Last Update : 19-August-2012, Sunday

 
ધનની ખેરાત કરતાં નિઃસ્વાર્થ પ્રેમની ખેરાત લાખ દરજ્જે મોટી છે
કેમ છે દોસ્ત - ડૉ.ચન્દ્રકાન્ત મહેતા
- ''પારકી વાડીના છોડને હું પાણીથી નહીં, મારા રકતથી સિંચીશ, એની તમે ખાત્રી રાખજો.''- ડૉ. દલાલનો પરોપકાર

''મૌના, હજી ઘરનાં બધાં જ જમવાનાં બાકી છે, તું કેમ નાસ્તો કરવા એકલી બેસી ગઈ ?''
''અને શાકભાજી ખરીદવાનું કામ તને સોંપવામાં આવ્યું હતું, તેં નોકરને કેમ મોકલી દીધો.''
''કપડાંને ઈસ્ત્રી કરવાની જવાબદારી પણ તું જ સંભાળે છે ને ? પછી ધોબીને શું કામ બોલાવ્યો ?''
મૌનાની સાવકી માતા પ્રશ્નોની ઝડી વરસાવી રહી હતી અને એમની લાડકી દીકરી વાચા પૂરક માહિતી આપીને બળતામાં ઘી હોમવાનું કાર્ય કરી રહી હતી !
''મમ્મી, મને તાવ આવ્યો છે''- નું બહાનું કાઢી મૌના સ્કૂલમાંથી ઘેર આવી ગઈ ! ઉતાવળમાં નાસ્તાનું બોક્સ સ્કૂલમાં રહી ગયું એટલે સીધી રસોડામાં ઘૂસીને નાસ્તો કરવા લાગી. ''હેં મમ્મી, માંદું માણસ આવી રીતે ખાવા દોડે કે રજાઈ ઓઢીને સૂઈ જાય ?'' વાચાએ તેની મમ્મીને ઉશ્કેરાઈ જવાનો એક નવો મુદ્દો આપ્યો.
પણ વાચાની મમ્મી વસુધાએ વઢવાનો 'ક્વોટા' પૂરો કરી નાખ્યો હતો, એટલે વાચાએ આપેલી માહિતીમાં તેમને રસ ન પડયો.
મૌનાનું શરીર તપી રહ્યું હતું. માથામાં જાણે કોઈ હથોડાના ઘા કરી રહ્યું હોય તેવી પીડા થતી હતી. નજીકમાં જ ડૉક્ટર દલાલનું દવાખાનું હતું, પણ મૌના વસુધાને દવાખાને જવાનું પૂછવાની હિમ્મત કરી શકતી નહોતી ! વસુધા સાથે વાત કરવી એટલે વાઘણની બોડમાં હાથ નાખવા બરાબર હતું, એની મૌનાને ખબર હતી.
એટલામાં મૌનાના પપ્પા અભિજાત આવી પહોંચ્યા. મૌનાનું મોં જોઈને જ એમને ખ્યાલ આવી ગયો કે મૌના તાવમાં સપડાઈ છે. એમણે વસુધાને કહ્યું ઃ ''અરે ! મૌનાને દવાખાને લઈ જવાનું તને ન સૂઝ્યું ? આવી બેદરકારી ચાલે ?''
''એની દરકાર રાખનાર તમે બેઠા છો ને ? હું તેની દરકાર રાખું તો ય આખરે તો સાવકી માતા કહેવાઉંને ? સાવકીમાના હાથમાં જશરેખા નથી હોતી ! અને બીજવર પતિમાં જશ આપવા જેટલી ઉદારતા નથી હોતી ! મૌનાને મોં ખોલવાની આદત જ ક્યાં છે ? મીંઢી છે મીંઢી તમારી દીકરી ! જાઓ હવે, આદર્શ બાપની ફરજ બજાઓ. દીકરીને લઈને ડૉક્ટર પાસે દોડી જાઓ, એટલે તમારા આત્માને કળ વળે.'' વસુધાએ ઇંટનો જવાબ પથ્થરથી આપી દીધો.
કુદરતે જીભ તો સહુને આપી છે, પણ કોઈકને અમૃત સમાન અને કોઇકને વિષ સમાન શબ્દો વાપરવાની છૂટ આપવાનું શું કામ વિચાર્યું હશે ? અભિજાત મનોમન વિચારી રહ્યા હતા. નાનાં બાળકો પર વ્યંગ્યનાં વિષમય બાણ છોડવાં એ પણ એક અધમ પ્રકારની હિંસા છે, એ વાતનો ખ્યાલ વસુધા જેવી સ્ત્રીઓને કેમ નહીં આવતો હોય ?
અને અભિજાત મૌનાને પોતાની મોટર બાઈક પર બેસાડીને ડૉ. દલાલની ડિસ્પેન્સરીએ લઈ જાય છે. મૌનાને જોઈને ડૉ. દલાલ કહે છે ઃ ''મૌના, તારું શરીર ભગવાને રોગપ્રૂફ બનાવવું જોઈતું હતું ! વસુધા જેવી મમ્મીના સામ્રાજ્યમાં નરવા કે સાજાસમા રહેવું એ બાળકનું તો શું તારા પપ્પા જેવા આકરા પુરુષનું પણ કામ નથી !''
