Last Update : 12-August-2012,Sunday

 

લાઈટહાઉસ પ્રકરણ

- ધૈવત ત્રિવેદી

ગત રવિવારે આપણે જોયું...
રાજાવત અને રાજિયો હરામી હોન્ડા સીઆરવી ગાડી લઈને બાવાપીરની દરગાહે જવા નીકળ્યા ત્યારે હરામીના મનમાં હજુ ય ખજાનાની વાતમાં કેટલું સત્ય હશે તેની આશંકા હતી પરંતુ સફર દરમિયાન રાજાવત જાણે પિકનિક પર જતો હોય તેમ ખુશમિજાજ મૂડમાં હતો. બીજી તરફ, સુમરાએ ખજાનાની વિગતો વિશે રાવીને તે જે કંઈ જાણતી હોય તે કહી દેવા તાકિદ કરી. નાછૂટકે રાવીએ કહ્યું કે, તેમના જૂથને પોતાના ધાર્યા ઓપરેશન્સ પાર પાડવા માટે જોઈતું ફંડ ગોરખધંધા વડે મેળવાતું હતું. એ દરમિયાન વિરમે એક એવા ખજાનાના અસ્તિત્વ વિશે જાણ કરી, જો એ ખજાનો મેળવી લેવાય તો આખો દેશ ધમરોળી શકાય તેટલું ફંડ મળી જાય. ૧૮૫૭ની લડાઈ પછી લાપતા થઈ ગયેલા નાનાસાહેબ સાથે મરાઠા સત્તા અને મુઘલ સલ્તનતનો એ જમાનામાં ય અબજો રૃપિયાનો ગણાતો ખજાનો પણ લાપતા થઈ ગયો હતો. અંગ્રેજોની નાગચૂડમાંથી છટકીને નાનાસાહેબ ક્યાં ઓગળી ગયા એ સવાલ સામે ઈતિહાસ અનુત્તર હતો ત્યારે વિરમે એ ખજાનો આજેય કશેક સલામત હોવાના પૂરાવા રજૂ કરીને સૌને ચોંકાવી દીધા હતા.
હવે વાંચો આગળ...

