Last Update : 31-July-2012, Tuesday

 

અતિથિ-સત્કારની એટિકેટ્સ

 

‘મોટાં શહેરોમાં વસવાટ કરનારા લોકોને કોઈની તમા નથી હોતી. આંગણે અતિથિ આવીને ઊભા રહે, ત્યારે તેમના ચહેરાના ભાવ પલટાઈ જાય છે. તેઓ પોતાની લાચારીનાં દુઃખડાં રડવા લાગે છે. અથવા તો મહેમાનને પડ્યા રહેવા દઈને પોતે પોતાના કામ-ધંધે જતા રહે છે.....’’ આવા સંવાદ અવારનવાર અનેક લોકો પાસેથી સાંભળવા મળતા હોય છે.
આવા વર્તન માટે અતિથિના ખ્યાલમાં ન આવી હોય તેવી યજમાનની કોઈ લાચારી કે અશક્તિ જવાબદાર હશે? આમ જોઈએ તો મહેમાનોની યોગ્ય સરભરા કરીને પ્રશંસાપાત્ર ગણાવાની સહુ કોઈને ઈચ્છા હોય છે, પણ...... મન મૂકીને આવકાર ન મળતો હોય તેવા મહેમાનોમાં જો તમારો સમાવેશ થઈ જતો હોય, તો થોડી નાની-નાની બાબતો પર ઘ્યાન આપવાથી તમે પણ ‘આવકાર્ય અતિથિ’ બની શકો છો. સહુથી પહેલાં યજમાનની સરભરાની પ્રશંસા કરવામાં જરા પણ કચાશ ન રાખવી. તેમના પક્ષે કોઈ પણ પ્રકારની ત્રુટિ રહી ગઈ હોય, તો તેના તરફ બિલકુલ ઘ્યાન ન દેવાની આદત કેળવી લેવી. મોટા ભાગની ગૃહિણીઓ મહેમાનો માટે ખૂબ જ સંભાળપૂર્વક ભોજન બનાવતી હોય છે, પરંતુ જો મહેમાન ભોજન દરમ્યાન એકાદ વખત પણ ‘‘રસોઈ ખૂબ સ્વાદિષ્ટ બની છે ભઈ! જમવાની ખરેખર બહુ મજા પડી ગઈ......’’જેવું બોલવાને બદલે એકાદ ઊણપનો ઉલ્લેખ કરી બેસે, ત્યારે યજમાનનો સમગ્ર ઉત્સાહ નષ્ટ થઈ જાય છે. ખરી રીતે કોઈ પણ સમજદાર અતિથીની એક નૈતિક ફરજ બની જાય છે કે સામાન્ય ભોજનમાં પણ તેણે વખાણ કરવાં જોઈએ અને તેને વખોડવાનો વિચાર સુઘ્ધાં ન કરવો જોઈએ.
જો તમારાં નજીકનાં સગાં, જેવાં કે ભાઈ, બહેન, નણંદ કે દિયરને ઘેર ગયાં હો અને ત્યાં તમારો અધિકાર પણ હોય, ત્યારે તમારા સ્વાગત માટે ઘણી વસ્તુઓ બનાવવામાં આવી હોય, તો એટલું અવશ્ય કહેવું કે, ‘‘અરે આવડો મોટો અન્નકૂટ ભરવા જેટલી તકલીફ તે લેવાતી હશે? હું ક્યાં પારકી છું? આ બધી વસ્તુઓ બનાવી છે, તેથી તમને ઘણી મહેનત પડી હશે....’’ આટલા સૌહાર્દપૂર્ણ શબ્દો સાંભળતાં જ યજમાન ગૃહિણીનો અડધો થાક તો એમને એમજ ઉતરી જશે. તમારી આવી લાગણીને લીધે ભવિષ્યમાં પણ તમારી સરભરામાં કોઈ ઉણપ તો નહીં જ રહે, બલ્કે તમારા આગમનના સમાચાર મળતાં જ ગૃહિણીનો ઉત્સાહ તમારા સ્વાગત માટે બેવડાઈ જશે, કારણ કે તેને ખ્યાલ છે કે આવનાર વ્યક્તિ તેની મહેનતની કદર કરી જાણે છે.
