Last Update : 29-July-2012, Sunday

 

‘‘જા, મુઝે ના અબ યાદ આ’’

હોરાઇઝન - ભવેન કચ્છી
- રાજેશ ખન્નાને ભરપૂર અંજલી આપી... હવે તેના ‘રાઈઝ એન્ડ ફોલ’માંથી થોડો બોધપાઠ લેવાની વાત
- આજ જીસ કે પાસ હૈ વો કલ કિસી ઓર કે પાસ થા, કલ કિસી ઓર કા હો જાયેગા

રાજેશ ખન્ના જેની સાથે લિવ ઇન રીલેશનશીપના ધોરણે કેટલાક વર્ષો રહ્યો. વિદેશી બીચ પર રખડ્યા - મોજ કરી તેવી એક અભિનેત્રીને તે અરસામાં તેની ફિલ્મ મેગેઝિન પત્રકારે પૂછ્‌યું હતું કે ‘‘તું તો કાકા જોડે એકદમ ઘનિષ્ટ પતિ-પત્ની જેવા સંબંધો ધરાવે છે. કાકા વગર તને ચાલતું નથી. કાકા પણ તારા ગળાડુબ પ્રેમમાં હશે નહીં?’’
ત્યારે પેલી અભિનેત્રીએ ત્વરીત જ ઉત્તર આપ્યો કે ‘‘ના રે... હું એવા કોઇ વહેમમાં નથી. કાકાને હું નજીકથી જાણી ચુકી છું. કાકા મને તો શું ક્યારેય કોઇને પ્રેમ કરી જ ના શકે.’’
પત્રકાર મિત્રને કંઇ સમજાયું ના હોઇ પૂછ્‌યું કે ‘‘તું શું કહેવા માંગે છે?’’ અભિનેત્રીએ સ્પષ્ટતા કરી કે ‘‘કાકા, કોઇને પણ પ્રેમ કરી જ ના શકે. કેમ કે કાકા ખુદ પોતાના જ પ્રેમમાં છે. જે વ્યક્તિ સ્વકેન્દ્રી અને પોતાને જ સર્વગુણ સંપન્ન માનતી હોય તે બીજા કોઇને પ્રેમ જ ના કરી શકે.’’
રાજેશ ખન્નાના સુપર સ્ટારડમ અને યુવતીઓની તેના પાછળની મનોરોગી જેવી ઘેલછાની પણ બહુ વાતો છેલ્લા દિવસોમાં થઇ. પણ રાજેશ ખન્નાના મનોજગતનો એક ચહેરો એવો પણ હતો જેનો સ્ટડી કેસ તરીકે અભ્યાસ કરી શકાય. આપણા જીવનના સંદર્ભમાં લાલ બત્તી તરીકે પણ જોઇ શકાય.
રાજેશ ખન્ના હંમેશા ખુશામતખોરોથી જ ઘેરાયેલા રહેતા હતા. પછી એવું બનતું કે તેમને જે ગમતું હોય તે જ જૂઠ્ઠાણું ચલાવીને પણ તેમને કહેવામાં આવતું. તેમના ‘આશિર્વાદ’ બંગલામાં રોજેરોજ આવા તત્વોનો ડાયરો ભરાતો હતો. જેમાં કપુર પરિવાર, ધર્મેન્દ્ર, રાજેન્દ્ર, જીતેન્દ્રથી માંડી અમિતાભની પણ નિમ્ન સ્તરની મજાક ઉડાવાતી હતી. રાજેશ ખન્નાના પ્રેમમાં પડેલી ફિલ્મી પત્રકાર દેવયાની ચૌબલ તો તેના મેગેઝિનમાં અને અન્ય મેગેઝિનોની પત્રકારો તેના પ્રભાવ હેઠળ હોઇ સિન્ડીકેટ રચીને રાજેશ ખન્નાના ગુણગાન અને દેશવ્યાપી ક્રેઝનું કવરેજ અતિરેક સાથે આપતા રહેલા. ધર્મેન્દ્રએ એક પાર્ટીમાં દેવયાનીને લાફો લગાવ્યો હતો તે ઘટનાએ તે અરસામાં ખાસ્સી ચકચાર જગાવી હતી.
