Last Update : 04-May-2012, Friday

 

દુનિયામાં અનાજની તંગી માટે અમેરિકનો જવાબદાર છે

ભારતનો એક નાગરિક વર્ષે સરેરાશ ૧૭૮ કિલોગ્રામ અનાજ ખાય છે, જેની સામે અમેરિકાનો નાગરિક વર્ષે ૧,૨૩૦ કિલોગ્રામ અનાજ વાપરે છે

અમેરિકાના રાષ્ટ્રપતિએ એવો આક્ષેપ કર્યો છે કે દુનિયામાં અનાજની વ્યાપી રહેલી તંગી માટે ભારતની અને ચીનની વધી રહેલી ભૂખ જવાબદાર છે. અમેરિકાના રાષ્ટ્રપતિનું લોજીક એવું છે કે ભારતમાં અને ચીનમાં સમૃદ્ધિ વધી રહી હોવાથી લોકોની ખરીદશક્તિ વધી છે, જેને કારણે તેઓ વધુ અનાજ ખાતા થયા હોવાથી દુનિયામાં અનાજની અછત પેદા થઇ છે. અમેરિકાના રાષ્ટ્રપતિ એ વાત ભૂલી ગયા છે કે જ્યારે તમે એક આંગળી કોઇના તરફ ચીંધો ત્યારે બાકીની ત્રણ આંગળી તમારી તરફ ચીંધાતી હોય છે. અમેરિકાના અને ભારતના સરેરાશ નાગરિક દ્વારા વર્ષે કેટલું અનાજ ખાવામાં આવે છે, તેના આંકડા તપાસીશું ત્યારે ખરી હકીકત જાણવા મળશે.
વર્લ્ડ વોચ ઇન્સ્ટિટયૂટના આંકડાઓ એમ કહે છે કે ભારતના નાગરિકો ગરીબી અને બેકારીને કારણે દર વર્ષે સરેરાશ ૧૭૮ કિલોગ્રામ અનાજ જ ખરીદીને પોતાના પેટમાં પધરાવી શકે છે. તેની સરખામણીએ અમેરિકાના નાગરિકો સમૃદ્ધ હોવાથી એક નાગરિક વર્ષે સરેરાશ ૧,૨૩૦ કિલોગ્રામ જેટલા અનાજનો ઉપભોગ કરે છે. ભારતની વસતિ ૧.૧૨ અબજની છે, પણ આટલી વસતિ વચ્ચે આપણા દેશમાં કુલ ૧૮.૭ કરોડ ટન અનાજ પાકે છે. ચીનની વસતિ ૧.૩૨ અબજની છે, જેની માટે ૩૮.૧ કરોડ ટન પકાવવામાં આવે છે. આ રીતે ચીનના પ્રત્યેક નાગરિકને વર્ષે સરેરાશ ૩૨૫ કિલોગ્રામ અનાજ ખાવા મળે છે. ચીનના નાગરિકો ભારતના નાગરિકોની સરખામણી બમણું અનાજ હજામ કરી જાય છે. તેની સરખામણીએ અમેરિકાની વસતિ ૩૦ કરોડની છે, પણ તેનો અનાજનો વપરાશ ૨૭.૧ કરોડ ટન જેટલો છે. અમેરિકાના નાગરિકો વર્ષે સરેરાશ ૧,૨૩૦ કિલોગ્રામ અનાજ વેડફી કાઢે છે. અમેરિકાની પ્રજા ચીનની પ્રજા કરતાં ત્રણ ગણું અને ભારતની પ્રજા કરતાં બમણું અનાજ વેડફી કાઢે છે. અમેરિકાના નાગરિકો પોતે અનાજ ખાય છે અને પોતાનાં પાળેલાં પ્રાણીઓને પણ અનાજ ખવડાવે છે. આ પ્રાણીઓ મોટાં થાય ત્યારે અમેરિકનો તેમને પણ મારીને ખાઈ જાય છે. અમેરિકાનો પ્રત્યેક નાગરિક વર્ષે ૧૦૦ કિલોગ્રામ જેટલું માંસ અને ચિકન પણ આરોગી જાય છે.
કોઇ પણ પ્રાણીના શરીરમાં એક રતલ માંસ પેદા કરવા તેને ૧૪ રતલ અનાજ ખવડાવવું પડે છે. માંસાહારને કારણે જગતમાં અનાજની તંગી પેદા થાય છે. અમેરિકનો પોતે અનાજ ખાય છે, અનાજ ખવડાવીને પ્રાણીઓનો ઉછેર કરે છે અને તેમનું માંસ ખાય છે અને આટલું ઓછું હોય તેમ તેઓ અનાજમાંથી ઇથનોલ બનાવે છે અને તેનો ઉપયોગ પોતાની મોટર કાર ચલાવવા માટે કરે છે. અમેરિકામાં જેટલી મકાઈ થાય છે, તેના ૨૦ ટકાનો ઉપયોગ બાયોફયુઅલ બનાવવા માટે કરવામાં આવે છે.