માઘુરીના પતિને ઑફિસના કામે અવારનવાર અમદાવાદ જવું પડતું હતું, આથી માઘુરી પણ બાળકો સાથે અમદાવાદ ફરવા જતી, કેમકે અમદાવાદમાં માઘુરીની નણંદ રચના રહેતી હતી, એટલે તેના રહેવાનો તો કોઈ પ્રશ્ન જ નહોતો. રચનાએ શરૂઆતમાં તો માઘુરીનું ખરા દિલથી સ્વાગત કર્યું હતું. જ્યારે જ્યારે માઘુરી આવે ત્યારે રચના નવી નવી વાનગીઓ રાંધીને જમાડતી. ઉપરાંત માઘુરીનાં બાળકોની પ્રત્યેક જરૂરિયાતનું પૂરેપૂરું ઘ્યાન રાખતી, પરંતુ માઘુરીના મોમાંથી ક્યારેય એટલા શબ્દો નહોતા નીકળ્યા કે, ‘‘મોટી બહેન! તમે દર વખતે આટલી બધી મહેનત કરીને અમારી સરભરા કરો છો, પણ અમે કંઈ મહેમાન થોડાં જ છીએ? અમે તો ઘરનાં જ ગણાઈએ’’ વળી તેનાં બાળકો ગંદા પગ લઈને સોફા કે પલંગ પર ચડે, તો પણ માઘુરીને તે અટકાવવાની બિલકુલ દરકાર નહોતી. આ કારણે ધીમે ધીમે રચનાનો ઉત્સાહ માઘુરીના આગમન સમયે ઓસરવા લાગ્યો. સંબંધો મજબૂત બનવાને બદલે ઘસાવા લાગ્યા.
આજના દોડાદોડીભર્યા ધમાલિયા જીવનમાં સહુને સમયની ખેંચ પડતી હોય તેવા સંજોગોમાં યજમાનના સમયનો પણ પૂરેપૂરો ખ્યાલ રાખવો જોઈએ. ઘરનાં કામોમાં તેની મદદ કરવાનું સમજદાર અતિથિએ ભૂલવું ન જોઈએ. આ ઉપરાંત મહેમાને પોતાના અંગત ગમા-અણગમાને યજમાન પર ઠોંકી બેસાડવાનો આગ્રહ પણ ન રાખવો જોઈએ. ધારો કે જમવાનો સમય થયો હોય અને ભોજન સામગ્રી પણ તૈયાર હોય, ત્યારે યજમાન શિષ્ટતા દર્શાવવા મહેમાનને એવું પૂછે કે, ‘‘જમતાં પહેલાં તમને ચા-કૉફી લેવાનું ફાવશે કે કંઈ ઠંડુ?’’ ત્યારે ડાહ્યાં મહેમાને એવો જવાબ આપવો જોઈએ કે, ‘‘બસ જમી જ લઈશું. ચા વગેરેની કશી જ જરૂર નથી, છતાં એવું લાગશે તો પછીથી જોઈ લેશું.’’ અન્ય સંજોગોમાં જમવાનો સમય થયો હોય છતાં ભોજન તૈયાર ન હોય, ત્યારે મહેમાને પોતાના વર્તનથી યજમાનને રજમાત્ર આભાસ ન થવા દેવો જોઈએ કે જમવાની તમને ઉતાવળ છે, બલ્કે તમને મોડા જમવામાં જ મજા આવે છે તેવું આડકતરી રીતે જણાવવું જોઈએ. જેથી યજમાન કશા પણ માનસિક બોજ વિના પોતાનું રસોઈ કાર્ય કરી શકે.
યજમાનને તેમના ઘરના વ્યવહાર કે ઘરની સાજ-સજાવટ બાબતમાં સામે ચાલીને વણમાગી સલાહ આપવાનું ટાળવું જોઈએ. સરવરી જયારે પણ કોઈના ઘેર જાય, ત્યારે યજમાને બનાવેલી વસ્તુ ગમે તેટલી સારી બની હોવા છતાં એ પોતાના તરફથી સલાહ-સૂચન ભૂલ્યા વિના કરતી જ હોય છે. તેની ખાસ સાહેલી શાલિનીએ એક વખત તેના માટે ખૂબ મહેનત લઈને સ્વાદિષ્ટ ફ્રૂટચાટ બનાવ્યું હતું, પણ સરવરીએ તડ અને ફડ કરતાં કહીં દીઘું કે, ‘‘અરે શાલિની? તે આમાં ગુલાબજળ નથી નાખ્યું? મારાં છોકરાં તો ગુલાબજળ વિનાના ફ્રૂટચાટને અડતાં જ નથી.’’ તેની આ વાતથી શાલિનીનો તમામ ઉત્સાહ ઠંડો પડી ગયો અંને તેનું મોં ઉતરી ગયું.
