Last Update : 14-July-2012,Saturday

 

લૈલા ખાન સહિતની છ હત્યાઓના મૂળમાં ક્રોધ, લોભ અને ઈર્ષ્યા હતા

લૈલા ખાનની મમ્મી સેલિનાએ ત્રીજા લગ્ન પરવેઝ તાક સાથે કર્યા પછી પોતાના બીજા પતિ સાથેના સંબંધો ચાલુ રાખ્યા એ તેની હત્યાનું કારણ બની ગયા હતા

મુંબઈ પોલીસે તેની કારકિર્દીની કદાચ સૌથી મોટી મર્ડર મિસ્ટરી ભારે કુનેહપૂર્વક ઉકેલી કાઢી છે. હિન્દી ફિલ્મોની 'બી' ગ્રેડની હિરોઈન લૈલા ખાન તેની મમ્મી, ભાઈ-બહેનો અને પિતરાઈ બહેન સહિત છેલ્લાં લગભગ દોઢ વર્ષથી ગુમ હતી. લૈલા ખાન બાબતમાં જાતજાતની અફવાઓ બજારમાં ચાલી રહી હતી. તેમાંની એક અફવા એવી પણ હતી કે તે બોગસ પાસપોર્ટ બનાવીને દુબઈ ચાલી ગઈ છે અને દાઉદ ઈબ્રાહિમની ગેન્ગમાં ભળી ગઈ છે. લૈલા ખાનની મમ્મી સેલિનાના ત્રીજા પતિ પરવેઝ તાકની ધરપકડ કરવામાં આવી ત્યારે તેણે એવો ચોંકાવનારો ઘટસ્ફોટ કર્યો હતો કે તેણે ગુસ્સામાં આવીને લૈલા ખાનની, તેની મમ્મીની અને તેનાં ભાઈ-બહેનોની હત્યા કરી નાંખી છે. મુંબઈ પોલીસના ઉચ્ચ અધિકારીઓએ ૨૦૦ બાહોશ કર્મચારીઓની ટીમોને કામે લગાવી વીજળીની ઝડપે આ સામૂહિક હત્યાકાંડનો ભેદ ઉકેલી કાઢ્યો છે.
લૈલા ખાન અને તેના પાંચ કુટુંબીજનોની ઠંડે કલેજે કરવામાં આવેલી હત્યાઓના મૂળમાં તેની મમ્મી સેલિનાના ત્રીજા પતિ પરવેઝ તાકને સતાવી રહેલા લોભ, ઈર્ષ્યા અને ક્રોધ હોવાનું તેણે પોલીસ સમક્ષ કરેલી કબૂલાત ઉપરથી જાણવા મળે છે. આ હત્યાઓના કેન્દ્રમાં લૈલા ખાન નહીં પણ તેની મમ્મી સેલિના ખાન, તેણે કરેલાં ત્રણ લગ્નો અને તેની કરોડો રૃપિયાની સંપત્તિ હોવાનું પણ પોલીસ તપાસમાં બહાર આવ્યું છે. સેલિના ખાનના પહેલા લગ્ન નાદિરશાહ પટેલ સાથે થયા હતા, જેનાથી તેને રેશ્મા (લૈલા), હાશ્મિના, ઝારા અને ઈમરાન નામનાં સંતાનો હતાં. સેલિનાએ નાદિરશાહને છૂટાછેડા આપીને આસિફ શેખ નામના શ્રીમંત વેપારી સાથે લગ્ન કર્યા હતા. ઈ.સ. ૨૦૦૯માં આસિફને પડતો મૂકીને તેણે પોતાના કરતાં ૧૬ વર્ષ નાના પરવેઝ તાક સાથે લગ્ન કર્યા હતા, જે જમ્મુ-કાશ્મીરના ત્રાસવાદીઓ સાથે સંબંધ ધરાવતો હતો. પરવેઝ તાક સાથેનાં લગ્ન પછી પણ સેલિનાએ આસિફ શેખ સાથેના સંબંધો ચાલુ રાખ્યા હતા, જેને કારણે પરવેઝ ઈર્ષ્યાનો શિકાર બન્યો હતો.
સેલિના ખાન પરવેઝ તાકને પરણી તે પછી તેની પુત્રી લૈલા દાઉદ ઈબ્રાહિમના સાથીદાર મનાતા કમાલ જાધવાનીના પુત્ર સોનુના પ્રેમમાં પડી હતી અને તેને પરણી હતી. સોનુએ પોતાનો ધર્મ બદલીને વફી ખાન નામ રાખ્યું હતું. સોનુએ લૈલાને અને તેની મમ્મીને દુબઈ સેટલ થવા સમજાવ્યા હતા અને તેઓ એ માટે તૈયાર પણ થઈ ગયા હતા. સેલિના પાસે જે ત્રણ પ્રોપર્ટીઓ હતી તેની કિંમત આશરે ત્રણ કરોડ રૃપિયા હતી. સેલિનાએ આ પ્રોપર્ટીઓ વેચવા માટેનો પાવર ઓફ એટર્ની પોતાના બીજા પતિ આસિફ શેખને આપી રાખ્યો હતો. આ વાતની જાણ પરવેઝ તાકને થતાં તે ઉશ્કેરાઈ ગયો હતો. પરવેઝ પણ સેલિનાની સાથે દુબઈ જવા માંગતો હતો, પણ તેની પાસે પાસપોર્ટ નહોતો માટે તે જઈ શકે તેમ નહોતો. પરવેઝ તાકે વિચાર્યું કે તે જો સેલિનાની અને તેનાં સંતાનોની હત્યા કરી નાંખશે તો તેની પ્રોપર્ટીનો તે માલિક બની જશે. પરવેઝ તાકે મુંબઈની પોલીસને આપેલી માહિતી ઉપરથી ઈ.