Last Update : 29-July-2012, Sunday

 

ખાનગી જીવનમાં ડોકિયું કરતા પ્રાઈવેટ ડિટેક્ટીવોની દુનિયા

હોટલાઇન - ભાલચંદ્ર જાની
- વેપાર-ધંધાર્થે વારંવાર બહારગામ જતો પતિ કે પોતાના વ્યવસાયમાં ખૂબ આગળ નીકળી ગઈ હોય એવી પત્નીનો પતિ સામે ચાલીને ખાનગી જાસૂસોને પોતાની બૈરી પર નજર રાખવાનું કહે છે. તો બીજી તરફ સગાઈ પૂર્વે જ કન્યા કે મૂરતિયાની ચાલચલગત,
ખાસ ટેવ કુટેવ, સામા પક્ષની આર્થિક સ્થિતિ, ખાનદાન વગેરે બાબતોની જાણકારી મેળવવા ખાનગી ડિટેક્ટીવોની મદદ લેવાનો શિરસ્તો જોર પકડતો જાય છે

સોનાલી શાહના બે વર્ષ પૂર્વે અમેરિકામાં રહેતા મનોજ સાથે લગ્ન થયાં ત્યારે તેની ખુશી સમાતી નહોતી. સોનાલીના માતાપિતા પણ વિદેશી વરરાજા મળ્યા એ બદલ ધન્ય થઈ ગયા એમ સમજતા હતા. તેમને મન એવું હતું કે હવે આપણી દીકરી અમેરિકામાં વસી જઈ એશ-આરામ કરશે. પરંતુ લગ્નના છ મહિના બાદ જમાઈ મનોજે સોનાલીને અમેરિકા તેડાવી પછી ધીરે ધીરે પિકચર બદલાવા લાગ્યું.
મેટ્રિમોનિયલ જાહેરખબર દ્વારા ગોઠવાયેલાં આ લગ્ન એક મહાન છેતરપંિડીનો કેસ પૂરવાર થવા લાગ્યો. એવું નહોતું કે મનોજ પાસે ગ્રીન કાર્ડ નહોતું. મનોજ દેખાવડો પણ હતો. સાવ ઠોઠ, ગમાર પણ ન કહી શકાય. પરંતુ એ ખૂબ રંગીન સ્વભાવનો હતો. સોનાલી લગ્ન પછી છ મહિના બાદ અમેરિકા ગઈ ત્યારે તેને ખબર પડી કે તેના સાજનના ઘરમાં એક સજનીતો તેની પહેલાં આવીને જ વસી ગઈ છે. હા, મનોજ પરણેલો હતો અને તેને એક દીકરો પણ હતો. સોનાલીએ તો ફક્ત મનોજના ઘરની નોકરાણી બનીને અમેરિકામાં રહેવાનું હતું અને જરૂર પડે મનોજની શારીરિક ભૂખ સંતોષવાની હતી.
આ બઘું જાણ્યા, અનુભવ્યા પછી સતત માનસિક અજંપો ભોગવતી સોનાલી એક દિવસ ચાન્સ મળ્યો એટલે મનોજની ચુંગાલમાંથી છુટી ઇન્ડિયા પાછી આવી ગઈ. મા-બાપે તેને સ્વીકારી તો ખરી, પરંતુ કોડ ભરેલી કન્યા સોનાલીની જંિદગી ખારી થઈ ગઈ.
* * *
બાવીસ વર્ષની તોરલ પટેલ ગ્રેજ્યુએટ થયા પછી નોકરીની શોધ કરતી હતી ત્યાં તેના માસી ખબર લાવ્યા કે લંડનમાં રહેતાં એક ચરોતર પાટીદારના શ્રીમંત કુટુંબનો ઉંમરલાયક છોકરો તોરલ માટે યોગ્ય વર છે. તોરલના માતાપિતા માસીની ઉપરછલ્લી વાતોથી ખુશ થઈ ગયા. તેમણે ઝાઝી પૂછપરછ કરવાની કે છોકરા પક્ષના ખાનદાનના મૂળ તપાસવાની દરકાર કરી જ નહિ. ઝટપટ સગાઈ અને ચટપટ લગ્ન લેવાયા. પરણીને તોરલ લંડન ગઈ ત્યારે એક દિવસ તેના પતિ રમેશ પટેલે સીધેસીઘું, ચોખ્ખા શબ્દમાં કહી દીઘુંઃ ‘જો, તોરલ, મારો કોઈ મોટો બિઝેનસ નથી કે હું નોકરી પણ કરતો નથી. માત્ર ટેક્સી ચલાવીને ઘર ચલાવું છે. મને દારૂ પીવાની આદત છે એટલે મારા પપ્પા-મમ્મીએ મને કાઢી મૂક્યો છે. હવે પછી આપણે એક નાના એપાર્ટમેન્ટ બ્લૉકમાં રહેવાનું છે.