રાજેશ ખન્ના તેના ખુશામતિયા માટે અવનવી દારૂની બોટલ ખુલ્લી મૂકી દેતા. તેને કોઇ ભેટ મળે તે આવા ચમચાઓને ભર દરબાર વચ્ચે આપી દેતા. અમુક ફિલ્મો ફ્‌લોપ જવાની દહેશત હોય તો આ ખુશામતિયાઓ અગાઉથી જ થિયેટરો બુક કરીને મફતમાં ટિકિટ વહેંચી દેતા. રાજેશ ખન્નાને એવો જ રીપોર્ટ આપતા કે ફિલ્મ ભલે ચાલી નહીં પણ, કાકા તમારો દબદબો હજુ એવો જ છે. આ જ તત્વો રાજેશ ખન્નાને પાનો ચઢાવતા કહેતા કે તમે શક્તિદા (સામંત) કે ચોપડા, ૠષિદા કે સિપ્પી થકી નથી, તેઓને તમારા વગર ચાલે તેમ નથી. કાકા તમે અવતારી કલાકાર છો. રાજાના દરબારમાં તેની પ્રશંસામાં કૃત્રિમતાથી અને ચાંપલૂસીની હદ વટાવનારાઓ રહેતા તેવું જ રાજેશ ખન્નાના બંગલે દ્રશ્ય જોવા મળતું.
શરાબ, ફાઇવ સ્ટાર હોટલના ભોજનના પાર્સલ, ઐય્યાશી, પત્તા રમવાનો અડ્ડો ‘આશિર્વાદ’ બની ગયો હતો.
રાજેશ ખન્ના સફળતાના નશા હેઠળ જે નાના માણસોએ તેની કારકિર્દીમાં પ્રોત્સાહક ભૂમિકા ભજવી હતી તેને છોડી દીધા. મોટા ગજાના આદરણીય નિર્માતા-નિર્દેશકો, બેનરોને અપમાનિત કર્યા. શુટંિગમાં પાંચ-છ કલાક મોડો જાય તેમાં જ નિર્માતા ખોટના ખાડે ઉતરવા માંડ્યા. જેવી ફિલ્મી દુનિયાને અમિતાભની સફળતા સાથે તક મળી તે સાથે જ તેનાથી ત્રાસી ગયેલાઓએ છેડો ફાડી નાંખ્યો. રાજેશ ખન્નાએ સફળતાની પરાકાષ્ટા વચ્ચે જ જે કાકા-કાકીએ તે ઉછેર્યો હતો તે તેમજ અન્ય પરિવારજનો જોડે સંબંધ તો ક્યારનો ઠેકાણે પાડી દીધો હતો. તમે જોયું હશે કે તેના સગાસ્નેહીઓમાંથી કોઇએ તેના અંતિમ દિવસો કે યાત્રામાં આવવાની તસ્દી નહોતી લીધી.
રાજેશ ખન્નાને એમ જ હતું કે તે ભગવાન છે. બધાએ તેને જ પૂજવાનું હોય. રાજેશ ખન્ના તેની લોકપ્રિયતાની ચરમસીમાએ હતો ત્યારે ‘ફિલ્મ ફેર’ જેવા એવોર્ડ ફંકશનમાં કે બીજા કોઇ હિરોની ફિલ્મના પ્રિમિયરમાં જાય તો પણ તેમના ખુશમ તિયાઓએ દ્વારા પહેલેથી એવી ગોઠવણ કરાવતો કે તમામ ફોટોગ્રાફરો ઈવન દિલિપસા’બ, રાજ કપુર, ધર્મેન્દ્ર કે રાજેન્દ્ર કુમાર આવે તો પણ, એકાદ-બે ક્લીક કરે, કોઇ જાતની ધક્કા-મુક્કી કે ભીડ ના જન્માવે. ખરીદેલા પત્રકારો-ફોટોગ્રાફરો અન્ય સ્ટાર્સને મહત્વ જ ના આપીને અપમાન- ઉપેક્ષા કરતા અને જેવો રાજેશ ખન્ના આવે તે સાથે જ એકસાથે પચ્ચીસ-પચાસ પત્રકારોનો કાફલો રીતસરનો હોલની બહાર તેની કાર તરફ દોડી જતો. અંધાઘુંધી થઇ જતી. એવું ચર્ચાતું હતું કે અન્ય સ્ટાર્સને ઈર્ષાથી જલાવવા માટે જ રાજેશ ખન્ના આવું કરાવતો. ઘણા એવું પણ કહેતા કે રાજેશ ખન્નાને ખુશ કરવા તેને ખબર પણ ના હોય તેમ તેના ખુશામતિયાઓ આવો તખતો ગોઠવી દેતા હતા.
