સ્પિનરોના પ્રદર્શનથી સંતુષ્ટ છું

મોટેરાની નિર્જીવ પીચની ઉગ્ર ટીકા ભૂતપૂર્વ ભારતીય કેપ્ટન ગાવસ્કરે પણ કરી હતી. ધોનીએ કહ્યુ કે, આ પીચમાંથી જરા પર ઉછાળ મળતો નહતો. મને લાગતુ હતુ કે ત્રીજા દિવસ બાદ પીચ તુટશે. જો કે મારી ધારણા પણ ખોટી પડી. પીચમાંથી ફાસ્ટ બોલરો કે સ્પિનરોને પણ કોઇ પ્રકારની મદદ મળતી નહતી. બોલરો માટે આ પીચ નિરાશ કરનારી હતી.

ભારતને આખરી દિવસે ૧૪૪ રનના દેવા સાથે રમવાનુ હતુ અને તેની આઠ જ વિકેટ સલામત હતી ત્યારે પરાજયનો ભય લાગ્યો હતો તેવા પ્રશ્નના જવાબમાં ધોનીએ કહ્યુ કે, શરુઆતની ઓવરોનો જ સવાલ હતો. જો કે અમને હારનો ભય લાગ્યો નહતો. અમારે એકાદ સારી ભાગીદારીની જરુર હતી. સવારના સેશનમાં અમે વિકેટો બચાવી રાખીશું તો પછી તેઓને ૧૦ વિકેટો ઝડપવામાં મુશ્કેલી પડશે તેમ લાગતુ હતુ. અમારા બેટ્સમેનોએ લડાયક દેખાવ કરતાં મેચ ડ્રોમાં પરિણાંમી. શ્રીલંકા સામેની પ્રથમ ટેસ્ટમાં હરભજન અને મિશ્રાનો દેખાવ સરેરાશ રહ્યો હોવા છતાં કેપ્ટન તેમનાથી સંતુષ્ઠ છે. ધોનીએ કહ્યુ કે, મુરલીધરન ક્રિકેટ ઇતિહાસનો મહાન સ્પિનર છે છતાં તેને આ પીચ પરથી ઉછાળ કે ટર્ન મળતો નહતો. જો તેના જેવા બોલરને મુશ્કેલી પડતી હોય તો તેવી જ હાલત અમારા બોલરોની હતી.