તોરલ પતિની આ વાત સાંભળીને હેબતાઈ ગઈ. તેને થોડો આઘાત લાગ્યો. છતાં તેણે જાત સંભાળી લઈ પોતાનો આત્મવિશ્વ્વાસ બુલંદ કરીને કહ્યું કે ‘‘તું જે કરતો હતો તે વાત હું ભૂલી જવા તૈયાર છું. પણ હવે નવેસરથી જંિદગી જીવીએ.’’ તોરલે રમેશ અંગેની સાચી હકીકતો તેના માતાપિતાને પણ ન જણાવી. તે એમ સમજતી હતી કે પ્રેમ અને સંબંધોની હૂંફ દ્વારા એ રમેશની જંિદગીમાં પરિવર્તન લાવી શકશે. પરંતુ મહિનાઓ વીતી ગયા છતાં રમેશના સ્વભાવમાં કે તેના વર્તનમાં કોઈ ફરક ન પડ્યો. ઉલ્ટાનો રમેશ દારૂ અને ડ્રગ્સના વ્યસનમાં વઘુને વઘુ ખુવાર થતો ગયો. પૈસા ખૂટી જતાં તેણે તોરલના ઘરેણાં પર પણ તરાપ મારી. આ દરમિયાનમાં તોરલે એક દીકરીને જન્મ આપ્યો હતો એટલે કુટુંબ નિર્વાહનો બધો બોજ તેને માથે જ હતો. પારકા દેશમાં પતિના વિચિત્ર વર્તનથી ત્રાસી ગયેલી તોરલે છેવટે ભારત પાછી ફરી છૂટાછેડા લીધા. તેને તેની દીકરી તો મળી પણ ઘરેણાં બધા ગુમાવવા પડ્યા.
ઉપર જણાવેલા સોનાલી અને તોરલ, બેઉના કેસમાં લગ્નને કારણે જીવન બરબાદ થઈ ગયું. જો આ બેઉ કન્યાના માતાપિતાએ તેમજ બીજા વડીલોએ વર પક્ષના સગાં સંબંધીઓ, પરિવારજનો વિશે પૂછપરછ કરાવી, પૂરતી માહિતી મેળવીને પછી લગ્ન અંગે નિર્ણય કર્યો હોત તો પસ્તાવાનો વારો ન આવત.
હવે તો પ્રાઈવેટ ડિટેક્ટીવોની સહાય લઈ અને છોકરાવાળા કે છોકરીવાળા સામસામા ઉમેદવારો અંગેના કેરેક્ટર રિપોર્ટ મગાવી શકે છે. ખાનગી જાસૂસો આ કામ માટે ચોક્કસ રકમની ફી લઈને વ્યવસાયી ધોરણે જરૂરી બાતમી એકઠી કરી આપે છે.
જેમ ધંધા-ઉદ્યોગ, વેપારમાં છેતરપંિડી, ઠગાઈ, લૂંટફાટના કિસ્સા વધી ગયા છે તેવી જ રીતે લગ્નના બજારમાં પણ હવે બેઈમાની વધી છે. લગ્ન પૂર્વે તેમજ લગ્ન કર્યા પછી પણ યુવક-યુવતી એકબીજાને છેતરતાં રહે, ઉલ્લું બનાવતા રહે અને કાવતરાં કરીને ફસાવતા રહે તેવા કિસ્સા બને છે. ખાસ કરીને છોકરાવાળા લગ્ન પૂર્વે પોતાનો વટ પાડવા અને દહેજમાં તગડી રકમ પડાવવા પોતાનું સ્ટેટસ ઊંચુ હોવાનો ડોળ કરે છે. તેઓ મોટા મોટા દાવા કરે છે. જેનાથી અંજાઈને લગ્ન કરનાર યુવતીએ પાછળથી પતિ દેવ તથા સાસરિયાની કંગાળ હાલતમાં પીસાવું પડે છે. આવું ન બને માટે બે જ માર્ગ છે. કાં તો છોકરીના ઘરનાં જ સભ્યો પોતાના બીજા રિશ્તેદારોની સહાયથી છોકરાવાળાના ખાનદાન અંગે પૂરતી તપાસ કરાવડાવે અથવા પછી આ કામ કોઈ ખાનગી ડિટેક્ટીવ એજન્સીને સોંપી દે.