રાજેશ ખન્ના અંદરખાનેથી ‘બી’ ગ્રેડના અભિનેતાઓથી પણ અસલામતિ ધરાવતો હતો. તેને ‘આનંદ’માં સાથે કામ કર્યા પછી અમિતાભનો ડર નહોતો જન્મ્યો પણ ‘નમકહરામ’ના પ્રિમિયરમાં તેણે ફિલ્મના નિર્દેશક ૠષિકેશ મુખર્જીને અમિતાભનું કામ જોઇને કહી દીઘું હતું કે ‘‘નવા સુપર સ્ટારનું આગમન થઇ ચૂક્યું છે.’’
અમિતાભની કારકિર્દી જામી અને રાજેશ ખન્નાનો એટલો જ ઝડપથી અસ્ત થયો. રાજેશ ખન્નાની એક પછી એક સાત ફિલ્મો ફ્‌લોપ ગઇ તે દરમ્યાન તો રાજેશ ખન્નાના ચમચાઓ વિખેરાઇ ગયા હતા. ચમચાઓ વગર જ્યારે રાજેશ ખન્નાએ તેની પોતાની આંખો વડે દુનિયા જોઇ ત્યારે તેને લાગ્યું કે કેટલી હદે તેને ભ્રામિક સ્વર્ગીય જગત બતાવાયું હતું. તે તેના જીવન અને કારકિર્દીને તત્વજ્ઞાન, ડહાપણ અને સંયમને સહારે સારી રીતે મેનેજ કરી શક્યો હોત.
એક વખત એવો હતો કે રાજેશ ખન્નાના જન્મ દિને ‘આશિર્વાદ’ બંગલાની બહાર હજારો યુવતીઓ જાણે તેનું અપહરણ કરવા કે ભગાડી જવા બેતાબ હોય તેમ ‘આંહે’ ભરતી મેદની જમાવતી. તેને તેટલી જ ફૂલદાની અને અવનવી ભેટો, શુભેચ્છા મેસેજ મળતા હતા. થોડા વર્ષો બાદ તેના બંગલે એક પણ ફૂલદાની જોવા નહોતી મળતી. બંગલાની બહાર ચકલું પણ નહોતું ફરકતું.
રાજેશ ખન્નાથી આ બઘું જીરવાતું નહોતું. તે તેના બંગલાની અગાસી પર જઇને દારૂ ઢીંચતા રીતસરની બૂમો પાડતો કે ‘‘એ પરવરદિગાર મેરે સાથ ઐસા ક્યું’’ તે શરાબના નશામાં રડતો રહેતો. ડિમ્પલ તેને રોજ અગાસીથી નીચે ઉતારતી હતી.
રાજેશ ખન્નાએ સફળતાના એ દિવસોમાં બધાને તૂચ્છ ગણ્યા હતા, તરછોડી દીધા હતા. તેના કરતા પણ વઘુ ઘમંડ હેઠળ અપમાનિત કર્યા હતા. હવે તેને માટે કોઇને લાગણી નહોતી. તેમાં પણ આ તો ફિલ્મ ઈન્ડસ્ટ્રી, જે ભલભલા તીસ મારખાંને પણ ઠેકાણે પાડવા ટાંપીને બેઠી હોય. બધા એ ઝડપે વર્તમાનમાં દોડતા હોય છે કે હમણા જ પસાર થયેલા સ્ટેશનની કોઇને યાદ પણ નથી હોતી. કદાચ હાલ જે સફળ છે તે નજીકના ભવિષ્યમાં આઉટડેટેડ થઇ જશે કે બીજાના કેમ્પમાં ચાલ્યો જશે તો તેવા ડરથી પણ પ્રત્યેક નિર્માતાઓ વિકલ્પની તલાશમાં જ હોય છે. આખરે તેઓ પણ રોકાણ કરતા હોય છે. તેઓને પણ ફિલ્મ ઉદ્યોગમાં ટકી રહેવા બાબતની અસલામતિ તેઓને પણ હોય છે.
રાજેશ ખન્ના જેવી તુમાખી, પોતાનાથી કોઇ ચઢિયાતુ નથી, અન્યોની લીટી નાની કરીને પોતાની લીટી મોટી કરનારાઓ સમાજમાં ઠેર ઠેર નજરે ચઢે છે.