'આઈ ડોન્ટ બિલિવ...' અભિએ ખભા ઊંચકીને કહી તો દીધું પણ તેના ચહેરા પર પ્રગટેલી ઉલઝનની રેખાઓ હજુય ઓસરતી ન હતી.
'બિહોલાએ પણ પહેલું રિએક્શન આવું જ આપ્યું હતું.' રાવીએ સીટની નીચેથી તેનો હેવરસેક ફંફોસ્યો અને એક નાનકડા પર્સમાંથી કેટલાંક મેમરી કાર્ડ્સ કાઢ્યા. 'તારો મોબાઈલ લાવ...' તેણે સુમરાના હાથમાંથી મોબાઈલ લીધો અને તેમાં મેમરી કાર્ડ ખોસી એક ઈમેજ ઓપન કરી, 'આ જો...' તેણે સીટની વચ્ચે મોબાઈલ આગળ ધર્યો એટલે અભિ અને સુમરો સ્હેજ ઝળુંબ્યા. 'નાનાસાહેબ પેેશ્વાનો એ પત્ર છે.'
સુમરાએ ગાડી તદ્દન ધીમી પાડી દીધી અને બંને ધ્યાનથી મોબાઈલના સ્ક્રિન પર દેખાતી એ સ્કેન્ડ ઈમેજ જોઈ રહ્યા. સમયનો હાથબદલો પામતો રહીને પીળો પડી ગયેલો, વચ્ચેની ગડીમાંથી બટકી ગયેલો તદ્દન જર્જરિત દેખાતો એ કાગળ બહુ જૂનો હોવાનું તો સ્પષ્ટ અનુભવાતું હતું.
'હમ્મ્મ્... આ અક્ષર દોત-કલમના છે...' અભિએ વિઝન ઝૂમ કરીને કહ્યું.
'મતલબ?' સુમરાને સમજાયું નહિ.
'દુર્વા કે એવા કોઈ પોલા લાકડાની ડાળખીને અણી કાઢીને બનાવાતી કલમથી આ પત્ર મરાઠીમાં લખાયેલો છે.' અભિએ સુમરા ભણી મોબાઈલ લંબાવ્યો એટલે તેણે વાંચવાનું શરૃ કર્યું.
'મુલ..કે... આઝમ ફિરંગી...ચા' સુમરાએ મોબાઈલમાં માંડ સૂઝતા જૂની મરાઠી લઢણના શબ્દો કટકે-કટકે વાંચવાનો પ્રયાસ કર્યો.
'વેઈટ, હું સમજાવું...' રાવીએ સડસડાટ અર્થઘટન શરૃ કર્યું, 'મુલ્કે આઝમ ફિરંગ્યાંચા કૈદી ઝાલા... મુલ્કે આઝમ મતલબ દિલ્હીનો બાદશાહ ફિરંગીઓના હાથે પકડાઈ ગયો છે.. દિલ્હી પડલી.. દિલ્હીનું પતન થઈ ચૂક્યું છે... લખનૌ, કાનપુર, બિઠુરમાં ભીષણ જંગ થયો પણ આપણા હાથ ટૂંકા પડયા... બિઠુરચા વાડી, રંગમહાલય, કચેરી ઝાળુંન ટાકલા... બિઠુરના રંગમહેલ, કચેરી, વાડી અમે જાતે જ સળગાવી દીધા... મોરોપંત ફડકેલા માઝ્યા સોંગાંત... મોરોપંત ફડકેને મારો વેશ પહેરાવીને ઉત્તરે તરાઈના જંગલો તરફ રવાના કર્યા છે... આપલા ખજાના બદનૂરમધે મોડીરામચ્યા હાતિ સલામત આહે... એ બધી દેખભાળ વિઠ્ઠલરાવ સાવંતને સોંપી છે'
'પત્ર પર લખ્યા તારીખ છે...'
'જસ્ટ અ મિનિટ...' અભિએ હાથ ઊંચો કરીને રાવીને અટકાવી. સીટને માથું ટેકવીને તેણે આંખો બંધ કરી. બંધ આંખોની ભીતર સ્વીકારી લેવાયેલા ઈતિહાસના પાના ફરફરી રહ્યા હતા.
૧૮૫૭માં ઈસ્ટ ઈન્ડિયા કંપની સામેના એ પ્રથમ અને સંયુક્ત પ્રતિકારમાં આંશિક સફળતા પછી વિપ્લવીઓ પરાસ્ત થયા હતા. દિલ્હીની મુઘલ સલ્તનતનું પતન થયું હતું અને બાદશાહ બહાદુરશાહ ઝફર હુમાયુના મકબરામાંથી જીવતો ઝડપાયો હતો. અવધ પણ પરાસ્ત થયું હતું અને બેગમ હઝરતમહાલ તરાઈના જંગલો મારફત નેપાળ તરફ નાસી છૂટી હતી. વિપ્લવના વિચારકેન્દ્ર એવા કાનપુર-બિઠુર પર અંગ્રેજોએ પુનઃ કબજો મેળવ્યો ત્યારે ત્યાં હુતાશન મચ્યો હતો. સતીચૌરા ઘાટ ખાતે અંગ્રેજો પર બેરહેમ સિતમ ગુજારી ઝુંઝાર મરાઠાઓ અને સ્વયં નાનાસાહેબ પેશ્વા લાપતા થઈ ગયા હતા. બેગમ હઝરતમહાલની માફક પેશ્વા પણ તરાઈના જંગલોમાં ઓગળી ગયો હશે તેવી અંગ્રેજોની માન્યતા હતી. દિલ્હીના પતન પછી અંગ્રેજોએ આખો લાલ કિલ્લો ઉપરતળે કરી નાંખ્યો હતો પણ ચારસો વર્ષથી તરબતર થયેલા શાહી ખજાનાની એક ફૂટી કોડી ય તેમને મળી ન હતી. સમયની સેરમાંથી સરીને અજાણી ગર્ત હેઠળ ઢબૂરાઈ ગયેલા એ મણકા વિશે અંગ્રેજો દિગ્મૂઢ હતા અને ઈતિહાસ ચૂપ હતો.