સ. ૨૦૧૧ની સાતમી ફેબુ્રઆરીની રાતે સેલિનાના ઈગતપુરીના ખાતે આવેલા ફાર્મ હાઉસમાં શું બન્યું હશે તેનો ખ્યાલ આવે છે. પરવેઝ તાક અને સેલિનાનો પરિવાર વેકેશનની મજા માણવા ઈગતપુરી ગયા હતા. સાતમી ફેબુ્રઆરીએ મોડી રાત સુધી તેમણે ડીનર અને ડાન્સની પાર્ટી કરી હતી. રાતે એક વાગ્યે તેઓ પોતપોતાના બેડરૃમમાં જઈને સૂઈ ગયા હતા. સેલિના અને પરવેઝ તેમના બેડરૃમમાં પહોંચ્યા તે પછી તેમની વચ્ચે આસિફ શેખ અને પ્રોપર્ટી બાબતમાં ઝઘડો થયો હતો. પરવેઝે આવેશમાં આવીને સેલિનાના માથામાં લોખંડનો સળિયો માર્યો હતો. સેલિના લોહીલુહાણ હાલતમાં જમીન ઉપર પડી હતી અને બેભાન થઈ ગઈ હતી.
આ ઘોંઘાટ સાંભળી સેલિનાનો પુત્ર ઈમરાન દોડી આવ્યા હતો. તેણે પોતાની મમ્મીને લોહીના ખાબોચિયામાં પડેલી જોઈ એટલે તે ઉશ્કેરાઈ ગયો હતો. ઈમરાને પરવેઝ ઉપર હુમલો કર્યો હતો. આ હુમલામાં પરવેઝને માથામાં અને હાથમાં ઈજા થઈ હતી. પરવેઝે બંગલાના વોચમેન શકીર હુસૈનને મદદ કરવા બોલાવ્યો હતો. શકીરને પરવેઝ કાશ્મીરથી લાવ્યો હતો. પરવેઝે અને શકીરે મળીને ઈમરાન અને ઝારાની કતલ કરી નાંખી હતી.
પછી કોઈ સાક્ષી ન રહે એટલા માટે તેમણે લૈલા, હાશ્મીના અને પિત્રાઈ બહેન રેશ્માની પણ હત્યા કરી નાંખી હતી. તેમના બંગલાની પાછળ પાણીની ટાંકી બનાવવા માટે ખોદવામાં આવેલા ખાડામાં આ છએયની લાશને બંનેએ સાથે મળીને દફનાવી દીધી હતી.
સેલિના ખાન અને તેના પરિવારની હત્યા કર્યા પછી પરવેઝ તાક નજીકના ઘોટી ગામમાં ગયો હતો અને એક ટ્રાવેલ એજન્ટની મદદથી સેલિનાની ગાડીઓ ચલાવવા માટે બે ડ્રાઈવરને ભાડે કરી આવ્યો હતો. આ ડ્રાઈવરની મદદથી સેલિનાને બે મોટરકાર ડ્રાઈવ કરીને તેઓ ઓશિવારા આવ્યા હતા. ત્યાંથી જે કોઈ ચીજવસ્તુઓ અને દસ્તાવેજો લેવાના હતા એ લઈને તેઓ કાશ્મીરમાં આવેલા કિશ્તવર ભણી હંકારી ગયા હતા. રસ્તામાં તેઓ ઈગતપુરીના ફાર્મ હાઉસમાં પણ રોકાયા હતા. તેમણે જતી વખતે પુરાવાઓનો નાશ કરવા ફાર્મ હાઉસને આગ લગાવી દીધી હતી. તેઓ ૧૨મી ફેબુ્રઆરીએ કિશ્તવર પહોંચ્યા હતા. લૈલાના પિતા નાદિરશાહને તેમની ભૂતપૂર્વ પત્ની અને સંતાનો ગુમ થવાની જાણ થઈ ત્યારે તેમણે એક મહિના પછી ઓશિવારા પોલીસ સ્ટેશનમાં એમના ગુમ થવાની ફરિયાદ નોંધાવી હતી. આ વર્ષના જૂન મહિનાની ૨૧મી તારીખે જમ્મુ અને કાશ્મીરની પોલીસે પરવેઝ તાકની ધરપકડ કરી હતી. પરવેઝ તાક લૈલા ખાનના ગુમ થવાના પ્રકરણમાં સંડોવાયેલો છે તેવી જાણ થતાં કાશ્મીરની પોલીસે મુંબઈ પોલીસનો સંપર્ક સાધ્યો હતો. મુંબઈ પોલીસ કાશ્મીર જઈને પરવેઝ તાકને મુંબઈ લઈ આવી હતી.
જમ્મુ અને કાશ્મીરની પોલીસે પરવેઝ તાકની ધરપકડ કરી તે પછી તે વારંવાર પોતાનાં નિવેદનો બદલતો રહ્યો હતો. પહેલાં તેણે એમ કહ્યું કે લૈલા ખાન અને તેનું કુટુંબ દુબઈ ચાલ્યું ગયું છે. પછી તેણે કહ્યું કે મેં તેમની હત્યા કરી નાંખી છે. પછી તેણે ફેરવી તોળ્યું હતું. મુંબઈની પોલીસે તેની આકરી પૂછપરછ કરી તે પછી તેણે કબૂલ કર્યું કે તેણે લૈલા ખાન અને પાંચ જણાની ઈગતપુરીના ફાર્મા હાઉસમાં હત્યા કરી છે અને તેમની લાશોને ત્યાં જ દાટી દીધી છે. આ કબૂલાતના પગલે મુંબઈની પોલીસે ઈગતપુરીમાં જંગ સર્ચ ઓપરેશન હાથ ધર્યું હતું.