જેઓ તેમની નોકરી, વ્યવસાય કે ધંધામાં ઠીક ઠીક કમાણી કરે, કુટુંબ કરતા મોટા જાહેર વર્તુળમાં જાય એટલે હવામાં ઉડવા લાગે, લાગણી અને આત્મીય સગા-સ્નેહીઓ પર સદંતર ચોકડી લગાવી દે કે પછી તેમની બડાશ થકી બીજાને તૂચ્છ પૂરવાર કરવા માંડે તેઓને એવો નશો હોય છે કે તે પૈસા, સત્તા, હોદ્દો, વર્તમાન માન-આદર કાયમી છે. માત્ર તેણે જ આ સિઘ્ધી તેની તાકાતથી મેળવી છે. તેમની પ્રગતિ અને સુખમાં જેઓએ પણ યોગદાન આપ્યું હોય છે તેને તે સૌથી પહેલા અવગણે છે કેમ કે તેને જોતા જ, તેની યાદ આવતા જ તેનો અહમ્‌ ઘવાય છે. તે કોને લીધે આ સ્તરે છે તે નજર સામે જ છે. તેની યાદ નજર સામે છે. તેનો અહંકાર એમ પડઘો પાડે છે કે ‘‘તું માત્ર અને માત્ર તારી તાકાતથી છે.’’ વખત જતા સઘ્ધરતાની સ્થિતિમાં એવું પણ અનુભવાય છે કે ‘‘આ વ્યક્તિ - વ્યક્તિ સમૂહ ના હોત તો પણ મારી પાસે વૈકલ્પિક તાકાત હતી જ.’’
વળી આવી વ્યક્તિઓ એવા વર્તુળ જ રાચતી હોય છે કે પછી એવા વર્તુળમાં જ જતી હોય છે જ્યાં તેની મહત્તા દેખાય. તેને મહત્વ મળે. આમ ખુશામતોનો હોલસેલ ખડકલો થાય છે. કોઇ હિતેચ્છુ કે ચંિતકને તો ફરકવા જ નથી દેવાતો હોતો. ‘આજે ચઢશે તે કાલે પડશે’ તે જ્ઞાન રાજેશ ખન્નાને ભારે માનસિક પછડાટ ખાધા પછી આવ્યું હતું. ‘આઈફા’ એવોર્ડમાં તેને લાઈફટાઈમ એચિવમેન્ટ એવોર્ડ મળ્યો ત્યારે છેક કાકા જાણે અમિતાભ, શાહરૂખને જ્ઞાન આપતા હોય તેમ બોલ્યા હતા કે ‘‘આજ જો હૈ, કલ કીસી ઔર કા થા, કલ કિસી ઔર કા હો જાયેગા.’’ ખરેખર તો રાજેશ ખન્નાએ તેની સાહ્યબી વખતે આ સમજ કેળવવા જેવી હતી.
રાજેશ ખન્નાની મનોદશામાંથી જો કોઇએ સૌથી વઘુ ધડો કે બોધપાઠ લેવાની જરૂર હોય તો તે શાહરૂખ ખાનને લાગે છે. કેમ કે તે પણ તેના પ્રેમમાં જરા વઘુ પડતો છે.
અમિતાભના ગ્રેસને દાદ આપવી જોઇએ. તેણે નમ્રતાની તક બતાડવાની હંમેશા તક ઝડપી છે. આ વખતે સ્વ. રાજેશ ખન્ના માટે તેણે કહ્યું કે ‘‘સુપર સ્ટાર શબ્દ રાજેશ ખન્ના માટે જ યોગ્ય છે અને તે કાયમ માટે તેની જોડે જ રહેશે.’’
રાજેશ ખન્ના અને અમિતાભ બે સામસામે છેડાના નેગેટીવ અને પોઝિટિવ છે. આપણા માટે દિવાદાંડી સમાન છે. સફળતાથી છકી ગયેલાઓ તેમની ઈમેજને બિલોરી કાચથી જુએ છે. દેડકાઓથી જ ઘેરાયેલો મોટો દેડકો આખરે તો કુવાને જ દુનિયા માને છે. તેને રાજ્ય ગણે છે. ભૂલથી મોટો ઠેકડો મારીને બહાર આવી જાય તો તેને અનંત આકાશ અને વિરાટ વિશ્વ દેખાય. પણ તેમ થાય તે સાથે જ તે ફરી કૂવામાં કૂદકો લગાવી દે છે કેમ કે અહીં જ તેને ઠાઠ-ઠસ્સો અને ભ્રામિક રાજા જેવો દબદબો મળે છે.
રાજેશ ખન્ના તેની ભૂતકાળની જાહોજલાલી જોઇને તેના ભેંકાર બંગલામાં ‘પ્રેમનગર’નું એ જ ગીત ગાતો હશે ‘‘જા મુઝે ના અબ યાદ આ... મુઝે ભૂલ જાને દે... જા...’’