આજકાલ મુંબઈમાં સંખ્યાબંધ ખાનગી જાસૂસોની એજન્સીઓ ઊભી થઈ છે જે નિર્ધારીત ફી લઈને તમે ઇચ્છો એ માણસની ‘જન્મ કુંડળી’ જાણી લાવે છે. અર્થાત, જે કોઈ યુવક કે યુવતી અંગેનો કેરેકટર રિપોર્ટ મેળવવો હોય તે કામ આસાનીથી પાર પાડે છે.
ધારી લો કે લગ્ન પૂર્વે, અરે વિવેશાળ થાય તે પહેલાં જ કન્યા પક્ષના વડીલો મૂરતિયા અંગે પૂરી છાનબીન કરવા ઇચ્છતા હોય તો આવી એજન્સીઓના ડિટેક્ટીવ થોડા દિવસોમાં છોકરાની પૂરી માહિતી લાવી આપે છે. પરણવા ઇચ્છુક યુવક શું ભણ્યો છે, ક્યાં ભણ્યો છે, ભણવામાં કેટલો હોશિયાર હતો, નોકરી કે ધંધો ક્યાં અને કયા પ્રકારનો કરે છે, શું કમાય છે, ઘરમાં કોણ કોણ છે, યુવકને કયા પ્રકારની આદતો છે, ફુરસદના સમયે એ શું કરે છે, એના મિત્રો કેવા પ્રકારના છે, વગેરે તમામ જાણવા જેવી માહિતી ખાનગી જાસૂસો પોતાની ઢબથી એકત્ર કરી લાવે છે.
મુંબઈની એક જૂની અને જાણીતી ડિટેક્ટીવ એજન્સીના સંચાલકે અમને જણાવ્યા મુજબ અખબાર-મેગેઝિનોમાં આવતી લગ્ન વિષયક જાહેરખબરો વાંચીને મેરેજ થવાના હોય, અથવા મૂરતિયો બીજી જ્ઞાતિનો કે પરપ્રાંતનો અથવા વિદેશમાં સ્થાયી થયેલો હોય તેવા કેસમાં કોઈપણ પગલું ભરતાં પૂર્વે તેની ચાલ-ચલગત વિશે તેમજ ખાનદાન, આર્થિક સઘ્ધરતા અંગે પૂરી તપાસ કરી લેવી જોઈએ.
મહારાષ્ટ્ર સરકારના એક વરિષ્ઠ અમલદારની દીકરી સુકન્યાના લગ્ન એક યુવાન સાથે થવાના હતા. આ યુવકે મરાઠી અખબારમાં છપાયેલી મેટ્રિમોનિયલ જાહેરખબર વાંચીને પોતાની અરજી ફોટા સાથે મોકલી હતી. પત્રમાં તેણે એવું જણાવ્યું હતું કે પોતે ડબલ ગ્રેજ્યુએટ છે અને એક ખાનગી કંપનીમાં નોકરી કરે છે. પરંતુ સુકન્યાના પિતાએ એક ડિટેક્ટીવની મદદ લઈ આ યુવક વિશે પૂછપરછ કરાવી ત્યારે ખબર પડી કે એ તો ભાડુંપની એક ઝંૂપડપટ્ટીમાં રહે છે અને મેટ્રિક પાસ કર્યા પછી બેન્કમાં પટાવાળાની નોકરી કરે છે.
એવું પણ નથી કે લગ્ન પૂર્વે જ ડિટેક્ટીવો દ્વારા આવી તરતપાસ થાય છે. હવે તો લગ્ન પછી અને તે પણ દાંપત્યજીવનના બે-ત્રણ દાયકા વીત્યા પછી સુઘ્ધાં પતિ કે પત્ની એકબીજાને શંકાની નજરે જુએ એટલે ખાનગી ડિટેક્ટીવની મદદ લે છે. પુરુષ બેવફા બનેલી પત્ની પાછળ જાસૂસ છોડે છે, તો પત્ની બહાર લફરાં કરતા કે આર્થિક સંકટો ઊભા કરતા પતિદેવ પાછળ ડાઘિયા કૂતરાં જેવા જાસૂસને છોડે છે.