તમે કે તમારાં કુટુંબીજનો અમુક ચોક્કસ વસ્તુ ન ખાતાં હો અને એજ વસ્તુ ડાઈનંિગ ટેબલ પર પડી હોય અથવા યજમાન તમને પ્રશ્ન કરે છે, ‘‘તમને ફલાણી વસ્તુ ફાવશે?’’ ત્યારે વળતા જવાબમાં ભૂલથી પણ એવું ન કહેવું જોઈએ કે, ‘‘અમે તો આવી ચીજ કોઈ દિવસ ખાતા જ નથી.’’ આવી વાતથી યજમાનના ઉત્સાહમાં એકદમ ઓટ આવી જશે. પસંદ ન હોય તેવી વસ્તુ તમે સાવ ઓછી માત્રામાં લઈને જમી શકો અથવા અન્ય વાનગી જોઈને વાત પણ ઉપજાવીને કહી શકો કે, ‘‘વાહ, આ તો મને ખૂબ જ વહાલી વાનગી બનાવી છે. તે હોય પછી મારે અન્ય વસ્તુઓ સાવ જ ઓછી જોઈએ......’’ એમ કહીને પ્રસંગ સાચવી લેવાની આવડત કેળવવી.
હેતલ તેના પિતા સાથે રંજનાને ઘેર જમવા ગઈ હતી. રંજના કઢી ખૂબ જ સ્વાદિષ્ટ બનાવતી હોવાથી તેણે અન્ય વાનગીઓ ઉપરાંત કઢી પણ બનાવી હતી. ભોજન પીરસતી વખતે તેણે હેતલને સાહજિક રીતે પૂછ્‌યું, ‘‘અંકલને કઢી તો ભાવે છે ને?’’ ત્યારે હેતલે એમ કહેવું જોઈતું હતું કે, ‘‘તમે પપ્પાની પસંદગીની આટલી બધી વસ્તુઓ બનાવી છે, તો કદાચ તે કઢી ઓછી લે, તો નવાઈ નહીં.’’ પરંતુ તેને બદલે એક ઘાએ બે કકડા કરવાના હોય તેમ તરત જ તે બોલી ઉઠી, ‘‘અરે ખાવાની વાત તો એક બાજુ એ રહી, પણ પપ્પા તો કઢી જોતાંની સાથે જ ખૂબ ચિડાઈ જાય છે. અમે ઘરમાં જ્યારે જ્યારે કઢી બનાવીએ, ત્યારે પપ્પા આવે તે પહેલાં જ તપેલું પણ સાફ કરી નાખવું પડે છે......’’
રંજનાને હેતલની વાતથી ઘણું માઠું લાગ્યું પણ ગમ ખાઈને જે વાત હેતલે કહેવી જોઈતી હતી. તે પોતાની પરિસ્થિતિ સહજ બનાવવા માટે રંજનાએ કહેવી પડી હતી કે, ‘‘હશે, કશો વાંધો નહીં. કઢી સિવાય પણ બીજી ઘણી વાનગીઓ બનાવી છે, એટલે કદાચ અંકલને માફક આવશે......’’
યજમાનના નાના ઘર બાબતમાં કદી પણ આલોચના ન કરવી. મકાન ખૂબ મોટું અને આરામદાયક હોય, તદુપરાંત તમને અને તમારાં સંતાનોને અલગ અલગ ઓરડામાં સૂવાની આદત હોય, છતાં યજમાનના ઘરની સગવડ અને પરિસ્થિતિ પારખીને, જરૂર પડે તો તમારી સાથે તમારાં બાળકો ઉપરાંત યજમાનનાં બાળકોને પણ તમને ફાળવેલ ઓરડામાં, એમ જણાવીને સુવાડવા માટે તૈયારી બતાવવી કે, ‘‘બાળકો રાતના સૂતાં સૂતાં વાત કરશે, તો મૈત્રી વધારે પાકી થઈ જશે.’’