- અને આજે હવે આ દસ્તાવેજો, પત્રોમાંથી એ ખોવાયેલો ઈતિહાસ પ્રગટતો હતો. એ બયાન કંઈક એવું હતું કે,
રોટી અને કમળનો સંદેશો દેશભરમાં પ્રસર્યો એ પૂર્વે જ ભેજાંબાજ તાત્યા ટોપેએ દરેક સ્થિતિનો વિચાર કરી લીધો હતો. કદાચ દિલ્હીનું પતન થાય તો પણ મુઘલ ખજાનો અંગ્રેજોના હાથમાં ન જાય એ માટે તેણે બહાદુરશાહ ઝફરને સંમત કરી લીધા હતા. તાત્યાની ભારે સમજાવટ પછી બાગપતના રોહિલ્લા અને મેનપુરીના ચૌહાણ જેવા લડાકુઓ સક્રિય વિપ્લવથી દૂર રહેવા નાછુટકે માની ગયા હતા. ક્રાંતિકારીઓ પરાસ્ત થઈ રહ્યા હતા ત્યારે તાત્યાના વ્યૂહ મુજબ હવે તેમની ભૂમિકા શરૃ થતી હતી. નાઈટ રાઈડર્સ તરીકે ઓળખાતા ૩૨મી ગેરિસનના ઘોડેસવારો દિલ્હી ભણી કૂચ કરવા અજમેરથી નીકળે એ પહેલાં જ રોહિલ્લાઓ અને ચૌહાણો છદ્મવેશે દિલ્હીની ભાગોળે ઉતરી પડયા હતા અને ૩૨મી ગેરિસનનો સાહસી કેપ્ટન હડસન દિલ્હીને ઘેરો ઘાલે એ પહેલાં જ ઘાસ ભરેલા હારબંધ બળદગાડાઓ યમુના નદી પાર કરી ગયા હતા. લાહોરી ગેટ ધ્વસ્ત કરીને હડસન લાલ કિલ્લા ભણી આગળ વધ્યો ત્યારે તો મરાઠી તોશાખાનુ અને મુઘલ ખજાનો મધ્ય ભારતમાં માછના નદીના કાંઠે બેતુલના જંગલોમાં પહોંચી ગયા હતા.
પરાસ્ત થયા પછી પણ મોંમાંથી ખૂન થૂંકીને ફરીથી લડવા માટે તાત્યા ટોપેએ કબજે કરેલો ખજાનો જ્યાં સુધી પકડાય નહિ ત્યાં સુધી વિપ્લવીઓ હાર્યા ન હતા. પેશ્વાની, ખજાનાની ભાળ મેળવવા અંગ્રેજોએ આખું હિન્દ ઉલેચી નાંખ્યું પણ ક્યાંય જરાક અમથો સુરાગ પણ મળ્યો ન હતો. દેશભક્તિનો મંત્ર ફૂંકીને, શૂરાતનના પાણીની અંજલિ છાંટીને મડદા ય બેઠા કરી જાણતા પેશ્વા અને તાત્યા આટલા લખલૂટ ખજાના વડે શું કરી નાંખશે તેની ભયાવહ કલ્પનાઓમાં દાયકાઓ સુધી એકેય અંગ્રેજ ચેનથી ઊંઘી શક્યો ન હતો. છેવટે પાંચ-છ દાયકાની શાંતિ પછી પેશ્વા જીવતો હોય તોય મરણતોલ હોય અને ખજાનો યુદ્ધની ભીષણ બિભિષિકામાં ક્યાંય વેરાઈ ગયો હોય તેમ અંગ્રેજોએ ધારી લીધું હતું.
- હવે, આજે આ જર્જરિત કાગળના વાંકડિયા અક્ષરોમાંથી સજીવન થયેલો પેશ્વા અટ્ટહાસ્ય કરી રહ્યો હતો અને દોઢસો વર્ષ પૂરાણા કાગળની ઝુર્રીઓમાંથી ફેણ માંડી રહ્યો હતો એક એવો કાલખંડ, જે ઈતિહાસની આંખેથી ઓઝલ રહી જવા પામ્યો હતો.
'સ્ટિલ... આઈ ડોન્ટ...' અભિએ ડોકું ધૂણાવ્યું અને ફરીથી મોબાઈલના સ્ક્રિનને તાક્યા કર્યું, 'વેરી ડિફિકલ્ટ ટુ બિલિવ...'ગૂંચવણના ભારથી તેનો ચહેરો અભાનપણે નકારમાં ધૂ્રજી રહ્યો હતો અને તાજુબીના સ્ફોટથી અંજાઈ ગયેલી આંખોમાં વિસ્ફાર ઝબૂકતો હતો.