એક ખાનગી ડિટેક્ટીવના જણાવ્યા મુજબ પતિને જો શંકા જાય કે તેની પત્ની કોઈ પરપુરુષ સાથે આડા સંબંધ ધરાવે છે તો તે બહુ જલ્દી ખાનગી ડિટેક્ટીવ એજન્સી પાસે દોડી જાય છે. ખાસ કરીને કોઈ સાધારણ ઘરનો યુવાન પૈસાદાર બાપની બેટીને પરણીને સંસાર માંડે પછી થોડાં સમય બાદ પત્ની પતિના દાબમાં રહેતી નથી. વાત વાતમાં પતિને મહેણાં મારી આઝાદપણે વર્તે છે. આવી વંઠેલ પત્નીઓને યુવાન પ્રેમી સાથે પ્રણયના ફાગ ખેલવામાં અનેરો આનંદ આવે છે.
ડિટેક્ટીવ સુનીલ નંદાના જણાવ્યા મુજબ ઘણીવાર તો ૪૦ વર્ષની વય વટાવી ચૂકેલી યુવતી ૨૦-૨૨ વર્ષના કોલેજિયન યુવકના પ્રેમમાં પડી હોવાના કિસ્સા પણ પ્રકાશમાં આવ્યા છે. વાલકેશ્વ્વરમાં રહેતાં એક શ્રીમંત હીરાના વેપારીની દીકરી મોના ઘાટકોપરમાં રહેતાં ઉમેશ નામના એક ગુજરાતી એન્જિનિયરની સાથે પરણી તો ખરી. પરંતુ ઉમેશની સ્થિતિ એટલી સારી તો નહોતી કે એ પૈસાદાર બાપની, ખૂબ લાડકોડમાં ઉછરેલી મોનાના બધા જ શોખ પૂરાં કરી શકે. મોનાને દર અઠવાડિયે ડિસ્કોથેકમાં ડાન્સ કરવા જવાનો શોખ. એન્જિનિયર ઉમેશ એક મોટી કન્સ્ટ્રકશન કંપનીમાં નોકરી કરતો હતો. એ ક્યારેક પોતાની ઇચ્છા વિરુદ્ધ પણ મોનાને ડિસ્કોથેકમાં લઈ જતો પરંતુ ત્યાંના માહોલમાં બધા વચ્ચે મિક્સ થતાં એને આવડતું નહોતું અને તેને આવા નાચગાન પસંદ પણ નહોતા. એ તો દિવસ-રાત મહેનત કરી પોતાની કારકિર્દીને ઉજ્જવળ બનાવવાની લગન ધરાવતો હતો. કેટલીકવાર સાઈટ સુપરવિઝનના કામસર તેને પૂના, કોલ્હાપુર, સાંગલી વગેરે સ્થળોએ જવું પડતું.
આવા જ એક પ્રસંગે ઉમેશની ગેરહાજરીમાં મોના એકલી ડિસ્કોથેકમાં ડાન્સ કરવા ગઈ અને રાજન નામના પંજાબી યુવકની સાથે મૈત્રી બાંધી તેને ઘેર તેડી લાવી. પછી તો બેઉ જણ વચ્ચે સંબંધ વિકસતા ગયા. ઉમેશ ઘરમાં હોય ત્યારે પણ તે રાજનને ઘરે બોલાવતી. તેની આગતાસ્વાગતા કરતી અને પોતાના જ બેડરૂમમાં ેબેસી કલાકો સુધી ગપ્પાગોષ્ઠી કરતાં ઉમેશને મોના-રાજન વચ્ચેની આ મૈત્રી રુચી નહીં. તેણે એક-બે વાર મોનાને આવી ફ્રેન્ડશીપ રાખવા માટે મના કરી. પરંતુ પછી તો કમાન છટકે તેમ મોના વઘુ વીફરી અને વારંવાર ઉમેશને જાણ કર્યા વિના ઘરમાંથી ગાયબ રહેવા લાગી. ક્યારેક તો મોડી રાતે મોના ઘરે પાછી ફરતી હતી અને તે ય પીધેલી હાલતમાં! છેવટે ઉમેશે તેના સસરાને આ વાત કરી. પરંતુ તેમણે મોનાનો જ પક્ષ લઈને ઉમેશને ઝાટકી કાઢ્‌યો. ‘તમે બરાબર ઘ્યાન નથી આપતા, તેને પ્રેમથી વંચિત રાખો છો માટે મારી દીકરી ઉદાસ રહે છે. એકલી એકલી ઘરમાં બોર થઈ જાય છે, માટે બહાર મિત્રવર્તુળમાં ફરે છે...’ વગેરે વગેરે દલીલો કરીને સસરાએ ઉમેશની બોલતી બંધ કરી દીધી.