થોડા દિવસો પહેલાં રત્નાની જેઠાણી સૌરાષ્ટ્રના એક નાના ગામડામાંથી અમદાવાદ આવી હતી. ગરમીના દિવસોમાં જેઠાણીને અગાશીમાં સૂવાની ટેવ હતી. જીવરાજ પાર્ક વિસ્તારમાં આવેલો રત્નાનો બે બેડરૂમનો ફલેટ અતિશય હવાની અવરજવર વાળો હતો, છતાં તેની જેઠાણી વારંવાર એમ જ કહ્યા કરતી હતી કે, ‘‘તમે લોકો બાળકો સાથે એક જ ઓરડામાં ‘કઈ રીતે સૂઈ શકો છો? મને તો આખી રાત નીંદર જ ન આવી. આપણા ઓરડામાં જ બાળકો માટે અલગ ખાટલો નાખવાનું મને બહુ વિચિત્ર લાગે છે. લોકો તો ગાંડા લાગે છે કે અમદાવાદ-અમદાવાદ કરીને ખુશ થાય છે. બળ્યું, અમદાવાદમાં તે કંઈ રહેવા જેવું છે?’’ રત્ના કશું બોલી નહીં અને સંબંધોનું માન જાળવીને ગમ ખાઈ ગઈ.
બાળકોને લઈને કોઈ સંબંધીને ઘેર ગયાં હો અને જો બાળકો બેઠક રૂમમાં સજાવટ માટે ગોઠવેલી વસ્તુઓને અડા-અડ કરતાં હોય, ત્યારે તેમને અટકાવવાનું દરેક મહેમાનનું કર્તવ્ય છે, નહીં તો આખરે યજમાને જ તેમને અટકાવવા માટે કહેવું પડશે કે, ‘‘ડાહ્યાં છોકરાંઓ બૂટ કાઢીને સોફા પર શાંતિથી બેસે છે અને કોઈ ચીજને અડા-અડ કરતાં નથી. બોલો, તમે ડાહ્યાં બનવા માગો છો?’’ આનાથી તમારાં બાળકોની ઉદ્‌ંડતાની સાથોસાથ, તમારા પોતાના અસંસ્કારીપણાની છાપ યજમાનના હૃદયમાં કોતરાઈ જશે અને તમારા માટેના કૂણા ભાવમાં એકદમ પરિવર્તન આવી જશે.......
યજમાનને ક્યારેય પણ કોઈ વસ્તુ ઓછી પડશે એવો સંકેત કરી સજાગ કરવાનો પ્રયાસ કરવાને બદલે, શાક, ફરસાણ, દૂધ કે મીઠાઈ એને પ્રમાણમાં સહુની વચ્ચે થોડું થોડું જ પીરસવું. આમ કરવાથી યજમાન મનોમન છોભીલા પડવાને બદલે તમારી સમય સૂચકતાથી આનંદિત થશે.
નીલાની દેરાણીનાં બાળકોને આખા દિવસ દરમ્યાન ચાર વખત દૂધ પીવાની ટેવ હતી. જ્યારે તેની દેરાણી આવે, ત્યારે નીલાએ ઘણું જ દૂધ મંગાવી રાખવું પડતું આમ છતાં પણ વારંવાર ચા-કૉફી બનાવવામાં તેમજ મહેમાનોની હાજરી ને કારણે દૂધ ખલાસ થઈ જતું. બાળકોને દૂધ પિવરાવી લીધા પછી જો અડધા લિટર જેટલું દૂધ બાકી વઘ્યું હોય, તો પણ તેની દેરાણી તો દૂધ ખલાસ થઈ ગયું’’ એમ જ કહેતી, ત્રણ કલાક પહેલાં હવે તેનાં બાળકોને દૂધની જરૂર પડવાની નથી અને ચા-કૉફી બનાવવા માટે પૂરતું દૂધ ઘરમાં હાજર છે, વળી એકાદ કલાક પછી તો તાજું દૂધ આવી જવાનું છે, એ બધી બાબતની દેરાણીને ખબર હોવા છતાં તેને દૂધ ખૂટી પડ્યાની વાત જાણી જોઈને જણાવ્યા કરતી હતી. એકાદ-બે વખત તો નીલાએ ધીરજ છોડીને કહી પણ દીઘું કે, ‘‘હવે તાજું દૂધ આવવાનો સમય તો થવા આવ્યો છે પછી એટલી વારમાં દૂધની જરૂર ક્યાં પડવાની છે?’’