ભારતના નાગરિકો દિવસમાં માત્ર બે વાર જ ભોજન કરે છે. તેમાં પણ કેટલાક નાગરિકોને તો એક ટંકનું ભોજન પણ માંડ મળે છે. તેની સામે અમેરિકનો આખો દિવસ અકરાંતિયાની જેમ ખાધા કરે છે. ભારતના નાગરિકો રોજનું ૪૫૫ ગ્રામ અનાજ ખાય છે, તેની સરખામણીએ અમેરિકાના નાગરિકો રોજનું સાડા ત્રણ કિલોગ્રામ અનાજ હજમ કરી જાય છે. ભારતના નાગરિકો પોતાના ખાનપાનમાંથી પ્રતિદિન ૨,૨૫૦ કેલોરી જેટલી ઉર્જા મેળવે છે, જેની સામે અમેરિકનો રોજની ૩,૫૦૦ કેલોરી જેટલો ખોરાક હજમ કરી જાય છે. આખો દિવસ અકરાંતિયાની જેમ ખાવાની અમેરિકનોની આદતને કારણે ૫૦ ટકા અમેરિકનો મેદસ્વીપણાથી પરેશાન છે. અમેરિકનો જો પોતાની ખાવાની આદત નહીં બદલે તો ઈ.સ. ૨૦૧૫ સુધીમાં ૭૪ ટકા અમેરિકનો જાડીયા થઇ ગયા હશે.
જગતમાં અનાજની જે અભૂતપૂર્વ તંગી પેદા થઇ છે, તેના માટે માંસાહારીઓની લાઇફસ્ટાઇલ પણ જવાબદાર છે. ઇ.સ. ૨૦૦૭ દરમિયાન દુનિયામાં ૨૩૧૬ અબજ ટન જેટલું અનાજ પેદા થયું હતું. તેમાંના ૪૮ ટકા અનાજ જ માનવ વપરાશ માટે લેવામાં આવ્યું હતું. બાકીના પૈકી ૩૫ ટકા અનાજ માંસ પેદા કરવા માટે પ્રાણીઓને ખવડાવવામાં આવ્યું હતું. જે બાકી રહ્યું તેમાંના મોટા ભાગના અનાજનો ઉપયોગ ઇથેનોલ જેવું બળતણ પેદા કરવા માટે કરવામાં આવ્યો હતો. હવે અમેરિકા અને બ્રાઝિલની જેમ ભારત પણ બાયોફયુઅલને રવાડે ચડી રહ્યું છે, જેને કારણે ભારતમાં પણ અનાજની તંગી વધુ વિકટ બનવાની સંભાવના છે.
અમેરિકાની પ્રજા માત્ર અનાજ અને માંસની બાબતમાં જ નહીં પણ તમામ ભૌતિક સુખસગવડોની બાબતમાં અકરાંતિયાની જેમ ઉપભોગ કરવાની આદત ધરાવે છે. પેટ્રોલ અને ડિઝલની વાત કરીએ તો દુનિયામાં ક્રૂડ તેલનું જેટલું ઉત્પાદન થાય છે, તેના ૪૪ ટકા અમેરિકાની પ્રજા વાપરી કાઢે છે. અમેરિકાની વસતિ દુનિયાની કુલ વસિતના પાંચ ટકા જેટલી જ છે, તો પણ તે ૪૪ ટકા જેટલું ખનિજ તેલ વાપરે છે. આટલું ખનિજ તેલ ઓછું પડતું હોય તેમ અમેરિકાએ હવે મકાઇમાંથી ઇથેનોલ બનાવવાનું શરૃ કર્યું છે, જેને કારણે દુનિયામાં અનાજની અભૂતપૂર્વ તંગી પેદા થઇ છે. તેની સરખામણીએ ભારતની વસતિ દુનિયાની વસતિના ૨૦ ટકા જેટલી છે તો પણ આપણી પ્રજા વિશ્વના કુલ ઉત્પાદનના ચાર ટકા ખનિજ તેલનો જ વપરાશ કરે છે.
દુનિયામાં આજે ગ્રીન હાઉસ ગેસોનું ઉત્પાદન વધી રહ્યું હોવાથી જાગતિક તાપમાન વધી રહ્યું છે અને મહાસાગરોની સપાટી ઊંચી આવી રહી છે. આ ગ્રીન હાઉસ ગેસોનું પણ સૌથી મોટું ઉત્પાદક અમેરિકા છે.
અમેરિકા પ્રતિદિન કાર્બન ડાયોક્સાઈડ જેવા ૧,૫૫૯ ટન ગ્રીન હાઉસ ગેસોનું ઉત્પાદન કરે છે, જેની સરખામણીએ ભારત પ્રતિદિન ૨૫૦ ટન ગ્રીન હાઉસ ગેસોનું જ ઉત્પાદન કરે છે. અમેરિકાના નાગરિકો વર્ષે સરેરાશ ૨,૩૦૦ લાખ ટન કચરાનું ઉત્પાદન કરે છે, જેની સરખામણીએ ભારતમાં ૧૮૦ લાખ ટન કચરાનું જ ઉત્પાદન થાય છે. અમેરિકાના નાગરિકો કુદરતી સંસાધનોનો સૌથી વધુ ખાતમો બોલાવી રહ્યાં છે.
અમેરિકાની પ્રજા પોતાની દૈનિક જરૃરિયાતો માટે દુનિયાના ગરીબ અને વિકસતા દેશો ઉપર આધારીત બની ગઇ છે. અમેરિકાની પ્રજા પેટ ભરીને માંસાહાર કરી શકે તે માટે બ્રાઝિલમાં જંગલો કાપવામાં આવે છે અને સાફ કરેલી જમીન ઉપર કરોડો પ્રાણીઓનો ઉછેર કરવામાં આવે છે.
