Last Update : 06-August-2012, Monday

 

ફૂડ સેફટી એક્ટ જેવા કાયદાઓનો મૂળ હેતુ પ્રજાને કચડી નાખવાનો છે

જાતજાતના ચિત્રવિચિત્ર કાયદાઓ ઘડીને પ્રજાને આતંકિત કરવાની સરકારની અને સંસદની સત્તા જ પ્રજાએ સંગઠિત થઇને છીનવી લેવી જોઇએ

ઈ.સ. ૧૯૪૭ની ૧૫મી ઓગસ્ટે ભારતને આઝાદી મળી હતી. આ ઘટનાને ૬૫ વર્ષ થયાં તે પછી પણ લાગે છે કે આપણે હજી આઝાદ થયા નથી. ભારત જયારે વિદેશીઓની સત્તા હેઠળ હતું ત્યારે અંગ્રેજોએ આપણી પ્રજાને કચડી નાંખવા માટે જે કાયદાઓ બનાવ્યા હતા, તેમાંના મોટા ભાગના કાયદાઓ સ્વતંત્રતા પછી પણ ચાલુ રાખવામાં આવ્યા છે. તેમાંના અમુક કાયદાઓ તો અંગ્રેજોના કાળમાં હતા તેના કરતાં પણ વધુ સખત બનાવવામાં આવ્યા છે. આ કાયદાઓને કારણે આપણી પ્રજા સરકારી અધિકારીઓની ગુલામ બની ગઇ છે. આ ગુલામીમાંથી મુક્ત થવા માટે આ ૧૫મી ઓગસ્ટે આપણે નવા સ્વાતંત્ર્ય સંગ્રામનો પ્રારંભ કરવો પડે તેવી સ્થિતિ છે.
વર્તમાનમાં ભારતભરના વેપારીઓ અને ખાદ્ય પદાર્થોના વિક્રેતાઓ ફૂડ સેફટી એન્ડ સ્ટાન્ડર્ડ્સ એક્ટ (૨૦૦૬) નામના રાક્ષસી કાયદા સામે લડી રહ્યા છે. જો ભારતની પ્રજા અને વેપારીઓ ખરેખર સ્વતંત્ર હોય તો આવો જુલમી કાયદો ઘડવાની સંસદની હિંમત જ ચાલે નહીં. આ કાયદો લોકસભામાં અને રાજ્યસભામાં પસાર થઈ ગયો છે. તેના ઉપરથી ખ્યાલ આવે છે કે આ કાયદાની તરફેણમાં મતદાન કરનારા સંસદસભ્યો ભારતના વેપારીઓના પ્રતિનિધિ નથી પણ ભારતમાં છૂટક વેપાર કરવા આવતી મલ્ટીનેશનલ કંપનીઓના દલાલ છે. આ કાયદાનું બંધારણ જ એવી રીતે ઘડવામાં આવ્યું છે કે તેના અમલથી ખાદ્ય પદાર્થો વેચતા નાના વેપારીઓ કચડાઇ જાય અને મોટી વિદેશી કંપનીઓને જલસા થઈ જાય. આ કાયદો સંસદમાં પસાર કરાવીને આપણી સરકારે પણ સાબિત કરી દીધું છે કે તે નાના વેપારીઓને બરબાદ કરીને મોટી કંપનીઓને આબાદ કરવા માંગે છે.
ફૂડ સેફટી કાયદાનો અમલ ચાલુ થશે તે પછી ખાદ્ય પદાર્થોનો ધંધો કરનારા વેપારીએ કેવી યાતનામાંથી પસાર થવું પડશે તેનું ચિત્ર જોઈએ. આ વેપારી જે મકાનમાં કે દુકાનમાં ધંધો કરતો હશે તેના માલિક પાસેથી તેણે 'નો ઓબ્જેકશન સર્ટિફિકેટ' લાવવું પડશે. ઘણા વેપારીઓ પાઘડીની અથવા ભાડાની દુકાનમાં દાયકાઓથી ધંધો કરતા હોય છે. ઘણા વેપારીને મકાન માલિક સાથે ઝઘડાઓ પણ ચાલતા હોય છે. જો મકાન માલિક 'નો ઓબ્જેકશન સર્ટિફિકેટ' આપવાનો ઇનકાર કરી દેશે તો વેપારીને પોતાની દુકાન જ બંધ કરી દેવી પડશે.