જો યજમાન પોતાની ફરજ સમજીને તમને ફ્રૂટજ્યૂસ કે સૂકો મેવો વગેરે ધરે, ત્યારે લધુતા-ભાવથી કદી ભૂલથી પણ એવું ન બોલશો કે, ‘‘અમે તો અમારાં બાળકોને ફળ કે મેવો ખવરાવવાનું વિચારી પણ ન શકીએ. અમારી આવકમાંથી તો બે વખત ભોજનની જ સગવડ માંડ થઈ શકે છે, ત્યાં........’’
રેશમાએ પોતાની ભાભીની મહેમાનગતી કરવા માટે વિવિધ ફળો મંગાવ્યા હતાં, પણ તેની ભાભી રેણુકા વખાણ કરવાને બદલે કટાક્ષભર્યા શબ્દો બોલી, ‘‘તમે આવા ખર્ચા કરીને કઈ રીતે મોઘાં ફળ મંગાવી શકો છો, મોટી બહેન? અમારા પગારમાંથી તો અમે બે ટાઈમના રોટલા ખાવામાં જ પરાણે પહોંચી શકીએ છીએ.’’
રેણુકાના આ શબ્દોનો ઘ્વનિ રેશમાના પતિ અને પોતાના નણદોઈને લાંચિયા સ્થાપિત કરતો હતો. રેશમાએ મનોમન ગાંઠવાળી લીધી કે ત્યાર પછી રેણુકાની સરભરા માટે ભૂલથી કદી મીઠાઈ પણ ન મંગાવવી...... યોગ્ય સરભરા યોગ્ય મહેમાનોને જ મળે. ગમે તેની એવી આગતા-સ્વાગતા કરીએ તો આવું સાંભળવું પડે.
જેને ત્યાં તમે મહેમાન બનીને ગયાં હો તે પતિ-પત્ની બન્નેને પોતાની નોકરી પર પહોંચવાનું હોય અથવા તો તમે તેમને ત્યાં પહોંચો તે પહેલાં તેઓ પોતાના અંગત કામ માટે બહાર જવાની તૈયારીમાં હોય, તો તમારી ફરજ એ બને છે કે તમારે તેમને સ્પષ્ટ રીતે સમજાવી દેવું જોઈએ, ‘‘તમે જરા પણ ચંિતા કર્યા વિના જઈ આવો અને તમારું કામ પહેલાં પતાવી આવો. ત્યાં સુધીમાં અમે પ્રવાસનો થાક, ઊતારી લઈશું. ઈચ્છા થશે તો ચા-પાણી પણ જાતે બનાવીને પી લઈશું. એનું તમે જરાય ભારણ ન રાખશો.’’ આ રીતે કહેવાથી તમે સમજદાર મહેમાન તો પુરવાર થશો જ, પરંતુ સાથોસાથ યજમાનના મનમાં તમારા પ્રત્યે માનની લાગણી જન્મશે.
તમે જ્યારે મહેમાન તરીકે કોઈને ત્યાં જતાં હો, ત્યારે યજમાનનાં સંતાનોની ઉંમર ઘ્યાનમાં રાખીને તેમને માટે કોઈ ભેટ-સોગાદ કે મીઠાઈ લઈ જવાનું ખાસ યાદ રાખજો. તમે પસંદ કરેલી ભેટ-સોગાદ ભલે બહુ મૂલ્યવાન ન હોય, પરંતુ તેમનાં સંતાનને કામ લાગે તેવી અવશ્ય હોવી જોઈએ. આનાથી યજમાનનાં બાળકો અને ખુદ યજમાન તમને લાગણી સહિત યાદ કરશે. આ ઉપરાંત ખાસ ઘ્યાન રાખવા જેવી બાબત એ છે કે ક્યાંય