અને ડૉ. દલાલ હસતા-હસતા મૌનાને તપાસવાના કામમાં પરોવાયા.
મૌના ડૉક્ટર દલાલને પ્રિય હતી. તેના આરોગ્યનો સંપૂર્ણ રેકોર્ડ તેઓ રાખતા હતા. છેલ્લા ૬ માસમાં મૌનાનું વજન ૩ કિલો જેટલું ઘટયું હતું. તેઓ મૌનાનો રેકોર્ડ ધ્યાનથી જોવા લાગ્યા.
મૌનાની પરીક્ષાઓ હાથવેંતમાં હતી એટલે એમણે તાવને કાબૂમાં લેવા ઇંજેકશન આપ્યું, દવા પણ આપી અને મૌનાને ઘેર મોકલી દીધી. અભિજાતને એમણે રોકી રાખ્યા.
ડૉક્ટર કશું પૂછે એ પહેલાં જ એમણે કહ્યું ઃ ''તમે મારી સાથે શી ચર્ચા કરવાના છો, એની મને ખબર છે...મૌનાની મમ્મીએ મરતી વખતે મારી પાસે વચન માગ્યું હતું એટલે મારે વસુધા સાથે લગ્ન કરવું પડયું. પણ વસુધાના અસલી રૃપનો મને લેશમાત્ર અણસાર એના પિતાએ ન આવવા દીધો ! મૌનાને જોઈને વસુધાએ એની ઉપર ચૂમીઓનો વરસાદ વરસાવ્યો, ખોળામાં બેસાડીને વહાલ કર્યું, એ જોઈને મારા આનંદની સીમા ન રહી. મને લાગ્યું કે મારી દીકરી મૌનાને સગી માતાની ગરજ સારે એવી નવી મમ્મી મળી રહી છે ! ઝાડને જોઈને આપણે કહી શકીએ કે આ બોરડી છે અને આ બાવળ ! પણ માણસને મૂલવવાનાં આપણા માપદંડો મોટેભાગે ખોટા સાબિત થાય છે. ડૉક્ટર, જિંદગીએ મારી સાથે મજાક કરી છે... અને વાચાને જન્મ આપ્યા પછી તો વસુધાના વેરા-આંતરાએ માઝા મૂકી છે ! મારી મૌનાનાં યથા નામ તથા ગુણ છે ! સહિષ્ણુતામાં એનો જોટો જડે તેમ નથી ! વસુધા એને ડૂણ્યા જ કરે છે !''- અભિજાતના ગળે ડૂમો ભરાયો.
ડૉક્ટર દલાલે તેમને આશ્વાસન આપી સ્વસ્થ કર્યા અને કહ્યું ઃ ''મૌનાને લાગણી અને પ્રેમની જરૃર છે. નવી મમ્મીની નફરતની આગમાં આમ જ એ શેકાયા કરશે તો એની જિંદગી સામે ખતરો ઉભો થશે. તમે એને તેના નાના-નાનીને ઘેર મોકલવાનું વિચારો તો એને શાન્તિ મળશે. બીજો વિકલ્પ એને કન્યા છાત્રાલયમાં દાખલ કરવાનો છે.''
''બન્ને પૈકી એક પણ વિકલ્પ મને મંજૂર નથી ડૉક્ટર. હું મારી મૌનાનું મોં જોયા સિવાય જીવી શકું તેમ નથી ! દામ્પત્ય અને મૌના પ્રત્યેનું વાત્સલ્ય બન્નેમાંથી કોઈ પણ એકની પસંદગી કરવાની હોય તો હું મૌના પ્રત્યેના વાત્સલ્યને જ પસંદ કરું ! ડૉક્ટર, તમે એના સ્વાસ્થ્યની કાળજી રાખજો, બાકી બધું હું સંભાળી લઈશ. હું બીજવર ખરો, પણ બિચારો અને લાચાર બીજવર નથી ! મૌના ખાતર હું વસુધાને પાઠ ભણાવવાની પણ તૈયારી રાખીશ.''- મિ. અભિજાત ક્રોધમાં આવી ગયા.
ડૉ. દલાલે તેમને શાન્ત પાડયા અને દવાખાનું વહેલું બંધ કરી અભિજાત સાથે બગીચામાં જવા નીકળ્યા.
અભિજાતને પણ પોતાનું મન હળવું કરવા પ્રકૃતિની રળિયામણી ગોદની જરૃર હતી.
ડૉક્ટરના મનમાં મૌના માટેના જાતજાતના વિકલ્પોનું તોફાન ચાલતું હતું. ડૉ. દલાલ વ્યવસાયે તબીબ હતા, પણ સ્વભાવે સમાજસેવી. એમના સ્વભાવમાં કુદરતે મીઠાશ ઠાંસી-ઠાંસીને ભરી હતી. એમની પ્રેમાળ વાણી અને લાગણીભીનો સ્પર્શ દર્દીનું અડધું દર્દ આપોઆપ ઓછું કરવાનું ચમત્કારી કામ કરતો હતો. પોતાની આવકનો વીસમો ભાગ તેઓ દર્દીઓના કલ્યાણાર્થે ખર્ચતા હતા. તેઓ કહેતા ઃ ''ડૉક્ટર એટલે બીજી માતા. જેનું હૈયું કૂણું ન હોય એણે ડૉક્ટર ન થવું જોઈએ. ધન ધર્મને ભરખી જાય એવી કમાણી શા ખપની ?''