નવા કાયદા મુજબ કોઇ પણ વેપારીએ ખાદ્ય પદાર્થનો ધંધો કરવો હોય અને તેમનું વાર્ષિક ટર્નઓવર ૧૨ લાખ રૃપિયાથી વધુ હોય તો તેમણે ફૂડ ઓથોરિટી પાસેથી તેનું લાઇસન્સ લેવું પડશે. આજે સડક ઉપર ઊભા રહીને વડા-પાઉં વેચનારા ફેરિયાનું ટર્નઓવર પણ વર્ષે ૧૨ લાખ રૃપિયાથી વધી જતું હોય છે. આવા કરોડો વેપારીઓ લાઇસન્સ લેવા દોડશે તો તેમને સમયસર લાઇસન્સ આપવા જેટલો સ્ટાફ પણ ફૂડ ઓથોરિટી પાસે નથી. આ પ્રત્યેક વેપારીએ ફૂડ ઓથોરિટીના ઇન્સ્પેક્ટરને લાઇસન્સ માટે લાંચ આપવી પડશે. એક બાજુથી આપણે મુક્ત અર્થતંત્રની વાતો કરીએ છીએ અને બીજી બાજુ પ્રજાની સેવા કરતાં વેપારીઓને સરકારી અધિકારીઓની દયા ઉપર જીવવા મજબૂર કરીએ છીએ.
જે વેપારીઓ વાર્ષિક ૧૨ લાખ રૃપિયાનું અથવા વધુ ટર્નઓવર ધરાવતા હોય પણ લાઇસન્સ વગર ધંધો કરતા હોય તો તેમને છ માસની જેલની સજા અને પાંચ લાખ રૃપિયા સુધીનો દંડ થઇ શકે છે. આપણી સરકાર યુનિવર્સિટીમાં સ્નાતક થયેલા યુવકયુવતીઓને પણ નોકરીની ગેરન્ટી આપી શકતી નથી. જે વેપારીઓ સરકારની કોઇ પણ સહાય વિના વેપાર કરીને દેશનું અર્થતંત્ર ચલાવે છે અને પોતાના પરિવારનું ગુજરાન પણ ચલાવે છે તેમને પરેશાન કરીને ખતમ કરવાનો શોર્ટ કટ સરકારે આ રાક્ષસી કાયદાના રૃપમાં શોધી કાઢ્યો છે. જે એકદમ નાના વેપારીઓ વર્ષે ૧૨ લાખ રૃપિયાથી પણ ઓછું ટર્નઓવર ધરાવતા હોય તેમના માટે પણ આ કાયદા હેઠળ રજીસ્ટ્રેશન ફરજિયાત બનાવવામાં આવ્યું છે. જો બજારમાં ફૂટપાથ ઉપર બેસીને શાકભાજી અને ફળફળાદિ વેચતી કોઈ ગરીબ સ્ત્રી રજીસ્ટ્રેશન નહીં કરાવે તો તેને બે લાખ રૃપિયાનો દંડ કરવામાં આવશે.
જે વેપારીને ખાદ્ય પદાર્થો વેચવા માટે લાઇસન્સ જોતું હશે તેણે પોતાને ત્યાં એક સાયન્સ ગ્રેડયુએટને ફરજિયાત નોકરીમાં રાખવો પડશે. બજારમાં કંદોઇની દુકાન ધરાવનાર વેપારી કે નાનકડી રેસ્ટોરન્ટનો માલિક પોતાને ત્યાં સાયન્સ ગ્રેડયુએટને કેવી રીતે નોકરીમાં રાખી શકે ? ખાદ્ય પદાર્થોનો ધંધો કરનારા પ્રત્યેક વેપારીએ પોતાને ત્યાં નોકરી કરતા દરેક કર્મચારીઓનું નિયમિત મેડિકલ ચેકીંગ કરાવવું પડશે.