લૈલા ખાન અને તેના પરિવારના પાંચ સભ્યોની હત્યાની તપાસ કરવા માટે મુંબઈની પોલીસે કુલ પાંચ ટીમો બનાવી હતી, જેમાં આશરે ૨૦૦ પોલીસ ઓફિસરોને અને હવાલદારોને કામે લગાવવામાં આવ્યા હતા. આ ઉપરાંત ફોરેન્સિક નિષ્ણાતોની બે ટીમ અને ત્રણ ડોગ સ્કવોડ પણ આ ઈન્વેસ્ટિગેશન માટે તૈયાર કરવામાં આવી હતી. તેઓ સાથે ૨૫ મજૂરોને ખોદકામ માટે લઈ ગયા હતા. આ મજૂરોએ પરવેઝ દ્વારા દર્શાવવામાં આવેલાં છ સ્થળોએ ખોદકામ કર્યું હતું. ફોરેન્સિક નિષ્ણાતો પાસે માનવ અંગોને પારખવા માટેનાં અનેક યંત્રો પણ હતાં. આ સર્ચ ઓપરેશનની આગેવાની મુંબઈની ક્રાઈમ બ્રાંચના વડા હિમાંશુ રોયે લીધી હતી. તેમણે ઈગતપુરીના ફાર્મ હાઉસની આજુબાજુના ચાર કિલોમીટરનો વિસ્તાર કોર્ડન કરી લીધો હતો. પરવેઝ તાકે આપેલી માહિતીના આધારે પોલીસે જમીનમાં દાટેલાં છ હાડપિંજરો શોધી કાઢ્યાં છે. આ હાડપિંજરોના નમૂનાઓ ડીએનએ ટેસ્ટ માટે મોકલી આપવામાં આવ્યા છે. જોકે પોલીસને લાગે છે કે આ હાડપિંજરો લૈલા ખાનના કુટુંબીજનોનાં જ છે.
મુંબઈની પોલીસે આ ઘૃણાસ્પદ સામૂહિક હત્યા કેસમાં અત્યાર સુધી મુખ્ય આરોપી પરવેઝ તાકની, ઘોટીના બે ડ્રાઈવરોની અને સેલિનાના બીજા પતિ આસિફ શેખની પણ ધરપકડ કરી છે. જ્યારે લૈલા ખાનના પરિવારની ઈગતપુરીમાં હત્યા થઈ ત્યારે આસિફ શેખ પણ ત્યાં હાજર હોવાની પોલીસને શંકા છે. આ ખૂન કેસમાં આસિફ ખાનની ભૂમિકાની પણ પોલીસ તપાસ કરી રહી છે. પરવેઝ તાકને મદદ કરનારો ઈગતપુરીના ફાર્મ હાઉસનો વોચમેન શકીર હુસૈન વાણી લાપતા છે. મુંબઈની પોલીસે લૈલા ખાનના પતિ સોનુ વાધવાના પિતા કમાલ વાધવાને પણ પૂછપરછ માટે બોલાવ્યા હતા. કમાલ વાધવાએ પોલીસને તપાસમાં સહકાર આપવા સોનુને દુબઈથી મુંબઈ બોલાવ્યો છે. મુંબઈની પોલીસે સોનુની પણ પૂછપરછ કરી છે. તેમાંથી મુંબઈની પોલીસને આ હત્યાકાંડની ખૂટતી કડીઓ મળી આવવાની સંભાવના છે.
આપણા નીતિશાસ્ત્રોમાં લખ્યું છે કે ''જર, જમીન અને જોરુ; એ ત્રણેય કજિયાના છોરું.'' લૈલા ખાનના કિસ્સામાં આ ત્રણેય પરિબળો ભેગાં થયાં હોવાનું જણાઈ રહ્યું છે. લૈલાની માતા સેલિનાએ એક નહીં પણ ત્રણ-ત્રણ પુરૃષોનાં પડખાં સેવ્યાં હતાં. ત્રીજા પતિ સાથે લગ્ન કરીને તેણે પોતાના બીજા પતિ સાથેના સંબંધો પણ ચાલુ રાખ્યા હતા. આ રમત તેના માટે મોતની રમત બની ગઈ હતી. સેલિના ખાન પાસે કમાણીનું કોઈ સ્વતંત્ર સાધન નહોતું. તેણે પોતાની પુત્રી લૈલા ખાનના સૌંદર્યને સાધન બનાવીને બોલિવૂડના નિર્માતાઓ પાસેથી પૈસા પડાવ્યા હતા. પોતાની બે દીકરીઓને ગ્લેમરની દુનિયામાં પ્રવેશ કરાવીને તેણે સંપત્તિ એકઠી કરી હતી. આ સંપત્તિ પણ તેની હત્યાનું કારણ બની ગઈ હતી. મુંબઈની પોલીસે જબરદસ્ત બાહોશીનું પ્રદર્શન કરીને આ કેસને ઉકેલી નાંખ્યો છે એ માટે તે પણ અભિનંદનની અધિકારી છે.
- સુપાર્શ્વ મહેતા

