Last Update : 02-September-2012, Sunday

 

સત્તાવાર બયાન સામે નવા પુસ્તકનો પડકારઃ લાદેન તો કમાન્ડોના આગમન પૂર્વે જ માર્યો ગયો હતો
લાદેનનું ભૂત ફરીથી અમેરિકાની ચોટલી મંતરે છે

ઓપરેશન અતિલામાં ભાગ લઈ ચૂકેલા કમાન્ડોના પુસ્તકમાં અનેક સ્ફોટક ઉલ્લેખ વિગતો છૂપાવતા અમેરિકાને કફોડી હાલતમાં મૂકી રહ્યા છેે

'હવેલીની છત પર અમે ઉતરાણ કર્યું ત્યારે કમ્પાઉન્ડ સહિત ક્યાંય ખાસ હલચલ ન હતી. છત પરથી નીચે જતી સીડી તરફ હું અને મારો એક સાથી આગળ વધ્યા જ્યારે વ્યૂહ પ્રમાણે બીજા કમાન્ડોએ બીજી દિશાએથી પ્રવેશ કરવાની કોશિષ આદરી. અમે સીડી ઉતરીને નીચેની તરફ એક સાંકડા પેસેજમાં પહોંચ્યા એ જ ઘડીએ એક રૃમનો દરવાજો બંધ થતો જણાયો. અમે તરત એ દિશામાં લપક્યા અને અંદર જોયું તો કોઈક સ્વિચ્ડ ઓફ કરીને અંદરની તરફ બીજા રૃમમાં જતું હતું. અમે તેની પાછળ દોટ મૂકી એ જ વખતે સાયલેન્સર ચઢાવેલી ગનનો હળવો થડકો સંભળાયો. અવાજની દિશામાં અમે આગળ ધપીએ એ પહેલાં બીજી આઠ-દસ ગોળીઓ ધડાધડ છૂટી. અમે રૃમમાં જઈને જોયું તો એ લોહીથી લથબથ હાલતમાં ભોંય પર ઢળી પડયો હતો અને બારી વાટે પ્રવેશેલા ત્રણ નેવી સીલ કમાન્ડો ગન તાકીને ઊભા હતા. ત્યાંનો સિનારિયો, કમાન્ડોની પોઝિશન અને લાશની હાલત જોઈને મને એવું લાગ્યું કે કમાન્ડો પ્રવેશ્યા એ પહેલાં જ લાદેનને તેની એકાદ પત્નીએ ગોળી મારી દીધી છે અથવા તો લાદેને જાતે જ પોતાના કપાળની વચ્ચે ગોળી મારીને આત્મહત્યા કરી લીધી છે.'
કોઈ થ્રિલર નોવેલના વર્ણન જેવું લાગતું આ બયાન જગતના સૌથી ખુંખાર આતંકવાદી ઓસામા બિન લાદેનને નશ્યત કરવા માટે અમેરિકા હાથ ધરેલા ઓપરેશન અતિલાનું છે. લાદેનના મૃત્યુને દોઢ વર્ષ થવા આવ્યું અને અમેરિકાએ ઓપરેશન અતિલા અંગે કટકે-કટકે સત્તાવાર બયાન પણ જારી કર્યા તેમ છતાં ય હજુ પણ એ ચર્ચાસ્પદ ઓપરેશનની કેટલીય વિગતો પરસ્પર વિરોધાભાસી અને ખૂટતી જણાય છે. પેન્ટાગોનના સત્તાવાર બયાન સિવાય ઓપરેશનમાં સામેલ એક સીલ કમાન્ડોએ ન્યૂયોર્ક ટાઈમ્સને આપેલી મુલાકાત પણ ઓપરેશન અતિલા વિશે માહિતી આપે છે. આશ્ચર્યજનક રીતે એ મુલાકાતમાં ઓસામાની આખરી ઘડી અને અંત વિશે જે કહેવાયું છે એ પેન્ટાગોનના સત્તાવાર બયાનથી વેગળું છે. હજુ એ વિશે અમેરિકાએ ખાસ સ્પષ્ટતા કરી નથી ત્યાં હવે 'નો ઈઝી ડે' નામનું એક નવું પુસ્તક આખો વિવાદ નવેસરથી ઊભો કરે તેવી શક્યતા વર્તાઈ રહી છે.
માર્ક ઓવેનના બનાવટી નામથી લખાયેલું આ પુસ્તક અબોટાબાદ પર આક્રમણ લઈ ગયેલી નેવી સીલ કમાન્ડો ટૂકડીના એક સૈનિકે લખ્યું હોવાનું કહેવાય છે અને પ્રકાશન સુધી તેની ઓળખ છાની રાખવાની તાકિદ હોવાનો પ્રકાશકોનો દાવો છે. જો આ પુસ્તકમાં વર્ણવાયેલી વિગતો ખરેખર નેવી સીલ કમાન્ડોએ જ લખી હોય તો પેન્ટાગોનના વડા લિયોન પેનેટ્ટા સહિત અનેક અધિકારીઓ બૂરી રીતે ફસાઈ શકે તેમ છે અને ખુદ અમેરિકન પ્રમુખ બરાક ઓબામા માટે પણ વૈશ્વિક સ્તરે નિવેદન કરવું પડે તેવી હાલત સર્જાઈ શકે છે. ખાસ કરીને ઈસ્લામિક દેશોમાં આ પુસ્તકના ઘેરા પ્રતિભાવો પડે તેવી શક્યતા છે.