આ કાયદા મુજબ ખાદ્ય પદાર્થનો ધંધો કરતો કોઇ વેપારી કોઇ ફેરિયાને આ પદાર્થ વેચે તો તેણે છાપેલાં ફોર્મમાં ફેરિયાને એક બાંયધારી આપવી પડશે કે આ ખાદ્ય પદાર્થમાં કોઇ ભેળસેળ નથી અથવા આરોગ્યને હાનિકારક પદાર્થ નથી. દાખલા તરીકે પાણીપૂરીનો ખૂમચો લઈને બેઠેલો કોઇ ફેરિયો કંદોઇને ત્યાંથી એક કિલોગ્રામ સેવ ખરીદવા જાય તો કંદોઇએ તેને નિયત ફોર્મમાં ગેરન્ટી આપવી પડશે. જો કંદોઈ આવી ગેરન્ટી ન આપે તો તેણે ફેરિયાને આપેલું બીલ જ આ પ્રકારની ગેરન્ટી ગણાશે. જો કંદોઈ બીલ નહીં આપે તો તેને ગુનો ગણવામાં આવશે.
આ કાયદામાં એક કલમ એવી છે કે ખાદ્ય પદાર્થમાં કોઇ પણ જંતુનાશક દવાના અથવા એન્ટીબાયોટિક દવાના અંશો જોવા મળશે તો એ વેપારીનો ગુનો ગણાશે. હવે કોઈ વેપારી પોતાની દુકાનમાંથી ઘઉં વેચે, ગ્રાહક તેને લેબોરેટરીમાં ટેસ્ટ કરાવે અને તેમાં જંતુનાશક દવાના અંશો જોવા મળે તો વેપારીને છ મહિનાની જેલની સજા થઈ શકે છે. ભારતની બજારોમાં મળતા મોટા ભાગના અનાજ-કઠોળમાં અને શાકભાજીમાં જંતુનાશક દવાઓના અંશો હોય છે. તે માટે વેપારીને કેમ જવાબદાર ગણાવી શકાય ? જો આપણી સરકાર જંતુનાશક દવાઓથી પ્રજાના આરોગ્યને થતાં નુકસાન બાબતમાં ખરેખર સચેત હોય તો તેણે તમામ જંતુનાશક દવાઓના ઉત્પાદન ઉપર જ પ્રતિબંધ મૂકી દેવો જોઈએ.
ફૂડ સેફટી કાયદા મુજબ કોઇ પણ લેબલ વગરનો ખાદ્ય પદાર્થ વેચી શકાશે નહીં. આજે દેશમાં મધ્યમ વર્ગની ઘણી સ્ત્રીઓ પોતાનું ગુજરાન ચલાવવા ખાખરા-પાપડ-થેપલાં બનાવવાનો ગૃહ ઉદ્યોગ ચલાવે છે. તેઓ ઘરે અથાણાં, ફરસાણ વગેરે પણ બનાવીને કિફાયતી કિંમતે બજારમાં વેચે છે. કંદોઇઓ પોતાની દુકાનમાં જે ખાદ્ય પદાર્થો વેચે છે, તેમાં પણ કોઇ લેબલ લગાવવામાં આવતું નથી. આ બધા પ્રકારના ધંધાઓ હવે ગેરકાયદે ગણાશે અને તેના માટે છ મહિનાથી માંડીને આજીવન કારાવાસની સજા કરવામાં આવશે.
ફૂડ સેફટીના નવા કાયદા મુજબ કોઇ પણ ખાદ્ય પદાર્થમાં ભેળસેળ છે કે નહીં અને તે માનવ આરોગ્ય માટે હાનિકારક છે કે નહીં તે પારખવા માટે ભારતના દરેક જિલ્લામાં ઓછામાં ઓછી એક લેબોરેટરી તો હોવી જોઈએ. અત્યારે આખા ભારતમાં આવી માત્ર ૫૬ પ્રયોગશાળાઓ છે. ૧૨મી પંચવાર્ષિક યોજનામાં આવી ૧૨૦ પ્રયોગશાળાઓ ખોલવાની જોગવાઇ છે. જ્યાં સુધી આખા ભારતના તમામ જિલ્લાઓમાં અને તમામ મુખ્ય શહેરોમાં આવી પ્રયોગશાળાઓ ખોલવામાં ન આવે ત્યાં સુધી આ કાયદાનો અમલ કરવો શક્ય જ નથી.