સહેજ અંધારું થયું એટલે પાર્કના વીજળી-દીવા ઝગમગી ઊઠયા...અંધકાર અદ્રશ્ય થઈ ગયું અને ડૉક્ટર દલાલના મનમાં એક વિચાર ઝબક્યો. એમણે અભિજાતને પૂછ્યું ઃ ''અભિજાત, મૌનાની ઉમ્મર કેટલી ?''
''અગિયાર વર્ષ. પણ તમારે એની ઉમ્મર જાણીને શું કામ છે ?''- અભિજાતે જિજ્ઞાાસાપૂર્વક પૂછ્યું...
''મતલબ કે મારી અને મૌનાની ઉમ્મરમાં ૪૦ વર્ષનો ફેર છે...હું એનો પાલક પિતા બનું તો ? દત્તક વિધાન માટે વાંધો આવે તેમ નથી.''- ડૉ. દલાલે કહ્યું...
''પણ આવો વિચાર તમને આવ્યો કેમ ? તમારી ઉમ્મર તો એકાવન વર્ષની થવા આવી. આ વિચાર તમારે વહેલો કરીને કોઇક નાની બાળકીને ગોદ લઈ લેવી જોઈતી હતી.-'' અભિજાતે કહ્યું.
''આમ તો અમારા ઘરમાં સંતાનની ખોટ છે. પરંતુ મારી પત્ની પુણ્યા કહેતી હતી કે મારે કોઈ બળી-જળી દીકરીને ઠારવી છે...અનેક વિધુરોની પુત્રીઓ સાવકી માતાના ત્રાસની ફરીયાદ કરતી હોય છે...એવી કોઈ બાળકીને આપણે અપનાવીએ તો એનો આત્મા ઠરે ! ધનની ખેરાત કરતાં પણ નિસ્વાર્થ પ્રેમની ખેરાત લાખ દરજ્જે મોટી છે...વિચારી જોજો. પારકી વાડીના છોડને હું પાણીથી નહીં, મારા રકતથી સિંચીશ એની તમે ખાત્રી રાખજો. અને અભિજાત, હું અને મારી પત્ની પુણ્યા નામ માત્રનાં દત્તક માતા-પિતા કહેવાઈશું, બાકી બધા જ અધિકારો તમારા. મૌનાને અમે તમારી થાપણ તરીકે જાળવીશું અને એ થાપણ તમે ઇચ્છો ત્યારે તમને પાછી સોંપવાનું મારું વચન. મૌનાને દરરોજ મળવાની તમને છૂટ, મોટી થયે એનું કન્યાદાન પણ તમારે જ કરવાનું. યશોદા અને નંદની જરૃર દ્વાપર કરતાં કળિયુગમાં વધારે છે - ડૉ. દલાલને અભિજાતે ભેટતાં કહ્યું...
''ડૉક્ટર, તમે ડૉક્ટર નથી, પણ દેવદૂત છો...મારા મનનો ભાર તમે એક પળમાં હળવો કરી નાખ્યો. તમારો પ્રસ્તાવ મને કબૂલ છે...દત્તક વિધાનની ઔપચારિકતાની કશી જ જરૃર નથી ! કાયદેસરના હસ્તાક્ષર કરતાં લાગણીભીના હસ્તાક્ષર મોટા છે...હું આજે રાત્રે જ મૌના સાથે વાત કરી લઈશ. વસુધાનો અભિપ્રાય લેવાની મારે જરૃર નથી !''
શ્રાવણી વાદળીએ આકાશી ચંદ્રને ઢાંકેલું આવરણ હટાવી લીધું. અને ચાંદનીને મહાલવાનો માર્ગ મોકળો કરી આપ્યો....
બીજે દિવસે જન્માષ્ટમી હતી. મૌનાને અભિજાતે ડૉ. દલાલને ઘેર વિદાય કરવાની તૈયારી કરી. વસુધાએ ઔપચારિકતા ખાતર પણ ન પૂછ્યું કે મૌના કપડાંલત્તાં લઈને ક્યાં જાય છે !
અને અભિજાત ડૉક્ટરને બંગલે પહોંચ્યા ત્યારે તેમના શુભેચ્છકોનું ટોળું મૌનાને ઘેરી વળ્યું...કોઈકે ફૂલથી તેને વધાવી તો કોઇએ ભેટ સોગાદથી અને મંત્રોચ્ચાર સાથે વિપ્રવૃંદે ડૉક્ટરના પ્રેમાળ ભવનમાં મૌનાને પ્રવેશ કરાવ્યો. ડૉક્ટરે પેંડાનાં પેકેટ વહેંચી સૌને વિદાય આપી. મૌનાના ચહેરા પર પ્રસન્નતાની આભા જોઈ અભિજાત પણ આનંદિત થઈ ગયા.