'બટ ઈટ્સ ટ્રુ... એન્ડ નાવ ઈટ્સ પ્રુવ્ડ ટુ...' રાવી તેની અવઢવ સમજી શકતી હતી કારણ કે એક વખત તેણે પોતે ય પહેલાં આવી જ ગૂંચવણ અને પછી આવી જ તાજુબી અનુભવી હતી. 'અમે-મેં અને મેજર અંકલે પણ એ વખતે આવી જ અવઢવ અનુભવી હતી. એ રાત્રે અમે જિગ્નીથી ગ્વાલિયર પહોંચ્યા. હોટેલના કમરામાં રાતભર ઈન્ટરનેટ પર સર્ફ કરીને મેજર એક પછી એક દલીલો કરતા રહ્યા અને દરેક દલીલના જવાબમાં વિરમ આ દસ્તાવેજી પૂરાવાઓના મરાઠીમાં લખાયેલા વાક્યો ટાંકતો રહ્યો.'
'ઈતિહાસ એવું કહેતો હતો કે, કેપ્ટન સધરલેન્ડ અને મેક્આર્થરે પેશ્વના કાફલાને ચાંદોલ નદીની બિહડોમાં ઘેરી લીધો હતો. ત્રણ દિવસ ત્યાં ભીષણ જંગ જામ્યો. ત્રીજી રાતે ભારે વરસાદ શરૃ થયો એમાં હેઠવાસમાં રહેલા અંગ્રેજ કાફલાએ બિહડના ઢોળાવમાંથી ફેંકાતા પૂરને લીધે પીછેહઠ કરવી પડી. બે દિવસ પછી વરસાદ અટક્યો અને અંગ્રેજો બિહડમાં પહોંચ્યા ત્યારે પેશ્વા અંતર્ધ્યાન થઈ ચૂક્યો હતો. એ હવે ગ્વાલિયર ભણી જશે એવું ધારીને મેક્આર્થરનો કાફલો એ દિશામાં ભાગ્યો અને સધરલેન્ડ અડાબીડ બિહડોની તલાશીમાં લાગ્યો.'
'હવે તાજુબી જો, ગ્વાલિયરનો શિંદે-સિંધિયા ય મરાઠા જ હતો પણ અકળ કારણોથી તેણે ક્રાંતિના હુતાશનથી પોતાની જાતને છેટી રાખી હતી. મેક્આર્થર ગ્વાલિયર પહોંચ્યો ત્યારે રાહતના સમાચાર તેની રાહ જોઈને તૈયાર જ હતા. સિંધિયાએ પેશ્વાને ઝડપી લીધો હતો. સિંધિયાએ હોંશભેર મેક્આર્થરને બયાન આપ્યું કે, મેઘલી રાતે ગ્વાલિયરની ભાગોળે કેટલાંક લોકો હોડીનો ઈંતઝામ કરી રહ્યા હોવાની ખબર પડતાં તેમણે ઘોડેસવારોને દોડાવ્યા હતા. નાનકડા છમકલા પછી આઠ-દસ લોકો ઝડપાયા હતા, જેના મુખિયાએ પોતે નાનાસાહેબ પેશ્વા હોવાનું કબુલી લીધું હતું. ખુશહાલ મેક્આર્થરે તરત સધરલેન્ડને સમાચાર પહોંચાડયા અને હરખાતો અંગ્રેજ કાફલો ઝડપાયેલા પેશ્વાને દંડાબેડીમાં બાંધીને કાનપુર પહોંચ્યો. કફોડી હાલત ત્યાં પહોંચીને થઈ, ઝડપાયેલા આદમીઓની ઓળખની ખરાઈ કરવામાં આવી ત્યારે ખબર પડી કે એ પેશ્વા ન હતો.'
'ચાંદોલ નદીની બિહડોમાં પેશ્વા સાથે થયેલી મૂઠભેડ એ પેશ્વાની હયાતિનો છેલ્લો પૂરાવો. એ સમય હતો ઓગસ્ટ, ૧૮૫૯. હવે આ પત્ર પર લખાયા તારીખ જો...'
રાવીએ સ્નેપ એક્સ્ટ્રિમ ઝૂમ કરીને પત્રના છેવાડે લખેલી તારીખ વાંચી, 'વિક્રમ સંવત ૧૯૧૫, કારતક સુદ ૭ મતલબ કે, ઈસ. ૧૮૫૯નો નવેમ્બર મહિનો. ઈતિહાસ જ્યાંથી મૌન થઈ જતો હતો, વિરમે રજૂ કરેલા દસ્તાવેજો ત્યાંથી જ બોલવાનું શરૃ કરતા હતા. એ આખું તરકટ માસ્ટર માઈન્ડ તાત્યાનું હતું. આધુનિક યુદ્ધનીતિ જેને નેટવર્કિંગ કહે છે એ કળામાં તાત્યા બધાનો બાપ હતો. વડોદરાના ગાયકવાડ અંગ્રેજોના પીઠ્ઠુ હતા પણ તેમનો નાયબ દિવાન ગણપતરાવ શિંદે તાત્યાનો માણસ હતો. ઈંદોરના હોલ્કરે પેશ્વાથી અંતર રાખ્યું હતું પણ તેમનો સેનાપતિ ઈંદોરની સેનામાં તાત્યાના માણસોની ભરતી કરીને અંગ્રેજ કેપ્ટનની હાજરીમાં છડેચોક તાલીમ આપતો હતો. સિંધિયા ય દેખીતી રીતે અંગ્રેજોનો વફાદાર હતો પણ અંદરખાને ગ્વાલિયરનું આખું રજવાડું તાત્યા અને પેશ્વાનું મદદગાર હતું. બિહડમાં ઘેરાઈ ગયેલા પેશ્વાને બચાવવા માટે જ સિંધિયાએ જોખમ ઊઠાવીને બનાવટી આદમીઓની ધરપકડ કરી તેમને પેશ્વા તરીકે રજૂ કરી દીધા. તેમની ઓળખ થવામાં સમય લાગે એટલી વારમાં નબળા પડેલા ઘેરામાંથી પેશ્વા છટકીને ચાંદોલ નદી પાર કરીને ભીંડ-મુરૈના તરફ સરકી ગયા.'
