતી મહારાષ્ટ્રના વિવિધ સ્થળોની બસગાડીઓને અધવચ રોકી લેવી પડી છે.

વડોદરા સેન્ટ્રલ ડેપોથી મહારાષ્ટ્રના શિરડીની બે શિરપુરની એક અને માલેગાંવની એક બસ ઉપડે છે. આ બધી બસને ગઇ કાલે ઊભી થયેલી અશાંતિ પછી સાપુતારા (જિલ્લો ઃ ડાંગ) ખાતે રોકી લેવામાં આવી રહી છે. સાપુતારાથી આગળના પ્રવાસની ટિકિટના નાણાં, પ્રવાસીઓને વડોદરા ડેપોમાંથી રીફંડ કરી દેવાયા છે. સાપુતારા અને મહારાષ્ટ્ર વચ્ચે લગભગ ૭૦ કિલોમીટરનું અંતર છે.

પાદરા ડેપોની એક બસ વડોદરાથી શગાંવ વચ્ચે દોડે છે. આ ગાડીને સોનગઢ (જિલ્લોઃ સુરત) ખાતે રોકી લેવાય છે, જે મહારાષ્ટ્ર સરહદથી લગભગ ૪૦૦ કિલોમીટરના અંતરે છે. એ જ રીતે, કરજણ ડેપોની એક બસ વડોદરાથી ઔરંગાબાદ વચ્ચ દોડે છે.

અગાઉ, ઔરંગાબાદ પહોંચેલી બસ ગઇકાલે વડોદરા પરત આવી રહી હતી. ત્યારે માર્ગમાં અશાંતિના પરિણામે એને મહારાષ્ટ્રના ચાલીસગાંવ (જિલ્લોઃ જલગાંવ) ખાતે અટકાવી દેવાઇ છે.મહારાષ્ટ્રની પરિસ્થિતિ થાળે નહિ પડે ત્યાં સુધી બસ-પરિવહન સંબંધી ઉપરોક્ત વ્યવસ્થા અમલી રહેશે.