ઇન્ટેલિજન્સ નિષ્ણાતો પણ NCTCનો વિરોધ કરી રહ્યા છે

- 'રૉ'એ NCTCના વિચારનો વિરોધ કરેલો
- યુપીએના સાથી પક્ષો અને વિપક્ષોનો પણ વિરોધ

નવી દિલ્હી, તા. ૫
સૂચિત એનસીટીસીનો વિરોધ કરવામાં માત્ર મમતા બેનરજી કે ઓડીસાના મુખ્યપ્રધાન નવીન પટનાયક કે અન્ય બિન-કોંગ્રેસી મુખ્ય પ્રધાનો જ નથી, પરંતુ ભારતની આંતરરાષ્ટ્રીય જાસૂસી સંસ્થા 'રીસર્ચ એન્ડ એનેલિસિસ વિંગ' (રૉ) તો આવી કોઈ સસ્થા સ્થાપવા સામે, છેક ૨૦૧૦માં ગૃહપ્રધાન પી. ચિદમ્બરમ્ સમક્ષ વિરોધ નોંધાવ્યો હતો.
વાસ્તવમાં તા. ૨૩ ડિસેમ્બર ૨૦૧૦ના દિને નવી દિલ્હી સ્થિત વિજ્ઞાન ભવનમાં ૨૨મા ઇન્ટેલિજન્સ બ્યુરો સેન્ટીનરી એન્ડાઉમેન્ટ પ્રવચન સમયે ગૃહપ્રધાને આવી સંસ્થા સ્થાપવા અંગેનો વિચાર વહેતો મુક્યો હતો. તે સમયે 'રૉ'ના સચિવ કે.સી.વર્માના મનમાં આ સદીના પ્રારંભે બનેલી ઘટના ઘૂમરાઈ રહી હતી.
તે સમયે તેઓ આઈબી ની ઓપરેશન વિંગમાં હતા. ત્યારે મુંબઈ સ્થિત બે ત્રાસવાદીઓને ખતમ કરવાની કાર્યવાહી હાથ ધરવાની હતી. આ કાર્યવાહી સફળ તો થઈ જ, પરંતુ તે પૂર્વે તેમાં ભારે મોટા અવરોધો પણ આવ્યા હતા. આઈબી તે સમયે મુંબઈ પોલીસની સાથે કાર્યરત હતી પરંતુ આ ત્રાસવાદીઓ જ્યાં છુપાયા હતા તે, મુંબઈ પાસેનાં મુંબ્રાની પોલીસને વિશ્વાસમાં લીધી ન હતી. આ કાર્યવાહી પૂરી થયા પછી મુંબ્રા પોલીસ તે અંગે યશ અને ઇનામમાં પણ સહભાગી હોવાનો દાવો કર્યો હતો. આથી એક તરફ આઈબી અને મુંબઈ પોલીસ અને બીજી તરફ પોલીસ વચ્ચે વિવાદ શરૃ થઈ ગયો હતો જેણે ઘણું ખરાબ સ્વરૃપ લઈ લીધું હતું.
આ ઘટનાનો ઉલ્લેખ કરતાં વર્માએ જણાવ્યું હતું કે સૂચિત એનસીટીસી તેની કાર્યવાહી શાખા અને અન્ય રાષ્ટ્રીય સંસ્થાોનાં ત્રાસવાદ વિરોધી કાર્યવાહીઓ પણ આવો વિવાદ (સ્થાનિક પોલીસ સાથે) સર્જી શકે તેમ છે. જેમાંથી કાનૂની મુદ્દાઓ પણ ઉભા થવા સંભવ છે. તેટલું જ નહીં પરંતુ આવા વિવાદો ઘણી મોટી મુશ્કેલી પણ સર્જી શકે તેમ છે. કારણ કે, જાસૂસી સંસ્થાઓને સક્રીય રીતે 'એક્ઝિક્યુટીવ-એક્શન્સ' (વહીવટી-પગલાં) લેવની કોઈ સત્તા જ કાનૂન પ્રમાણે નથી.