ગત વર્ષે મે મહિનામાં ઓપરેશન અતિલાના સાંકેતિક નામ વડે પાકિસ્તાનના અબોટાબાદ સ્થિત હવેલી પર નેવી સીલ કમાન્ડો દ્વારા અત્યંત ગુપ્ત રીતે હુમલો કરીને અમેરિકાએ જગતના મોસ્ટ વોન્ટેડ ત્રાસવાદી ઓસામા બિન લાદેનને ઠાર મારી દીધો એ પછી ક્યાંય સુધી ઓપરેશનની વિગતો જગતથી છાની રાખવામાં આવી હતી. ઘટનાના મહિનાઓ પછી પહેલી વાર નવેમ્બર, ૨૦૧૧માં પેન્ટાગોને હુમલામાં વપરાયેલા હેલિકોપ્ટર, કમાન્ડોની સંખ્યા અને વેપન્સ વિશે માહિતી આપી. એ પછી ઓપરેશનના આયોજન, કન્ટ્રોલ ટીમ અને લાદેનની પ્રતિક્રિયા વિશે થોડીક માહિતી જાહેર કરી. પેન્ટાગોનના સત્તાવાર નિવેદન મુજબ, ત્રણ હેલિકોપ્ટરમાં નેવી સીલના કુલ ૨૮ કમાન્ડોની ટુકડીએ અબોટાબાદ સ્થિત હવેલી પર હુમલો કર્યો હતો. વ્યૂહ નક્કી થયા મુજબ ૧૮ કમાન્ડો હવેલીની છત પર ઉતર્યા હતા, જે પૈકી ચાર કમાન્ડોએ છત પર રહેવાનું હતું, ચાર કમાન્ડોએ કમ્પાઉન્ડમાં છલાંગ મારીને નીચેથી પ્રવેશ કરવાનો હતો અને ૧૦ કમાન્ડોએ છત પરથી અલગ અલગ દિશાએથી હવેલીમાં પ્રવેશ કરવાનો હતો.
સીઆઈએ અને પેન્ટાગોનના સંયુક્ત પ્રેસ બ્રિફિંગમાં સ્વયં લિયોન પેનેટ્ટાએ જાહેર કર્યા મુજબ અને અમેરિકાના સત્તાવાર દસ્તાવેજો મુજબ, હવેલીની છત પરથી અંદર પ્રવેશેલા કમાન્ડોએ એક રૃમનો દરવાજો ખખડાવ્યો ત્યારે લાદેને જાતે જ દરવાજો અધૂકડો ખોલ્યો અને પછી કિ-હોલમાંથી કમાન્ડોને જોઈને તે અંદરની તરફ ભાગ્યો. તેની પાછળ દોડેલા કમાન્ડોએ જોયું કે તે પલંગના ગાદલા નીચે છૂપાવેલ ગન કાઢવા જતો હતો એટલે કમાન્ડોએ પહેલાં તેને પડકાર્યો. તેમ છતાંય તેણે ગન ખેંચવા હાથ લંબાવ્યો એટલે કમાન્ડોએ કુલ ચાર ગોળી મારીને તેને ઢાળી દીધો.
લાદેન જેવો માનવ ઈતિહાસનો સૌથી વધુ શાતિર અને નૃશંસ હત્યારો ચાર ગોળીથી મર્યો હોય કે પંદર ગોળીથી, એ મર્યો એ જ પૂરતું હોય એટલે કમાન્ડોના પ્રથમદર્શી બયાન અને પેન્ટાગોનની સત્તાવાર જાહેરાત પર ભેદ હોય તો પણ કોઈને ખાસ ફરક પડવો જોઈએ નહિ. પરંતુ પુસ્તકમાં રજૂ થયેલી અન્ય કેટલીક બાબતો એવી છે જે અમેરિકા અને પાકિસ્તાનના સંબંધો વધુ તંગ કરી શકે તેમ છે આ ઉપરાંત પાકિસ્તાન સિવાયના અમેરિકાની તરફેણમાં રહેલા ઈસ્લામિક દેશોમાં પણ કચવાટ જગાવે તેમ છે. સત્તાવાર જાહેરાત મુજબ, લાદેનને નશ્યત કર્યા પછી તરત તેના મૃતદેહને ડયૂરોપ્લાસ્ટ વડે બનાવેલા કામચલાઉ કોફિનમાં વીંટાળી દેવાયો હતો અને પછી મૃતદેહ લઈને સમુદ્રમાં પધરાવવા માટે છ કમાન્ડો સાથેનું હેલિકોપ્ટર ઉપડી ગયું હતું. જ્યારે કે પુસ્તકમાં રજૂ થયેલી વિગતો એવી