Last Update : 27-October-2012, Saturday

 

પડકારો ભલે જૂના હોય પરંતુ બાળાસાહેબ સક્રિય ન હોય તો શિવસેના માટે એ જ પડકારો ચાર ગણા કાતિલ થઈ જાય
બાળ ઠાકરે વગરની સેના ઃ વાઘના મ્હોરા હેઠળની લાચારી

શરદ પવાર અને રાજ ઠાકરે જેવા ખેલાડીની રાજરમત સામે ઊભા રહેવું એ બાળાસાહેબની ગેરહાજરીમાં ઉદ્ધવ અને આદિત્ય માટે શેરીના ક્રિકેટરને લસિત મલિંગાના યોર્કર જેવું લાગવાનું છે

હિન્દુ સંસ્કૃતિમાં વિજયાદશમીના પર્વે સિમોલ્લંઘનનો અનેરો મહિમા ગણાય છે. બદલાયેલા પરિદૃશ્યમાં જોકે સીમાઓ જ ઘરના આંગણાને બાદ કરતાં એકમેકમાં ભળી ચૂકી છે કે ઉલ્લંઘન કરવાનો વિચાર જ હવે અપ્રસ્તુત બની ગયો છે. ભૌગોલિક સીમાડાઓ લાંઘવા માટે ઈઝરાયલ જેવું દબંગ જીગર જોઈએ અથવા તો ચીન જેવી દોંગી નીતિ.
આમ છતાં હિન્દુત્વની આણ લઈને ફરતાં સંગઠનો રા.સ્વ.સંઘ અને શિવસેના હજુ ય દશેરા અને સીમોલ્લંઘનની પરંપરા પાળવાનો પ્રયાસ કરતા રહે છે. સંઘ પ્રતિવર્ષ દશેરાના વિજયપથ સંચલન (વિજયના માર્ગે આગેકૂચ) તરીકે પરંપરા જાળવે છે તો શિવસેના એ દિવસે મુંબઈના દાદર વિસ્તારમાં શિવાજી પાર્ક ખાતે ભવ્ય રેલી યોજીને તીખા તમતમતાં ભાષણો વડે (સુરુચિની) સીમા લાંઘે છે. દાયકાઓની આ પરંપરામાં આ વર્ષે ઐતિહાસિક ફરક જોવા મળ્યો. શિવસેનાના સર્વેસર્વા બાળ ઠાકરેએ આ વખતે નાદુરસ્ત તબિયતના કારણે શિવાજી પાર્કની રેલીમાં હાજરી ન આપી અને રેકોર્ડેડ સંદેશા વડે સક્રિય રાજનીતિમાંથી નિવૃત્તિના સંકેતો આપ્યા. શિવસેના અને બાળ ઠાકરે છેલ્લાં છ દાયકાથી જે રીતે પરસ્પરના પૂરક બની રહ્યા છે એ જોતાં ઠાકરેની નિવૃત્તિ શિવસેના અને મહારાષ્ટ્રના રાજકારણમાં અનેક નવા પ્રવાહો, નવા સમીકરણોની માંડણી કરી શકે છે. મહારાષ્ટ્રની રાજનીતિમાં ઠાકરેનું હોવું અને ન હોવું એ બંને બાબતો આજના અને આવતીકાલના રાજકારણ માટે મહત્વપૂર્ણ છે. શિવસેનાનો મુખ્ય જન-આધાર મરાઠા, બ્રાહ્મણો અને માવળી જાતિ પર રહ્યો છે. લગભગ દરેક ત્રીજો મુંબઈગરો કોઈને કોઈ તબક્કે શિવસેનાનો કટ્ટર સમર્થક રહી ચૂક્યો છે અને શિવસેના કરતાં ય વિશેષ તો બાળ ઠાકરે પ્રત્યે આજે પણ આદરભાવ ધરાવતો હોય એવા સંજોગોમાં બાળ ઠાકરેની નિવૃત્તિ પછી સેનાના વાઘની હાલત કેવી થશે? તેની ત્રાડ અકબંધ રહેશે કે એ દાંત-ન્હોર વિનાનો થઈ જશે?
દર વર્ષે શિવાજી પાર્કની દશેરા રેલીમાં બાળ ઠાકરે અજબ ચેતનાથી ઊભરાતા જોવા મળતાં રહ્યા છે. શિવાજી પાર્કની આ રેલીનું પરંપરાગત શિવસૈનિકોને મન એટલું મહત્વ હોય છે કે ખાસ બાળ ઠાકરેને સાંભળવા માટે આજે સિત્તેર-એંશીની ઉંમરે પહોંચેલા બુઝુર્ગો પણ બબ્બે કલાક તડકામાં, ભીડમાં ઊભા રહેતા હોય છે. બાળ ઠાકરે વર્ષ દરમિયાન ફક્ત તેમના પક્ષના મુખપત્ર 'સામના'માં જ ગર્જ્યા હોય અને ભાગ્યે જ જાહેરમાં દેખાયા હોય તો પણ શિવાજી પાર્કની રેલીમાં તેઓ અત્યંત ઉગ્ર, વેધક અને અણિયાળા ભાષણ કરતાં હોય છે.