'પણ આમાં સિહોર ક્યાં આવ્યું?' અભિ મનોમન તાળો મેળવી રહ્યો હતો.
'સિહોરના બ્રાહ્મણ હર્ષરામ અને કલ્યાણજી મહેતા વિપ્લવના દોઢ દાયકા પહેલાં બિઠુર ખાતે પેશ્વાના દરબારમાં પૂરોહિત હતા. અંગ્રેજોને હાથતાળી આપીને છટકી ગયેલા પેશ્વા છેવટે સિહોર પહોંચ્યા. આ દસ્તાવેજો કહે છે કે, અહીં જ તેમણે સાધુવેશે જીવન બસર કર્યું.'
'પણ...' હવે સુમરાને ય સવાલ થયો, 'આટલા બેશકિમતી ખજાના વડે તે નવું લશ્કર ન ઊભું કરી શકે?'
'આ દસ્તાવેજોમાં તેમની કેફિયત છે એ મુજબ, ઉત્તરાવસ્થામાં પેશ્વાનું ઝનુન અને વતનપરસ્તી આધ્યાત્મના માર્ગે વળી ગયા હતા. સમય ઝડપભેર બદલાઈ રહ્યો હતો. તલવારની ધારે કેસરિયા કરીને યુદ્ધ જીતવાની, શાસન પલટો કરવાની નીતિ હવે જરીપૂરાણી થઈ ગઈ હતી. એટલે પેશ્વાએ તેમની સાથેના કાફલાને થાળે પાડયો અને પોતે ય જંપ લીધો.'
'તો પછી ખજાનો? બદનૂર ગામે મોડીરામને ત્યાં રવાના કરેલો ખજાનો ક્યાં ગયો?'
અભિમન્યુના સવાલથી રાવી ઘડીભર ચૂપ થઈ ગઈ અને વિરમના બેહોશ ચહેરાને લાચાર આંખે તાકી રહી. 'ઈતિહાસ જ્યાંથી ચૂપ થયો હતો ત્યાંથી આ દસ્તાવેજો આગળ વધ્યા હતા પણ આ દસ્તાવેજો જ્યાં મૌન થઈ જાય છે ત્યાંથી આગળ તો ફક્ત વિરમ જ બોલી શકે તેમ છે.' વિરમના હોઠના ખૂણેથી દદડી રહેલી લાળને તેણે રૃમાલથી સાફ કરી અને ભાવવશ થઈને વિરમના ગાલ થપથપાવ્યા, 'કંઈક તો બોલ... કંઈક તો બોલ.. વિરમ.. વિરમ...'
રાવીના અવાજની વિવશતામાં મૂગા ડુસ્કાંનો ધુ્રજારો અભિ અનુભવતો હતો.
*** *** *** *** ***
'એ આખી રાત મને જાતભાતના સપનાઓ આવ્યા...' વિરમના ચહેરા પર ઢળીને વ્યાકૂળ થઈ ગયેલી રાવીને અભિએ સ્વસ્થ કરી એ પછી ય એ ક્યાંય સુધી ચૂપ રહી હતી.
છેવટે સુમરાએ ફરીથી તાકિદ કરી, 'ચિપળૂણથી આપણે નિવળી ઘાટમાં થઈને હાથખંભા પહોંચવાનું છે. હાથખંભા આપણે અટકી જઈશું. ત્યાંથી સિસ્કો ડેલગાડોની મદદ લેવી જ પડશે. સિસ્કો વિરમની સારવારનો બંદોબસ્ત કરી આપશે પણ એ પહેલાં...' તેણે રાવીની સામે જોયું, 'આપણે માંડ સવાસો કિલોમીટર દૂર છીએ. બહેતર છે કે, એ પહેલાં તું વાત પૂરી કરે...' તેણે ઘડિયાળમાં જોયું. રાજાવત પછી હવે તેને સાહાના ખબર આવવાની પણ રાહ હતી.
- અને રાવીએ ફરીથી વાત માંડી.
'આખી રાત સપનાઓમાં મને પેશ્વા અને તાત્યાના લડાકુઓ દેખાયા. ક્યાંક બિહડો વચ્ચે ખુનખાર જંગ જામ્યો હતો... ધોધમાર વરસાદ વચ્ચે વીજળીના ઝબકારાના અજવાસમાં ઘૂઘવતી નદીના કાદવછાયા કાંઠા ખુંદતા મરાઠા યોદ્ધાઓ ભાગ્યે જતા હતા... વળી ક્યાંક મને તોતિંગ પહાડો વચ્ચેની સાંકડી ઘાટીઓમાંથી પસાર થતી બળદગાડાની હાર દેખાતી હતી.. મારી આંખ ઊઘડી ત્યારે કમરામાં ઉજાસ છવાયેલો હતો. મેં બહાર જઈને જોયું તો વિરમ અને મેજર તૈયાર થઈને બેઠા હતા.'
'આઈ એમ સોરી...' મને સાચે જ મારા ઉંઘરેટા ઘારણ માટે શરમ આવતી હતી. 'તમે મને ઊઠાડી નહિ?'