છે કે, લાદેનના મૃતદેહને જે હેલિકોપ્ટરમાં ચડાવાયો તેમાં કુલ ચૌદ કમાન્ડો હતા. હેલિકોપ્ટરમાં જગ્યા ઓછી હોવાથી એક કમાન્ડો મૃતદેહની છાતી માથે બેઠો હતો અને સંભવતઃ તેણે આ અત્યંત જોખમી છતાં એટલાં જ યાદગાર ઓપરેશનના સંભારણા તરીકે લાદેનની દાઢીના વાળ કાપી લીધા હતા. પુસ્તકમાં જોકે કોઈના નામનો સ્પષ્ટ ઉલ્લેખ નથી. આમ છતાં આ વિગતો એવી છે જે ઈસ્લામિક વિશ્વમાં ચચરાટ જગાવી શકે છે.
અમેરિકા સતત એવા ગીત ગાતું રહ્યું છે કે, લાદેનના મૃતદેહની પૂરી આમાન્યા જાળવવામાં આવી હતી અને તેની લાશને જળમાં દફનાવતા પૂર્વે પણ ઈસ્લામિક મર્યાદાઓનું પાલન કરવામાં આવ્યું હતું. એ પછી ન્યૂયોર્ક ટાઈમ્સમાં પ્રકાશિત થયેલી લેખમાળામાં પણ લાદેનની લાશ જોડે ચેડા થયા હોવાનો ઉલ્લેખ હતા.
અમેરિકાએ એવો પણ દાવો કર્યો હતો કે લાદેનની વિધવાઓની પૂરતી મર્યાદા જાળવવામાં આવી છે પરંતુ પુસ્તકમાં તેનો પણ એવો સ્ફોટક ઉલ્લેક છે કે, લાદેનને ઢાળી દીધા પછી તેની બે પત્નીઓ બહુ જ મોટા અવાજે રડી રહી હતી ત્યારે એક કમાન્ડોએ તેનો બુરખો ખેંચીને ચૂપ રહેવા ધમકાવી એ વખતે ખેંચતાણમાં બુરખો ફાટી ગયો હતો અને કમાન્ડોએ લાદેનની પત્નીને લાફો પણ વળગાડી દીધો હતો. આ ઉપરાંત પુસ્તકમાં થયેલા ઉલ્લેખ મુજબ, કમાન્ડોએ પાકિસ્તાનની સૈનિકો માટે આપસમાં મેડ ડોગ એવો સંકેત બનાવ્યો હતો. કમાન્ડો ઓપરેશન દરેક ટીમ સીધા પેન્ટાગોનના કન્ટ્રોલ રૃમ સાથે વાત કરી શકે તેવી વ્યવસ્થા હતી એ વખતે કન્ટ્રોલ રૃમમાંથી કોઈ એક સિનિયર વ્યક્તિ પાકિસ્તાન માટે ધેટ બાસ્ટર્ડ કન્ટ્રી એવો શબ્દપ્રયોગ સતત વાપરતા હતા અને અમને પાનો ચઢાવવા માટે પાકિસ્તાન અને ઈસ્લામિક આતંકવાદીઓ માટે ગંદી ગાળો બોલાતી હતી એવી પણ વાત કહેવામાં આવી છે.
વૈશ્વિક સમાચાર સંસ્થા એસોસિએટ પ્રેસ દ્વારા આ પુસ્તક વિશેની વિગતો બહાર લાવ્યા પછી અમેરિકાએ જોકે રાબેતા મુજબ આ પુસ્તકને અનિધકૃત ગણાવ્યું છે અને પોતાના સત્તાવાર નિવેદનને જ આખરી માનવા કહ્યું છે.
આમ છતાં પેન્ટાગોને આ પુસ્તકના લેખક તરીકે ક્યા સીલ કમાન્ડોએ નિયમનો ભંગ કરીને ગુપ્ત માહિતી જાહેર કરી છે તેની તલાશ આદરી દીધી છે અને તેની સામે શિસ્તભંગના પગલા ભરવા હુકમ કરી દીધા છે.
પુસ્તકમાં ઉલ્લેખાયેલી બાબતોને પેન્ટાગોન વેચાણ વધારવા માટેના ગપગોળા તરીકે ખપાવી રહ્યું છે પરંતુ કટકે-કટકે જાહેર થયેલી સત્તાવાર માહિતીઓ પોતે પણ જે પ્રકારે વિરોધાભાસ ધરાવે છે એ જોતાં ઓછી શંકાસ્પદ નથી. અમેરિકાનું સત્તાવાર બયાન જ જ્યારે શંકાસ્પદ હોય ત્યારે જાતભાતની સ્ટોરી મેદાનમાં આવવાની જ. આ સંજોગોમાં લાદેનના નામ પર ઈસ્લામિક શ્રદ્ધાને આંગળીચાળો કરવાનો ખેલ પણ થઈ શકે છે એ જોતાં ઓપરેશન અતિલા વિશે અમેરિકાએ સળંગ અને એકસૂત્રે સમગ્ર ઘટનાક્રમ વિશ્વ સમક્ષ લાવવો જ રહ્યો.