તેના બદલે આ વર્ષે બાળ ઠાકરે ફક્ત રેકોર્ડેડ સંદેશો મોકલી દે અને તેમાં પરંપરાગત શિવસૈનિકોને હવે વાઘની ત્રાડને બદલે છછૂંદરના સિસકારા જેવું અનુભવાયું છે. ઠાકરેએ તેમના રેકોર્ડેડ સંદેશમાં કોંગ્રેસને રાબેતા મુજબ બરાબર ભાંડી લીધી. પંજાના પાંચ આંગળા તેમણે ઠાકરે સ્ટાઈલમાં ગણાવીને સોનિયા, રાહુલ, પ્રિયંકા, રોબર્ટ ઉપરાંત અહેમદ પટેલને ય ઝપટે લઈ લીધા. એ સિવાય રાજ્યમાં તેમના કાયમી હરીફ શરદરાવને ય ઝાટકી નાંખ્યા. શિવસૈનિકોને તેમણે એકજૂટ અને શિવસેના પ્રત્યે વફાદાર રહેવા તેમજ અત્યાર સુધી મને ટેકો આપ્યો છે એમ જ (પુત્ર) ઉદ્ધવ અને (પૌત્ર) આદિત્યને પણ ટેકો આપતા રહેજો એવી અપીલ પણ કરી.
સ્વાભાવિક છે કે, આ એ બાળ ઠાકરે નથી જે સાઠ-સિત્તેરના દાયકામાં એક શબ્દ ઉચ્ચારતા હતા અને મુંબઈના આકાશમાંથી વાવાઝોડું પસાર થઈ જતું હતું. આ એ બાળ ઠાકરે હરગીઝ નથી જેમના એક એક શબ્દમાંથી ફેંકાતી આગ લાખો મુંબઈગરાના શરીરમાં વીજળીનો કરંટ પસાર કરી દેતી હતી. આ બાળ ઠાકરે તો ગિડગિડાતા હોય તેવું લાગે છે. ઉંમરના કારણે અસલી વાઘ પણ ઘરડા થાય ત્યારે શિથિલ પડી જતા હોય છે અને બીજાએ કરેલા શિકાર પર નભવા માંડતા હોય છે. ત્યારે વાઘનું મ્હોરું પહેરેલા બાળ ઠાકરે હવે મ્હોરું હટયા પછી વૃદ્ધ, બિમાર, અશક્ત અને લાચાર વર્તાઈ રહ્યા છે.
શિવસેના માટે અત્યારે સૌથી મોટો જે પડકાર છે એ બહારનો નથી પણ અંદરનો છે. શિવસેના મતદારોના જે સમૂહ પર વર્ચસ્વ ધરાવે છે એ જ મતદારો શરદ પવારની રાષ્ટ્રવાદી કોંગ્રેસના સમર્થકો છે. બાળ ઠાકરે જિંદગીભર કોંગ્રેસના કટ્ટર વિરોધી રહ્યા છે અને ગાંધી-નહેરુ પરિવારના વંશવાદને ભાંડવામાં તેમણે કદી કસર છોડી નથી. પરંતુ જ્યારે તેમના પોતાના જ પક્ષનું સુકાન બદલવાનો વારો આવ્યો ત્યારે તેમણે વરિષ્ઠ નેતા તરીકે મનોહર જોશી કે છગન ભુજબળ કે નારાયણ રાણેને કદ પ્રમાણે વેતરવા માંડયા. ભુજબળ અને રાણે શિવસેનામાં રહીને પોતાનું ભવિષ્ય કદી પણ ઉજળશે નહિ તેવું વહેલા પામી ગયા અને પક્ષ છોડી ગયા. મનોહર જોશીએ જિંદગીભર બીજા-ત્રીજા ક્રમે બેસવામાં જ સંતોષ માની લીધો. પરંતુ ઠાકરેને તેમના જ ભત્રીજા રાજે પડકાર આપ્યો.