'ગુડ મોર્નિંગ માય ગર્લ..' મેજરે હાસીને કહ્યું, 'ઊઠતાં વેંત તારા સવાલોનું નાળચું ન તાક...' તેમણે ફ્લાસ્કમાંથી કોફી રેડીને મારા માટે કપ તૈયાર કર્યો. 'તું આ બદતમીઝ છોકરીને કેમ સહન કરી શકે છે, યાર..'
વિરમ મારી સામે જોઈને ફક્ત હસ્યો. 'તમે જ એને ફટવી છે. મારી સાથે તો સીધી જ રહે છે. બાકી, આવી ગુસ્તાખી કરે તો હું તો બે અડબોથ જ ઠોકી દઉં...'
'ઓહ કમ ઓન... તું રાવીને અડબોથ ઠોકી દે? રાવી જામવાલને? હર હાઈનેસ ઓફ ચમોલીને?? નો વે...' મેજરને ય મારી ફિરકી ઉતારવામાં મજા આવતી હતી.
'શટ અપ યુ ****....' મેં ખુરશી તેમની નજીક ખસેડતા વિરમના ઢિંચણ પર હળવી લાત મારી, 'તારી માને પૂછી આવ, મને અડબોથ મારી શકાય એટલી સૂંઠ એમણે ન્હોતી ખાધી...' વિરમ અને મારી વચ્ચે ઉંમરનો તફાવત કદી નડયો ન હતો. એ મને ક્યારેક મારા જેવડો જ તો ક્યારેક તો મારાથી ય નાનો લાગતો. કામ વખતે અત્યંત ગંભીર થઈ જતો વિરમ ફૂરસદની પળોમાં બિલકુલ મસ્તીખોર બની જતો. મેં તેને ધ્યાનથી નીરખ્યો. અત્યારે લાઈટ પર્પલ કલરનો શર્ટ, સ્કાય બ્લ્યૂ જીન્સમાં તે હતો તેથીય વધુ જાજરમાન લાગતો હતો.
'શું વાત છે વિરમસા'બ, અત્યારમાં સજીધજીને ક્યાં સવારી લઈ જવા ધારો છો?'
'હી ઈઝ ગોઈંગ...' મેજરે ફ્લાસ્ક હટાવીને ટિપોય પર પગ લંબાવ્યા.
'એન્ડ મી??' વિરમ જઈ રહ્યો હતો? ક્યાં? અને તો મારે તેની સાથે ન્હોતું જવાનું? છેલ્લા દોઢ વરસથી હું લગભગ તેની સાથે જ રહી હતી. ચમોલી, ગુલમર્ગની આવ-જા કરતી રહું, મારી માને મળતી રહું પણ મોટાભાગનો સમય વિરમને સોંપાયેલા ઓપરેશન્સ, તેની સ્ટ્રેટેજી, ફ્યુચર પ્લાનિંગ વગેરેમાં જ હું તેની સાથે ગાળતી. મેજરે કે વિરમે નામ ન્હોતું પાડયું પણ મને લાગતું હતું કે એ મારો ટ્રેનિંગ પિરિયડ છે અને વિરમ મારો ટ્રેનર છે.. અ પરફેક્ટ ટ્રેનર ફોર મી... મને તેના પ્રત્યે...' તેણે ફરીથી વિરમની સામે જોયું... જોયા જ કર્યું.
'મને ખબર નહિ કે એ દિવસ પછી વિરમ આ હાલતમાં મળવાનો છે...' રાવીનો અવાજ તરડાઈ રહ્યો હતો. 'પેશ્વાના ખજાનાની ભાળ મેળવવા વિરમ કેટલોક સમય અન્ડરગ્રાઉન્ડ થઈ જશે. મારે અહીં જ ગુલમર્ગ અથવા ચમોલી રહેવાનું હતું અને ખપ પડે તો જ મારે તેમાં જોડાવાનું છે એવું મેજરે કહ્યું એથી હું બહુ જ ગિન્નાઈ હતી. ખપ પડે એટલે? વિરમને ખપ પડે તો જ મારે જવાનું એટલે? એને મારો ખપ ન હતો? હું વિરમ પર પણ સખત ગુસ્સે થઈ હતી. મારા રૃમમાં જઈને ક્યાંય સુધી મેં ધમપછાડા કર્યા હતા. બહાર મેજર સાથે બેઠેલા વિરમને મોબાઈલ જોડીને બેફામ ગાળો આપી હતી. મારે કોઈપણ હિસાબે તેની સાથે જવું હતું. મને એ જ સહજ લાગતું હતું. આઈ ફેલ્ટ લાઈક વી આર ઈનસેપરેબલ... વી આર લાઈક લાઈટ એન્ડ શેડો...'
'તું...' તલ્લીન થઈને રાવીને સાંભળી રહેલા અભિથી તદ્દન સહજ રીતે પૂછાઈ ગયું, 'તું વિરમના પ્રેમમાં છે?' અભિના સવાલથી ફોર્ચ્યુનરમાં ઘડીક સ્તબ્ધતા પ્રસરી ગઈ. સુમરાના હોઠ પર સ્હેજ અમથું સ્મિત ફરક્યું, ફરક્યું અને તેના ખંધા ચહેરામાં વિલિન થઈ ગયું. સ્ટિયરિંગ પર ભીંસાયેલા તેના આંગળા રમતિયાળ અંદાજમાં તાલ દઈ રહ્યા હતા. અભિને પહેલી વાર એ વખતે ચૂપ થઈ ગયેલી રાવીના મૌનમાં એક છોકરીના ગાલ પર હોય તેવો શેરડો વર્તાયો હતો.