Share |
 

Gujarat Samachar Plus

ડ્રામા એટલે વ્યક્તિ એક, કેરેક્ટર અનેક
યંગસ્ટર્સ ટ્રેન્ડ ફોલોઅર નહીં પણ ટ્રેન્ડ સેટર
શહેરની ગર્લ્સમાં કેપ્રીનો કૂલ લૂક
બોયઝમાં છે શોર્ટ કુર્તા ઇનડિમાન્ડ
કલરફૂલ સ્પેક્સ વીથ ફન્કી લુક
 

Gujarat Samachar glamour

મારી કાર મારા માટે લકી છેઃઅભિ
આતંકી હુમલાની ફિલ્મનો સેટ જુહુમાં લાગશે
અક્ષયકુમારની નાની ભૂલથી મોટો છબરડો
‘લેરીમેનિયા’માં ગાયકોનું જીવન દર્શન
ચલતે... ચલતે...!
 
   
   
   
 
 
 

Gujarat Samachar POLL

 

Mid-Air Collision @ Jamanagar

 
webad3 lagnavisha
   

Follow Us

Facebook Twitter

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
 
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
• હવામાં ગોળીબાર • ઓનલાઇન
• ઇંટ અને ઇમારત • સિનેમેજિક
• મેરા ભારત મહાન • વિચાર વિહાર
 
plus
 

આજનું કાર્ટુન

arc archive

પૂર્તિઓ

 
 
Gujarat Samachar © 2012 All Rights Reserved