Share |
 

Gujarat Samachar Plus

ખૂબી અને ખામી બનાવે પેશન ઓફ લાઈફ
ગુજરાતના દરેક ગ્રેજ્યુએટ ઈ-કન્ટેન્ટ સાથે જોડાશે
ડિઝાઈનર યુગમાં માટલું પણ કેમ બાકી રહે?
શિક્ષણ સસ્તુ બનાવવા માટે પુસ્તકની આપ-લે
ઓછુ ખાઓ અને હેલ્ધી રહો
સ્કીન ટાઇટ જીન્સ બ્લડ સર્ક્યુલેશન માટે બાઘા રૂપ
 

Gujarat Samachar glamour

પ્રિયંકા સ્પેનના ઈલિજામાં રજાઓ ગાળશે
ભારતીય સુંદરી ડિયાના ઉપ્પલ ઉપર‘બિગ-બ્રધર’ શોમાં જાતિય ટિપ્પણી!
ગીતા બસરા ભજ્જી સાથે લગ્ન નહીં કરે
જોયા સ્તન કેન્સર પ્રત્યે જાગૃતા ફેલાવશે
શાહરૂખે ૫૦ હજાર રૂપિયાનો દંડ ભર્યો!
બીગ બી ‘બિગ અડ્ડા’ને છોડી ‘ટમ્બલર’ના શરણે
 
 
   
   

Gujarat Samachar POLL

 

અમદાવાદ:135મી રથયાત્રા

webad3 lagnavisha
   

Follow Us

Facebook Twitter
   
 
   

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
       
 
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
 
plus
 

આજનું કાર્ટુન

arc archive

પૂર્તિઓ

 
 
Gujarat Samachar © 2012 All Rights Reserved