શિવસેનાના વારસ તરીકે ઉધ્ધવની પસંદગી સામે રાજે તીવ્ર વિરોધ નોંધાવ્યો અને છેવટે શિવસેના તેમજ માતોશ્રીનો ત્યાગ કરીને મહારાષ્ટ્ર નવનિર્માણ સેના ઊભી કરી. આજે હાલત એ છે કે, રાજ્યમાં મનસે પૂરતા પ્રમાણમાં કાઠું કાઢી ચૂકી છે. રાજ ઠાકરે દેખાવ અને ભાષણ કરવાની સ્ટાઈલ ઉપરાંત રાજકીય તડજોડ અને વ્યુહબાજીમાં પણ ખરા અર્થમાં બાળ ઠાકરેના વારસદાર છે. તેમણે શિવસેનાના જ મુખ્ય મુદ્દાઓ ઉપાડીને શિવસેનાને બુઠ્ઠી કરી નાંખી. આમચી મુંબઈથી ઊભી થયેલી શિવસેનાની માફક નવા જમાના પ્રમાણે એ જ મુદ્દાને નવો રંગ આપીને રાજ ઠાકરેએ મુંબઈ વિરુદ્ધ ઉત્તર ભારતનો રંગ આપી દીધો. એ મુદ્દો હળાહળ ખોટો હોવા છતાં રાજને ફક્ત રાજકીય માઈલેજ જોઈતું હતું, જે તેમને મળી ગયું. રાજનો બીજો માસ્ટર સ્ટ્રોક એ રહ્યો કે તેમણે પોતાની વોટબેન્ક મજબૂત બનાવવા માટે શરદ પવાર સાથે અને મહારાષ્ટ્ર કોંગ્રેસ સાથે બારણા પાછળનું સમાધાન જાળવી રાખ્યું. વિધાનસભા કે પરિષદ કે પંચાયતની ચૂંટણીમાં મોટાભાગની બેઠકો પર તેમણે એનસીપી સાથે અઘોષિત સમજૂતી રાખી. પરિણામે શિવસેનાના મતમાં ભાગ પડાવવામાં તેમને અણધારી સફળતા મળી અને આજે પાંચ વર્ષમાં હાલત એવી છે કે મહારાષ્ટ્રમાં મનસે ત્રીજા નંબરના શક્તિશાળી પક્ષ તરીકે ઊભરી ચૂકી છે. મનસેની આ સફળતા દેખીતી રીતે જ માતૃપક્ષ શિવસેનાના ભોગે છે. ભાજપ પણ હવે બાળ ઠાકરે નારાજ થવાનો ભય છોડીને રાજ સાથે ગુફતગુ કરી લે છે અને રાજ પણ પવન પારખીને ગુજરાતમાં નરેન્દ્ર મોદી, કર્ણાટકમાં અનંતકુમાર અને રાજસ્થાનમાં વસુંધરા રાજે સાથે દોસ્તી ઘનિષ્ઠ કરતા રહે છે.
છેલ્લા છએક મહિનાથી હવે એવો ઝોક જોવા મળે છે જેમાં રાજ અને ઉધ્ધવ એક થતા હોય તેવો માહોલ જણાય. ઉધ્ધવ ઠાકરેની અને પૂર્વે બાળ ઠાકરેની માંદગી વખતે લાંબા સમય પછી રાજ માતોશ્રીમાં જોવા મળ્યા અને જાતે ગાડી હાંકીને ઉધ્ધવને હોસ્પિટલથી ઘરે લઈ આવ્યા એ વખતે ઠાકરે પરિવાર પુનઃ એક થઈ રહ્યો હોવાની હવાને વેગ મળ્યો હતો પરંતુ એ પછી બીજા એવા કોઈ લક્ષણો જણાતા નથી. ઠાકરે પરિવાર એક થાય તેમાં કદાચ જો ફાયદો હોય તો હવે શિવસેનાને છે. રાજ તો પોતાનું કદ ખાસ્સું વધારી ચૂક્યા છે એ સંજોગોમાં તેઓ ઉધ્ધવનું નેતૃત્વ સ્વીકારીને પુનઃ શિવસેનામાં પ્રવેશ કરે તે શક્યતા નહિવત્ત છે.
આ સંજોગોમાં બાળ ઠાકરેની નિવૃત્તિ એ શિવસેના માટે વધુ એક મોટો ફટકો બની રહેશે એ નિશ્ચિત છે. અત્યાર સુધી તેમને શરદ પવાર જેવા ખેલાડીનો સામનો કરવાનો હતો. હવે તેમાં રાજ ઠાકરે જેવો ઘરનો જાણભેદુ પણ ઉમેરાયો છે. બાળાસાહેબ પોતે સક્રિય હોય ત્યારે જુદી વાત છે પણ બાળાસાહેબની ગેરહાજરીમાં ઉધ્ધવ અને આદિત્ય માટે તો આવા ખેલાડીની રાજરમત સામે ઊભા રહેવું એ શેરીના ક્રિકેટરને લસિત મલિંગાના યોર્કર જેવું લાગવાનું છે.