આવું બઘું લગભગ બે વર્ષ ચાલ્યું. ઘરમાં હોય ત્યારે પણ ઉમેશની ઘોર ઉપેક્ષા કરતી મોનાથી કંટાળીને છેવટે ઉમેશે છૂટાછેડાનો નિર્ણય લીધો. ઉમેશે એક વકીલનો સંપર્ક સાંઘ્યો, પરંતુ તેણે એવી સલાહ આપી કે શ્રીમંત બાપની આ બેટીને છૂટાછેડા આપવા કેસ મજબૂત બનાવવો હોય તો ઉમેશે મોનાની ચાલચલગત સારી નથી, એ બેવફા છે, નશો કરે છે વગેરે વાતોના પૂરાવા લાવવા પડશે. આ કામ તો કોઈ ખાનગી ડિટેક્ટીવ એજન્સી જ કરી શકે.
છેવટે ઉમેશે એક ખાનગી જાસૂસને આ કામ સોંપી મોનાની ચાલચલગત, આડાતેડા સંબંધોને લગતી માહિતી, ફોટોગ્રાફસ, ફોન પર ટેપ થયેલી વાતો વગેરે પૂરાવા રજૂ કરી અદાલતમાં પોતાનો કેસ પૂરવાર કરી દીધો અને લફરેબાજ પત્ની મોનાથી છૂટકારો મેળવ્યો.
કેટલીકવાર છેક છેલ્લી ઘડીની જાસૂસી છાનબીન કરાવવાથી પણ કાયમનું નુકસાન થતું અટકે છે. તેનું એક સુંદર ઉદાહરણ આપતાં મુંબઈના સૌથી નામી મહિલા ડિટેક્ટીવ રજની પંડિત કહે છે કે એક વાર ૨૮ વર્ષનો એક પંજાબી ચાર્ટર્ડ એકાઉન્ટન્ટ યુવક એક કેસ લઈને તેની પાસે આવ્યો. આ યુવાન દીપક અરોરાના કવિતા ચોપરા નામની એક યુવતી સાથે વેવિશાળ થયા હતા. બન્નેની ઓળખાણ લગ્નની જાહેરખબર દ્વારા થઈ હતી. સગાઈ પછી નોકરી કરતી કવિતાનો સંપર્ક સાંધવા દીપક તેણીએ આપેલા ફોન નંબર પર ફોન કરે તો તેને એક જ જવાબ મળતો કે ‘અભી વો બહુત બિઝી હૈ’ અથવા ‘કવિતા અભી બહાર ગઈ હૈ’.
બન્ને રૂબરૂ મળે ત્યારે દીપક ઘણી વાર કવિતા સમક્ષ એવી ઇચ્છા વ્યક્ત કરતો કે એ તેની નોકરીનું સ્થળ જોવા માગે છે. પરંતુ કવિતા પોતાની ઓફિસ બતાવવાનું ટાળતી. એ એક જ દલીલ કરતી કે અમારી ઓફિસમાં મશહૂર મોડેલો આવે છે તેથી બહારના પુરુષોને આવવાની મનાઈ છે. પાંચ-દસ મુલાકાતો પછી દીપકને કવિતા પર શંકા ગઈ. તેથી તેણે મહિલા ડિટેક્ટીવનો સંપર્ક સાંઘ્યો. આ મહિલા ડિટેક્ટીવે તરત જ જાતે તપાસ શરૂ કરી અને ત્રણ દિવસમાં જ રિપોર્ટ આપ્યો કે કવિતા કોઈ મોડલંિગ કંપનીમાં કામ કરતી નથી. પરંતુ એક સામાન્ય મસાજ અને બ્યુટી પાર્લરમાં કોર્લગર્લ તરીકે ધંધો કરે છે. કવિતાના માતાપિતાને પણ આ વાતની ખબર નહોતી. એ લોકો તો દીકરીની ધરખમ આવકથી ખુશ થતા હતા. પરંતુ આ હકીકત જાણ્યા પછી દીપક થોડો ચૂપ બેસી રહે? તેણે તરત જ કવિતાના માબાપને સાચી વાતની જાણ કરી અને સગાઈ તોડી નાંખી.
એક ખાનગી ડિટેક્ટીવના જણાવ્યા મુજબ પોતાના પતિદેવ પર ‘છૂપી નજર’ રાખવાનું કામ સોંપતી પત્નીઓના કેસ પણ વધી પડ્યા છે. ખાસ કરીને સમાજના ભદ્ર વર્ગમાં ધનવાન પુરુષો ઘરબહાર ઉપપત્ની રાખવાની ટેવ ધરાવતા હોય છે. તેઓ આવા બીજાં બૈરાં માટે અલાયદો ફલેટ, મોટર પણ વસાવતા હોય છે. શંકાના આધારે જો કોઈ પત્ની પોતાના જ પતિની ચાલચલગત જાણવા અને તેના