એમણે ઘેર જવાની ઇચ્છા પ્રદર્શિત કરી, પણ ડૉ. દલાલે એમને રોકયા અને કહ્યું ઃ ''તમારે વસુદેવની જેમ નંદને ઘેર પોતાના સંતાનને મૂકીને પાછું જેલમાં નથી પહોંચી જવાનું. તમે આજે રાત્રે મૌના સાથે મારે બંગલે રોકાશો અને મૌનાને તમારી સાથે જ તમારી ગોદમાં પોઢાડીને એને ઠારવાની છે...મૌનાની જિંદગીનો નવો અધ્યાય શરૃ થાય છે...મારે વસુદેવ નથી બનવું, વસુદેવ તમે અને હું નંદ. મારી દ્રષ્ટિએ બાળકીની ભૂ્રણહત્યા એ પાપ છે, પણ એથી મોટું પાપ નારી પર ત્રાસ ગુજારવાનું છે. અને ત્રાસમાંથી નારીને ઉગારવી એનાથી મોટું પુણ્યનું કામ બીજાું એક પણ નથી !''
અને મિ. અભિજાત પોતાની વહાલસોયી દીકરી મૌનાને ભેટીને જિંદગીમાં પ્રથમ વાર સવારે નવ વાગ્યા સુધી ઊંઘતા રહ્યા. તે દિવસે તેઓ સમયસર નોકરીએ પણ ન જઈ શક્યા.
....અને સાંજે તેઓ પોતાને ઘેર પહોંચ્યા ત્યારે વસુધાએ કહ્યું ઃ ''તમે મૌનાને બોર્ડિંગમાં મૂકી આવ્યા એ સારું કર્યું...ગૃહમાતાને કહેજો કે એને વેકેશન કે રજાઓમાં પણ ઘેર ન મોકલે. સારું થયું ઘરમાંથી કાશ ગઈ....હવે મારી સગી દીકરી વાચા નિરાંતે જીવી શકશે. હવે તમે પાછા સોગિયું મોંઢું લઈ અમને દુઃખી ન કરતા. ભગવાને સુખની ઘડી દેખાડી છે તો અમને સુખી કરજો.''
મિ.અભિજાત સમસમી ઊઠયા, પણ એમણે સંયમ દાખવ્યો. એમને લાગ્યું, જાણે મૌના કહી રહી છે ઃ ''પપ્પા, મેં અત્યાર સુધી મૌન જાળવ્યું, હવે મૌન જાળવવાની જવાબદારી તમારી. મારા પ્રત્યેનો પ્રેમ તમને અન્ય પ્રત્યે નફરત શીખવે એને હું મારા પ્રેમનો પરાજય માનું છું.''
એ વાતને દસકો વીતી ગયો. મૌના ગ્રેજ્યૂએટ પણ થઈ ગઈ. છતાં મૌનાને એક પણ દિવસ વસુધાએ પોતાને ઘેર બોલાવી ન હતી....
....અને એક સવારે અભિજાતનો ડૉ. દલાલ પર ફોન આવ્યો. વસુધાને છાતીમાં અસહ્ય દર્દ અને દુઃખાવો થઈ રહ્યો હતો. ડૉ. દલાલ તરત જ દોડી આવ્યા. હાર્ટએટેકનાં લક્ષણો જોઈ વસુધાને હોસ્પિટલમાં ખસેડવામાં આવી.
વસુધા હૉસ્પિટલ પહોંચે એ પહેલાં જ ડૉ. દલાલ પાસેથી માહિતી મેળવી મૌના હોસ્પિટલ પહોંચી ગઈ.
વસુધાની હાલત ગંભીર હતી. આઈ.સી.યુ.માં તેની સારવાર ચાલી રહી હતી. મૌના આઈ.સી.યુ.ની બહાર બેસી રહી. વાચા તેને જોઈને વગર બોલે ઘેર જતી રહી...
પૂરા બોંતેર કલાક પછી વસુધા ભાનમાં આવી. ડૉ. દલાલ મૌનાને લઈને વસુધાને મળવા ગયા અને કહ્યું ઃ ''વસુધાબેન, આ તમારી દીકરી મૌનાએ બોંતેર કલાકથી નથી ગળા નીચે પાણીનું ટીંપુ ઉતાર્યું કે નથી ઉતાર્યો અન્નનો દાણો. તમારું જીવન બચાવવા બેઠી-બેઠી પ્રાર્થના કરતી રહી છે. કદાચ એની પ્રાર્થના સાંભળીને જ ભગવાને તમને નવું જીવન આપ્યું છે...હવે અમને રજા આપો, અમે ઘેર જઈએ. ચાલ બેટા મૌના.''
ડૉક્ટરે જવા માટે રજા માગી, પણ વસુધાએ મૌનાનો હાથ જોરથી પકડી રાખ્યો...વસુધાની આંખમાંથી અસ્ખલિત રીતે અશ્રુધારા વહી રહી હતી ! બીજા હાથે મૌનાને છાતી સરસી દાબી વસુધા છૂટા મોંઢે રડતી રહી. વોર્ડના ડૉક્ટરે બધાંને બહાર કાઢ્યાં, પણ વસુધા મૌનાને અળગી કરવા તૈયાર નહોતી !
ડૉ. દલાલે અભિજીતને કહ્યું ઃ ''તમારી થાપણ પાછી સોંપવાનો સમય પાકી ગયો છે...આપણી મૌનાને હવે જાળવજો.''