ખાદ્ય સુરક્ષાના વિષયને લઈને જે નવો કાયદો ઘડવામાં આવ્યો છે તેનો હેતુ ભેળસેળને રોકવાનો હોવાનું કહેવાય છે, પણ હકીકતમાં તેમાં ભેળસેળ કરતાં વધુ ભાર અન્બ્રાન્ડેડ ખાદ્ય પદાર્થો ઉપર વધુ આપવામાં આવ્યો છે. આ મુજબ બજારમાં વિદેશી કંપનીઓની જે ચોકલેટ મળે છે તે બ્રાન્ડેડ આઇટમ ગણાશે, પણ દેશી કંદોઇઓ કાજુ કતરી, બુંદીના લાડુ અથવા મોહનથાળ વેચે તો તે અન્બ્રાન્ડેડ ગણાશે. કેલોગ્સ કંપનીના ફલેકસ વેચે તેને બ્રાન્ડેડ વસ્તુ ગણવામાં આવશે, પણ ખાખરાને અન્બ્રાન્ડેડ ગણવામાં આવશે. વેફરને બ્રાન્ડેડ ગણવામાં આવશે, પણ ભાવનગરી ગાંઠિયાને અન્બ્રાન્ડેડ ગણીને પ્રતિબંધિત ગણવામાં આવશે અથવા તો તેના વેચનારને સજા કરવામાં આવશે. આ કાયદામાં ભેળસેળિયા પદાર્થો વેચનારને જેટલી સજાની જોગવાઈ કરવામાં આવી છે, એટલી જ સજાની જોગવાઈ અન્બ્રાન્ડેડ ખાદ્ય પદાર્થો વેચનારને પણ કરવામાં આવી છે.
ફૂડ સેફટી એન્ડ સ્ટાન્ડર્ડ્સ એક્ટનો હેતુ પ્રજાના આરોગ્યની રક્ષા કરવાનો છે, એવું કહેવામાં આવે છે. પ્રજાના આરોગ્યની રક્ષા કરવાની જવાબદારી સરકારને કોઈએ સોંપી નથી. આ જવાબદારી નિભાવવાની સરકારની ત્રેવડ પણ નથી. પ્રજાના આરોગ્યની રક્ષાના બહાને સરકાર પોતાના અધિકારીઓના હાથમાં એવી રાક્ષસી સત્તાઓ સોંપવા માંગે છે, જેનાથી પ્રજાને ડરાવી શકાય, ધમકાવી શકાય અને તેનું શોષણ કરી શકાય. આપણી સરકાર દ્વારા એવા સંખ્યાબંધ કાયદાઓ ઇરાદાપૂર્વક ઘડવામાં આવે છે, જેનો અમલ કરવાનો પ્રજા માટે શક્ય જ ન હોય. આ કાયદાઓ મજબૂરીથી તોડીને પ્રજા ગુનાઇત લાગણી સાથે જીવ્યા કરે છે. તેને આ રીતે ગુલામ રાખવામાં સરકારને સલામતી લાગે છે.
સ્વતંત્રતા પછી જાતજાતના ચિત્રવિચિત્ર કાયદાઓ ઘડીને પ્રજાને સતત આતંકિત રાખવી એ આપણી સરકારની પ્રજાને કાયમ માટે ગુલામ રાખવાની સ્ટ્રેટેજીનો એક ભાગ છે. પ્રજાને આ રીતે ગુલામ રાખવાથી તે ઇન્કમટેકસ, સેલ્સ ટેકસ, સર્વિસ ટેકસ, એકસાઇઝ ડયૂટી, કસ્ટમ ડયૂટી, પ્રોફેશનલ ટેક્સ વગેરે જાતજાતના કરવેરાઓ સામે બળવો કરવાની હિંમત દર્શાવી શકતી નથી. આ રીતે સતત દબાયેલી અને કચડાયેલી પ્રજા જુલમી અને આપખુદશાહી શાસન સામે બળવો કરવાની શક્તિ ગુમાવી બેસે છે અને સરકારને પ્રજાની જેટલી લૂંટફાટ કરવી હોય તે કરવાની સગવડ મળી જાય છે. આ રીતે મનસ્વી કાયદાઓ કરીને પ્રજાને ત્રાસ આપવાની સરકારની અને સંસદની સત્તા જ પ્રજાએ છીનવી લેવાની જરૃર છે. અણ્ણા હઝારેએ લોકપાલ માટે આંદોલન કરવાને બદલે આ પ્રકારના કાયદાઓ સામે આંદોલન કરવું જોઈએ, જેના થકી સરકારી અધિકારીઓને ભ્રષ્ટચાર આચરવાની બેફામ સત્તાઓ મળે છે. સરકારી અધિકારીઓને આપવામાં આવેલી આ સત્તાઓ ઓછી થાય તો લોકપાલની પણ જરૃર રહેતી નથી.
- સુપાર્શ્વ મહેતા