એક શાકાહારી વ્યક્તિની ભૂખ ભાંગવા માટે જેટલી જમીનની જરૃર પડે છે તેની સરખામણીએ માંસાહારી માણસનો ખોરાક તૈયાર કરવા માટે પાંચ ગણી વધુ જમીનની જરૃર પડે છે. અમેરિકાની પ્રજા જે વસ્ત્રો પહેરે છે તે ચીનમાં કે ભારતમાં બન્યાં હોય છે. અમેરિકાની પ્રજા જે ઇલેકટ્રોનિક ઉપકરણો વાપરે છે તે કોરિયામાં કે જપાનમાં બન્યાં હોય છે. આ બધી ચીજોની સતત આયાત કરવાને કારણે અમેરિકાની વેપારી ખાદ્ય વધી રહી છે અને અમેરિકા આ દેશોનું દેવાદાર બની રહ્યું છે. દુનિયામાં જે ગરીબી, બેકારી અને ભૂખમરો ફેલાઇ રહ્યા છે, તેમાં માટે અમેરિકા લોકોની ઉપભોગવાદી લાઇફસ્ટાઇલ જવાબદાર છે.
વિશ્વમાં અનાજની અભૂતપૂર્વ અછતનો તબક્કો શરૃ થયો છે. તાજેતરમાં વિશ્વ બેન્ક અને ઇન્ટરનેશનલ મોનિટરી ફંડ બેઠકમાં જાહેર કરવામાં આવ્યું હતું કે અનાજની અછતને કારણે દુનિયાના ૩૩ દેશોમાં રાજકીય અસ્થિરતા પેદા થઈ છે. ઇન્ડોનેશિયા, પાકિસ્તાન અને ઇજિપ્ત જેવા દેશોમાં તો એક જગ્યાએથી બીજી જગ્યાએ અનાજની હેરફેર કરવી હોય તો લશ્કરનાં સંરક્ષણ હેઠળ કરવી પડે છે, અન્યથા ભૂખ્યા લોકો આ અનાજ લૂંટી લે તેવો ભય પેદા થયો છે. ઉત્તર આફ્રિકાના મોઝામ્બિક, સેનેગલ, આઇવરી કોસ્ટ અને કેમરૃન જેવા દેશોમાં તો રોટી રમખાણો શરૃ થઈ ગયાં છે, જેમાં ૧૦૦ લોકોના જીવ ગયા છે. આ રમખાણો વધુ વ્યાપક બની રહ્યાં છે.
અમેરિકા અને બ્રાઝિલમાં અનાજમાંથી બળતણ બનાવવાની પદ્ધતિ વ્યાપક બની ગઈ છે. ઇ.સ. ૧૯૯૫માં અમેરિકાએ મકાઇમાંથી ૫.૩ અબજ લિટર ઇથેનોલનું ઉત્પાદન કર્યું હતું. આ ઉત્પાદન ઇ.સ. ૨૦૦૭માં વધીને ૨૪.૮ અબજ લિટર ઉપર પહોંચી ગયું હતું. આ વર્ષે અમેરિકામાં ૮૧ કરોડ ટન મકાઇનો ઉપયોગ બળતણ બનાવવા માટે કરવામાં આવશે, જે આગલાં વર્ષની સરખામણીએ ૩૭ ટકા વધુ છે. સંયુક્ત રાષ્ટ્ર સંઘના આંકડાઓ મુજબ અમેરિકાના નાગરિકો એક દિવસમાં એક ટાંકી, એટલે કે ૫૦ લિટર ઇથેનોલ વાપરી કાઢે છે. આટલું ઇથેનોલ પેદા કરવા માટે ૨૩૨ કિલોગ્રામ મકાઇની જરૃર પડે છે. આ મકાઇમાં એક બાળક આખું વર્ષ નભી શકે છે. ભારતની પ્રજા દર વર્ષે ૧૮૭ કિલોગ્રામ જ અનાજ વાપરે છે. આટલું અનાજ અમેરિકાના નાગરિકો મોટર ચલાવવામાં વેડફી નાંખે છે.
દુનિયાની તમામ વસતિને પેટ ભરીને ખાવાનું મળી રહે તેટલું અનાજ દુનિયામાં પાકે છે. તે પૈકી માતેલા સાંઢ જેવા અમેરિકનો અનાજનો મોટો હિસ્સો પચાવી પાડે છે, જેને કારણે એશિયાના અને આફ્રિકાના કરોડો લોકો ભૂખ્યા રહી જાય છે. હવે એશિયામાં ચીન અને ભારત જેવા દેશોમાં સમૃદ્ધિ વધી રહી છે, જેને કારણે અગાઉ જે લોકો એક ટંક ખોરાક ખાતા હતા તેઓ હવે બે ટંકના રોટલા સુધી પહોંચ્યા છે, જેને કારણે ભારત અને ચીનમાં અનાજનો વપરાશ વધી રહ્યો છે. આ સમાચાર સાંભળીને અમેરિકાના પ્રમુખના પેટમાં ચૂંક આવે છે. તેઓ જો દુનિયાને અનાજની કટોકટીમાંથી ઉગારવા માંગતા હોય તો તેમણે અમેરિકાના નાગરિકોને જ સંયમથી જીવવાની શિખામણ આપવી જોઈએ. ત્યારે અમેરિકાનું અર્થતંત્ર જે રીતે ભાંગી રહ્યું છે તે જોતા લાગ્યા વિના નથી રહેતું કે દુનિયાના અનેક દેશો અમેરિકાને ઉધાર માલ આપવાનું બંધ કરી દેશે અને અમેરિકનોને સંયમ પાળવાની ફરજ પડશે.
- સુપાર્શ્વ મહેતા