Share |
 

Gujarat Samachar Plus

સંસ્કૃત અને સંસ્કૃતિને ટકાવવાનો પ્રયાસ
નેટવર્કંિગના માઘ્યમથી યંગસ્ટર્સનો સોશ્યલ એક્ટિવિટીનો નવો ફંડા
સ્વનિર્ભર થવા માટે જેલમાં કેમેરાની ક્લીકના પાઠ
મોનસૂનમાં કોલેજ કેમ્પસ લાઇવ બન્યાં
હેર સ્ટાઈલ અપાવે છે, હાઈ કોન્ફિડન્સ
 

Gujarat Samachar glamour

વિવેક ટૂંક સમયમાં પિતા બનશે
દીપિકાએ બે દિવસ જમ્મુના સૈનિકો સાથે વિતાવ્યા
પૂજા મિશ્રાનો આઈડિયા મહેશ ભટ્ટ-સન્ની લિયોને ચોર્યો છે
રણબીર કપૂર છોકરીને ‘કિસ’ કરતો પકડાઈ ગયો
સની દેઓલની ‘ઘાયલ રિટર્ન્સ’ નવેમ્બરમાં ફલોર પર જશે
 
 
   
   
   
 

Gujarat Samachar POLL

 

Olympics 2012 Photos

webad3 lagnavisha
   

Follow Us

Facebook Twitter
   
 
   

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
       
 
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
• હવામાં ગોળીબાર • ઓનલાઇન
• ઇંટ અને ઇમારત • સિનેમેજિક
• મેરા ભારત મહાન • વિચાર વિહાર
 
plus
 

આજનું કાર્ટુન

arc archive

Ravipurti In PDF

પૂર્તિઓ

 
 
Gujarat Samachar © 2012 All Rights Reserved