'ઓહ કમઓન યાર... ટેક ઈટ ઈઝી...' એ બંનેના મૌનથી અભિ વધુ ગૂંચવાતો હતો.
'આઈ ટૂક... એક્ચ્યુઅલી આઈ ડોન્ટ નો...' રાવીએ વિરમના તરડાયેલા ચહેરા પરથી નજર ફેરવ્યા વગર જવાબ આપ્યો, 'આઈ રિઅલી ડોન્ટ નો... ઈટ મે બી...' એ અટકી-અટકીને બોલતી હતી અને અભિના ધબકારાનો લય ખોરવાતો જતો હતો, '... ઓર મે નોટ બી સો... મને વિરમ ગમે છે. હી ઈઝ અ જેમ... એ સાલો જેટલો બદમાશ છે એટલો જ સંવેદનશીલ છે. હી ઈઝ રૃથલેસ એન્ડ સેમ વે ઈમોશનલ... હી ઈઝ માય ડ્રીમ મેન...' તેણે અચાનક ઝાટકા સાથે ઊંચે જોયું, 'બટ ડ્રીમ શૂડ બી મોર સૂધિંગ ધેન રિઆલિટી'
'એ એકલો જતો હતો અને મારે તેની સાથે ન્હોતું જવાનું એથી હું ભયાનક ખિજવાઈ હતી. બપોરે મેજર તેને મૂકવા સ્ટેશન ગયા એ પહેલાં વિરમે મારો રૃમ નોક કર્યો હતો. મને કહ્યું હતું કે, આઈ એમ ગોઈંગ, ડોન્ટ યુ વોન્ટ ટુ વીશ મી ગુડ લક? અને મેં ચીસ પાડીને જવાબ વાળ્યો હતો, ભાડમાં જા સાલા... પછી થોડીક વાર સુધી હું ફરીથી રૃમ નોક થાય તેની રાહ જોતી રહી. મેં દરવાજો અધૂકડો જ વાસ્યો હતો. ક્યાંય સુધી નોક ન થયું એટલે હું સફાળી બહાર આવી પણ લાઉન્જમાં કોઈ ન હતું. હું જિપ્સી લઈને પૂરપાટ સ્પિડે સ્ટેશન પહોંચી એ જ વખતે મને ટ્રેઈનની વ્હિસલ સંભળાઈ... એ જતો રહ્યો હતો.'
'મેજરે મને માંડ સ્વસ્થ કરી હતી. બીજા કેટલાંક અગત્યના કામો છે જેમાં તારી જરૃર પડશે, તારે આરામની પણ જરૃર છે, યુ શૂડ સ્પેન્ડ સમ ટાઈમ વિથ યોર મધર ટૂ એવું બધું કહીને મેજરે મને ચમોલી મોકલી દીધી હતી. ચમોલીની નિરાંતભરી ખુશ્બોદાર હવા મને બહુ ગમતી પણ એ વખતે મને બહુ જ ત્રાસ થયો. મેજર મને વિરમ સાથે જોડાવા કહેશે એ આશાએ હું દસ-બાર દિવસે ગુલમર્ગ પહોંચી જતી. વિરમ વિશે એ કશું જ બોલતા નહિ અને મેજરની કડક શિસ્ત મુજબ મારાથી સામેથી કશું તેમને પૂછી શકાતું નહિ.'
'બે મહિના થયા હતા. હું સખત બેચેનીમાં ગુલમર્ગ પહોંચી ગઈ. મેજર બોર્ડર પેટ્રોલ પર હતા અને બે દિવસ પછી કેમ્પ પર પાછા ફરશે તેવું જાણ્યા પછી હું અમારી નિયત હોટેલમાં રોકાઈ ગઈ. એ દિવસે સાંજે હોટેલની લોનમાં બેસીને મેં કોફી મંગાવી. વેઈટર ફ્લાસ્ક, કપ મૂકી ગયો. મેં કપમાં કોફી રેડી. હું કપ મોંઢે માંડું એ પહેલાં હોટેલના યુનિફોર્મ વગરનો કોઈ માણસ મારા ભણી આવ્યો. મને કહે, મેડમ આપ કે લિયે યે પેપર નેપકિન... મને તાજુબી તો થઈ, કારણ કે મેં પેપર નેપકિનનું તો કહ્યું ન હતું. મને થયું કે બસ એમ જ આપવા આવ્યો હશે. મેં તેને ટેબલ પર મૂકવા ઈશારો કર્યો. તેણે ટ્રેના ખૂણા નીચે નેપકિન્સ મૂક્યા અને અદબભેર ઝૂકીને ચાલતી પકડી.'
'કોફીના બે ઘૂંટ ગળા નીચે ઉતાર્યા પછી અનાયાસે જ મારૃં ધ્યાન ટ્રેના ખૂણે દબાયેલા પેપર નેપકિન પર ગયું અને હું ચોંકી ઊઠી...'
(ક્રમશઃ)