Share |
 

Gujarat Samachar Plus

ચીટિંગ કરનારા પર છૂપી જાસૂસી કરવા માટે 'ચીટ્સ એપ' થશે ઉપયોગી
ટ્રેન્ડી આઉટફીટ વીથ ટ્રેડિશનલ ટચ
ગુલાબી શિયાળાને રંગીન બનાવતા જેકેટ્સ
અજમાવો પાતળા રહેવાના સરળ ઉપાય
એક નૂર આદમી, હજાર નૂર કપડાંમાં તથ્ય છે
 

Gujarat Samachar glamour

પ્રિયંકાએ એકતા કપૂરની ફિલ્મ સાઇન કરી
દીપિકા 'રામલીલા'માં દેશી ગુજરાતી યુવતી બની છે
પાકિસ્તાનમાં 'જબ તક હૈ જાન' ઉપર પ્રતિબંધ...?
મેરા નંબર કબ આયેગા- રાની
રણબીરે એડ માટે ૨૦ કરોડ માંગતા કરાર કેન્સલ
 
 
 
 
 
 
 

Gujarat Samachar POLL

 

જસપાલ ભટ્ટી

 
webad3 lagnavisha
 

Follow Us

Facebook Twitter

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
• હવામાં ગોળીબાર • ઓનલાઇન
• ઇંટ અને ઇમારત • સિનેમેજિક
• મેરા ભારત મહાન • વિચાર વિહાર
plus
arc archive

Calendar 2012-13

પૂર્તિઓ

 
 
Gujarat Samachar © 2012 All Rights Reserved