Share |
 

Gujarat Samachar Plus

લીલો રંગ કુદરતની સાથે વ્યક્તિના મનને ખુશી આપે છે
શહેરીજનો હવે કલરફૂલ બ્રેકફાસ્ટ તરફ
બાસ્કેટમાં હેન્ગંિગ ગાર્ડન ઘરમાં જ રહેશે
મોર્ડન ટ્રાઉઝર સાથે ટ્રેડિશનલ કુર્તા
ગિફ્‌ટમાં બુક્કે વીથ ચેરી ફેવરિટ
૧૦૮ સુવિઘાને વેગ આપતી એન્ડ્રોઇડ એપ્લિકેશન સિસ્ટમ
લેપટોપ બોડી પર યુનિક ડીકલ ગ્રાફિક્સ
 

Gujarat Samachar glamour

કાશ્મીરા શાહ-કૃષ્ણા લગ્ન વગર સાથે રહે છે
કંગનાની મહેંદીએ મુશ્કેલી ઉભી કરી
પ્રતિક બબ્બરની ‘ઇશક’ને ફરીવાર એડિટ કરાશે
અરબાઝને ગુસ્સો આવતા જિમમાં જવાનું છોડી દીઘું
તબ્બુ-રણવીરની જોડી યશરાજની ફિલ્મમાં
સની દેઓલ પહેલી વાર ડબલ રોલ કરશે
બિયોન્સ નોલ્સ ડોક્યુમેન્ટ્રી બનાવશે
 
   
   
   
 

Gujarat Samachar POLL

 

Olympics 2012 Photos

webad3 lagnavisha
   

Follow Us

Facebook Twitter
   
 
   

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
       
 
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
• હવામાં ગોળીબાર • ઓનલાઇન
• ઇંટ અને ઇમારત • સિનેમેજિક
• મેરા ભારત મહાન • વિચાર વિહાર
 
plus
 

આજનું કાર્ટુન

arc archive

પૂર્તિઓ

 
 
Gujarat Samachar © 2012 All Rights Reserved