જતી વખતે તમારી જરૂરિયાતની ચીજો સાથે લઈ જવાનું ભૂંલાય નહીં, તેની ખાસ તકેદારી રાખવી, જેથી યજમાનને ઓછામાં ઓછી તકલીફ પડે. નાનું બાળક સાથે હોય તો પ્લાસ્ટિકની ચાદર, તેના માટે દૂધના પાવડરનો ડબ્બો, તેની પસંદગીનો કોઈ ચોક્કસ ખોરાક હોય તો તે પણ સાથે લઈ લેવો, નહીં તો પરિસ્થિતિ એવી ઊભી થઈ શકે કે તમારા ત્યાં પહોંચવાની સાથે જ યજમાનને એ ખરીદવા માટે બજારમાં જવું પડે. આ ઠીક ન ગણાય, કારણ કે એક તો તમારા જવાથી તેના રોજંિદા કામકાજમાં વધારો થાય અને તદુપરાંત તમારા બાળકની જરૂરિયાતો સંતોષવા તેમણે જહેમત ઉઠાવીને સમય અને પૈસા બન્ને ખર્ચવા પડે.
જવાના સ્થાને પહોંચવાના સમયનો પણ ખાસ ખ્યાલ રાખવો. જો તમે તમારા પોતાના અંગત વાહનમાં જતાં હો, તો યોગ્ય સમયે જ પહોંચવાનો આગ્રહ રાખો. એવું ન બનવું જોઈએ કે રાહ જોઈ રહેલા યજમાનને ઉજાગરો વેઠવો પડે. આવું જરાય યોગ્ય નથી, પણ જો તમે ટ્રેનમાં જતાં હો, તો બને ત્યાં સુધી વેળાસર પહોંચાય તેવી ટ્રેન પસંદ કરવી, પરંતુ જો મોડા પહોંચવાનું હોય, તો ભોજનનો પ્રબંધ કરીને નીકળવું, જેથી મોડી રાત્રે તમે યજમાનને ઘેર પહોંચો, ત્યારે તેણે નવેસરથી તમારા માટે રસોઈ ન કરવી પડે.
અમુક ચોક્કસ મર્યાદાથી વધારે અપેક્ષાઓ યજમાન તરફથી ન રાખવી જોઈએ, કારણ કે મોટાં શહેરોમાં સહુને સમયની ભારે ખેંચ અનુભવવી પડતી હોય છે. મોટું શહેર અને મુખ્ય મથક હોવાથી મહેમાનોની અવર-જવર પણ વધારે રહેતી હોવાથી યજમાન પોતાના અતિથિની પ્રત્યેક અપેક્ષા ન જ સંતોષી શકે. આમ છતાં પણ મહેમાન મર્યાદા કરતાં વઘુ અપેક્ષા રાખે, તો યજમાનના વર્તનમાં ખાસ ઉત્સાહ નહીં રહે. દાખલા તરીકે કડકડતી ઠંડી રાતે કે ઉનાળાના બળબળતા બપોરે યજમાન સ્ટેશને લેવા કે મૂકવા આવે તેવો આગ્રહ કે અપેક્ષા મહેમાન રાખે, તો એ યજમાન માટે માથાનો ઘા થઈ પડે છે. આમ છતાં પણ યજમાન ઔપચારિક બનતા હોય, તો ખુદ મહેમાને સામે ચાલીને જણાવવું જોઈએ કે, ‘‘પ્લીઝ, અમને શરમાવો નહીં. ટૅક્સી કે રિક્ષામાં પહોંચી જતાં વાર કેટલી? અમે તો આરામથી પહોંચી જઈશું અને તમારે એકલા જ પાછા આવવું પડશે..... તમે અમારી ફિકર ન કરો......’’
આ રીતે નાની નાની વાતો ઘ્યાનમાં રાખીને તમે યજમાનમાં મનગમતાં મહેમાન બની શકશો અને તેને લીધે તમારું ઉષ્માભર્યું સ્વાગત તો થશે જ, પણ સાથોસાથ ભવિષ્યમાં ફરીથી આવવાનો પણ આગ્રહ કરવામાં આવશે.
સરિતા