Share |
 

Gujarat Samachar Plus

પાઠયપુસ્તક મંડળે શરીરના અંગોની જગ્યા બદલી નાંખી
વારસદાર વિહોણા બાઈક સાથે સેપ્ટના એ સવારો આજે પણ લાપત્તા
કોલેજોમાં જામ્યું સ્ટુડન્ટનું ઝૂમ બરાબર ઝૂમ
ના કોઈ દિશા ના કોઈ મુકામ બસ ચલ પડે હૈ
વિડીયો ગેમની અસર ઘરે નહીં સ્કૂલમાં દેખાય છે
શોપિંગ ગાઇડ જરૃરી હૈ...
પ્રેમનું પ્રતિક રાખડી બજારમાં નવી સ્ટાઇલ સાથે
 

Gujarat Samachar glamour

સલમાનની ફિલ્મનું પ્રાઇવેટ સ્ક્રીનીંગ નહીં કરાય
આમિર તરફથી બહેનને 'બર્થ-ડે' ગિફ્ટ
મનીષાએ પતિ સાથેના સંબંધોનો છેડો ફાડી નાખ્યો
કિસ્મત ફિલ્મે પહેલીવાર 'જ્યુબિલી'નો સ્વાદ ચખાડયો
સુનિતાને અંતરિક્ષમાં 'જોકર' જોવા મળશે કે નહીં?
શાહરૃખ અચાનક આરાધ્યાને રમાડવા ગયો
કરીના દબંગ-૨માં સલ્લુ સાથે આઇટમ સોન્ગ
 
 
   
   
   
 

Gujarat Samachar POLL

 

Olympics 2012 Photos

webad3 lagnavisha
   

Follow Us

Facebook Twitter
   
 
   

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
       
 
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
• હવામાં ગોળીબાર • ઓનલાઇન
• ઇંટ અને ઇમારત • સિનેમેજિક
• મેરા ભારત મહાન • વિચાર વિહાર
 
plus
 

આજનું કાર્ટુન

arc archive

પૂર્તિઓ

 
 
Gujarat Samachar © 2012 All Rights Reserved