Share |
 

Gujarat Samachar Plus

મતભેદ તો ઘણાં થયા પણ મનભેદ ક્યારેય નહીં
શહેરની ગર્લ્સ પણ બોલે છે ગંદી ગાળો યુ બ્લડી એ...હો...
જીટીયુનો પેટન્ટ એપ્લીકેશન પ્રોગ્રામ
એકસ સ્ટુડન્ટસનો કોલેજના જુનિયર્સને હેલ્પ કરવાંનો ફંડા
ચાઇલ્ડ એક્ટિવીટીમાં માર્શલઆર્ટની બોલબાલા
 

Gujarat Samachar glamour

ડર્ટી પિક્ચરને આપેલો નેશનલ એવોર્ડ પાછો ખેંચાશે?
જોયાની ડોક્યુમેન્ટરીમાં કેટરીના
મેગન ફોક્સ હાસ્ય-ભૂમિકા કરીને ખુશ
કરીના ઓછી ફિલ્મો સાઈન કરવા માંડી!
પ્રતિક બબ્બરે નાનીની ગંગામાં ન્હાવાની ઈચ્છા પૂરી કરી
 

84th Oscar Awards

   
 
amul
   
   

Gujarat Samachar POLL

BAPS વિશ્વશાંતિ મહાયજ્ઞ

webad3 lagnavisha
   

Follow Us

Facebook Twitter
   
 
   

ARCHIVES
સમાચાર સંગ્રહ જોવા અહી ક્લિક કરો

aaj

આજનું પંચાગ

આજનું ભવિષ્ય
સુપ્રભાતમ્

આજનું ઔષધ

આજની જોક આજની રેસીપી
       
 
 

વૈવિધ્ય

• તંત્રી લેખ • પ્રસંગપટ
• દિલ્હીની વાત • આસપાસ
• ન્યુઝ વ્યુઝ •વાતવાતમાં
• નેટવર્ક • અવસાન નોંધ
 
plus
 

આજનું કાર્ટુન

arc archive

પૂર્તિઓ

 
 
Gujarat Samachar © 2012 All Rights Reserved