Share |
 

Gujarat Samachar Plus

શ્રાવણના મીની વેકેશનનું છોટું પ્લાનીંગ
ફ્રેશર્સ પાર્ટીને બદલે ગુજરાતી ભાષા સપ્તાહ મનાવ્યો
ભાઈને વૃઘ્ઘાશ્રમમાંથી પોતાના ઘરે લઈ આવતી બહેન
નિફ્‌ટના અઢી લાખના ફોરકાસ્ટ મેગેઝીનમાં ફેશનની આગાહી
ટ્રાન્સપરન્ટ સાડીમાં સેક્સી લૂક
મોન્સૂનમાં ઓઇલી નાસ્તો હેલ્થને નુકસાન કરે છે
ફેશન ઓફ આર્મી એસેસરીઝ
 

Gujarat Samachar glamour

સોનાક્ષી સલમાનના પુત્રની માતા બનશે
સલમાન અને શાહરૂખ એક સાથે જોવા મળશે
‘આરાધના’ ને ન્યુ બોટલ ‘ટોપગન’માં પિરસાશે
પ્રીટી ‘ભૈયાજી સુપરહિટ’માં આક્રમક પત્નિ બનશે
નેક્સ્ટ ફિલ્મમાં ડિફરન્ટ રોલમાં હોઈશ
નરગિસ ટુંકા હીરો સાથે જોડી બનાવવા તૈયારી છે
ઝેબથી કંટાળેલા અદનાનને છૂટાછેડા મળતા નથી
 
 
   
   
   
 

Gujarat Samachar POLL

 

Olympics 2012 Photos

webad3 lagnavisha
   

Follow Us

Facebook Twitter
   
 
   

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
       
 
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
• હવામાં ગોળીબાર • ઓનલાઇન
• ઇંટ અને ઇમારત • સિનેમેજિક
• મેરા ભારત મહાન • વિચાર વિહાર
 
plus
 

આજનું કાર્ટુન

arc archive

પૂર્તિઓ

 
 
Gujarat Samachar © 2012 All Rights Reserved