Share |
 

Gujarat Samachar Plus

અમે સાપ પકડવાને બદલે મહેનત કરવાનું શરુ કરી દીઘું
સાપુતારામાં મોન્સૂન છે પણ ફેસ્ટિવલ નથી
હિટ ફિલ્મ પછી ગિટારમાં ગીર્દી
સ્વતંત્રતાનો એ રણકો આજે પણ સચવાયેલો છે
મોન્સૂન મંત્ર ઉપવાસ કરો અને હેલ્ઘી રહો
વેસ્ટર્ન આઉટફિટમાં એઝટેક પ્રિન્ટની બોલબાલા
ગોલ્ડન કલરમાં મોર્ડન વેઅર
 

Gujarat Samachar glamour

શું શાહરૂખની ટીકા-ટિપ્પણી કરી ગોવંિદાએ ચમકવું છે ?
‘‘કેબીસી-૬’’નો ઓગસ્ટનાં છેલ્લા સપ્તાહમાં પ્રારંભ !
સારાને ઈન્ડસ્ટ્રીથી દુર રાખવા માંગુ છુ-સૈફ
શું કેટ સલમાનની ફક્ત ફ્રેન્ડ જ છે?
કેટરીનાએ જાહેરાતના સાત કરોડ લીઘા
અમિષા પટેલ -વિક્રમ ભટ્ટના અફેર ઉપર ફિલ્મ બનશે !
જન્માષ્ટમીને લીધે ‘‘કૃષ્ણ ઔર કંસ’’ કરમુક્ત કરાઈ !
 
 
   
   
   
 

Gujarat Samachar POLL

 

Olympics 2012 Photos

webad3 lagnavisha
   

Follow Us

Facebook Twitter
   
 
   

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
       
 
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
• હવામાં ગોળીબાર • ઓનલાઇન
• ઇંટ અને ઇમારત • સિનેમેજિક
• મેરા ભારત મહાન • વિચાર વિહાર
 
plus
 

આજનું કાર્ટુન

arc archive

પૂર્તિઓ

 
 
Gujarat Samachar © 2012 All Rights Reserved