ઘરબહારનાં આડાતેડા કામકાજ શોધી કાઢવાનો કેસ સોંપે તો ખાનગી ડિટેક્ટીવો આવા કેસ હોંશે હોંશે સંભાળે છે. તેઓ પતિદેવ પાછળ દસ-બાર માણસોને છુટ્ટા મૂકે છે. જેઓ જુદા જુદા સમયે, વિવિધ વેશે પતિનો પીછો કરી એ રોજ ઘરેથી નીકળીને ક્યાં જાય છે? કઈ કઈ બેન્કોમાં ખાતા ધરાવે છે? કોને કોને મળે છે? તેની આવક શું હશે? કોઈ વ્યસન છે કે નહિ? મિત્રવર્તુળ કેવું છે? બીજી કોઈ ગુપ્ત મિલકત બનાવી છે કે નહિ? શહેરમાં કે બહારગામમાં ઉપપત્ની રાખી છે? વગેરે તમામ માહિતી એકત્ર કરી પોતાના કલાયન્ટને (પત્નીને) સ્ટેટ્‌સ રિપોર્ટ આપે છે. આ પ્રકારે કેટલીકવાર બદચલન સ્ત્રી કે પુરુષના પુરાવાઓ ભેગા કરવા ડિટેક્ટીવે અદ્યતન ટેકનોલોજી અજમાવવી પડે છે. મુંબઈના ટોચના ડિટેક્ટીવ ગ્લોબ ડિટેક્ટિવ એજન્સી અને લીટલમોર જેવી સંસ્થા પાસે ટેલિફોન પર થતી વાતચીત ટેપ કરવાના તેમજ અંધારામાં થતી હિલચાલ પણ ઝડપી શકે તેવા હાઈસ્પીડ રોલવાળા ઇન્ફ્રારેડ સેન્સર ધરાવતાં કેમેરા હોય છે. પરપુરુષ કે પરસ્ત્રીના પ્રેમમાં ગળાડૂબ હોય તેવા પાત્રને રંગે હાથ પકડવા તેમની બેડરૂમની હિલચાલને વિડિયો કેમેરામાં ઝડપી લેવાનું પણ તેઓ સારી રીતે જાણતા હોય છે. આ બધા કામ ખૂબ ચીવટ માગી લે છે. તેમજ અદ્યતન વિજાણુ સાધનો પાછળ પણ સારું એવું મૂડી રોકાણ કરવું પડે છે. એટલે જ ખાનગી ડિટેક્ટીવો તેમની વિશિષ્ટ કામગીરી માટે રોજના ચાર હજાર રૂપિયા અથવા સપ્તાહની કામગીરી માટે ૨૫થી ૩૦ હજાર રૂપિયા ફી લે છે. જેમાંથી અમુક રકમ એડવાન્સ રૂપે લઈ બાકીના રૂપિયા કામ પત્યા પછી વસૂલ કરવામાં આવે છે.
ખાનગી ડિટેક્ટીવોનો પણ એક આદર્શ છે કે તેઓ તેમના કલાયન્ટ અંગેની માહિતી કે તેમની કામગીરી અત્યંત ગુપ્ત રાખે છે. તેમજ પોતાની ઓળખ ક્યાંય છતી ન થાય તેની પણ ખાસ કાળજી રાખે છે.
ખાનગી ડિટેક્ટીવોનો આ ધંધો દિવસે દિવસે નફાકારક બનતો જાય છે, પરંતુ સામે અડચણો પણ વધતી જાય છે. લોકશાહી ભારત દેશમાં દરેક નાગરિકને પોતાની અંગત જંિદગીની વાત ખાનગી રાખવાનો હક્ક છે. કોઈ ત્રાહિત વ્યક્તિ નાગરિકની ‘પ્રાઈવસી’ પર તરાપ મારે એ અપરાધ ગણાય. આપણા દેશમાં હજુ સુધી ખાનગી ડિટેક્ટીવોના વ્યવસાયને કાયદેસર સમર્થન મળ્યું નથી. પોલીસતંત્ર પણ આ ખાનગી ખુફિયા એજન્ટો પોતાના ક્ષેત્રમાં ધૂસણખોરી કરતાં હોવાનું માની તેમને ઘુત્કારી કાઢે છે. જોકે એથી કોઈ ડિટેક્ટીવ એજન્સી નાસીપાસ થઈને ધંધો સંકેલી લેતી નથી. ઉલ્ટાનું સમાજનાં નૈતિક અધઃપતનનો સ્કેલ ઊંચો જવા સાથે પ્રાઈવેટ ડિટેક્ટીવોને પણ પર્યાપ્ત કામ અને દામ મળી
રહે છે.

Share |
 

Gujarat Samachar Plus

પાઠયપુસ્તક મંડળે શરીરના અંગોની જગ્યા બદલી નાંખી
વારસદાર વિહોણા બાઈક સાથે સેપ્ટના એ સવારો આજે પણ લાપત્તા
કોલેજોમાં જામ્યું સ્ટુડન્ટનું ઝૂમ બરાબર ઝૂમ
ના કોઈ દિશા ના કોઈ મુકામ બસ ચલ પડે હૈ
વિડીયો ગેમની અસર ઘરે નહીં સ્કૂલમાં દેખાય છે
શોપિંગ ગાઇડ જરૃરી હૈ...
પ્રેમનું પ્રતિક રાખડી બજારમાં નવી સ્ટાઇલ સાથે
 

Gujarat Samachar glamour

સલમાનની ફિલ્મનું પ્રાઇવેટ સ્ક્રીનીંગ નહીં કરાય
આમિર તરફથી બહેનને 'બર્થ-ડે' ગિફ્ટ
મનીષાએ પતિ સાથેના સંબંધોનો છેડો ફાડી નાખ્યો
કિસ્મત ફિલ્મે પહેલીવાર 'જ્યુબિલી'નો સ્વાદ ચખાડયો
સુનિતાને અંતરિક્ષમાં 'જોકર' જોવા મળશે કે નહીં?
શાહરૃખ અચાનક આરાધ્યાને રમાડવા ગયો
કરીના દબંગ-૨માં સલ્લુ સાથે આઇટમ સોન્ગ
 
 
   
   
   
 

Gujarat Samachar POLL

 

Olympics 2012 Photos

webad3 lagnavisha
   

Follow Us

Facebook Twitter
   
 
   

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
       
 
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
• હવામાં ગોળીબાર • ઓનલાઇન
• ઇંટ અને ઇમારત • સિનેમેજિક
• મેરા ભારત મહાન • વિચાર વિહાર
 
plus
 

આજનું કાર્ટુન

arc archive

પૂર્તિઓ

 
 
Gujarat Samachar © 2012 All Rights Reserved