ચીફ જસ્ટિસ સહિત તમામે વિગતો રજૂ કરી ઃ બે દિવસમાં સર્વોચ્ચ અદાલતની સત્તાવાર વેબ સાઇટ પર મૂકાશ

સુપ્રીમ કોર્ટના ચીફ જસ્ટિસ કે.જી.બાલાકૃષ્ણન તથા અન્ય જજોએ પોતાની સંપત્તિની વિગતો સોંપ્યા પછી ગયા સપ્તાહે આ વિગતો જાહેર કરવાનો નિર્ણય લેવાયો હતો. સુત્રોના જણાવ્યા પ્રમાણે સત્તાવાર વેબસાઇટ પર એક કે બે દિવસમાં આ વિગતો મૂકવામાં આવે એવી શક્યતા છે. ગત દશેરા અને દિવાળીના તહેવારો દરમિયાન તમામ જજોએ પોતાની સંપત્તિની વિગતોને અંતિમ સ્વરૃપ આપી દીધું હતું, કેટલાક જજોએ આ માટે પ્રોફેશનલ ચાર્ટડ એકાઉન્ટન્ટની મદદ પણ લીધી હતી.

ઉલ્લેખનીય છે કે છેલ્લા કેટલાક મહિનાઓથી જજોની સંપત્તિ જાહેર કરવા મુદ્દે વ્યાપક ચર્ચા ચાલી હતી. કાયદાજગત તથા જાહેર જનતાના અનેક પ્રતિનિધિઓનું માનવું હતું કે જાહેરજીવનમાં પારદર્શિતા આણવા માટે જજોએ પણ તેમની સંપત્તિની વિગતો જાહેર કરવી જોઇએ. ગત ૨જી સપ્ટેમ્બરે દિલ્હી હાઇકોર્ટે ઐતિહાસિક ચુકાદો આપીને જજોને સંપત્તિ જાહેર કરવા મજબુર કરી દીધા હતા. દિલ્હી હાઇકોર્ટે તેના ચુકાદામાં કેન્દ્રીય માહિતી પંચના એ નિર્ણયને મંજૂરી આપી હતી જેમાં પંચે સુપ્રીમ કોર્ટના જજોને સંપત્તિની વિગતો રજૂ કરવાનો નિર્દેશ આપ્યો હતો. આરટીઆઇ કાર્યકર્તા સુભાષ અગ્રવાલે માહિતી પંચમાં અપીલ દાખલ કરીને સુપ્રીમ કોર્ટના જજોની સંપત્તિની વિગતો માંગી હતી. દિલ્હી હાઇકોર્ટે આદેશમાં જણાવ્યું હતું કે માહિતી મેળવવાના અધિકાર હેઠળ સંપત્તિની વિગતો જાહેર કરવા માટે સુપ્રીમ કોર્ટના ચીફ જસ્ટિસ સહિત તમામ જજો બાધ્ય છે. ચીફ જસ્ટિસે અગાઉ એવી દલીલ કરી હતી કે તેમની સંપત્તિ જાહેર કરવાને કારણે સ્થાપિત હિતો ધરાવતા તત્વો દ્વારા જજોની હેરાનગતિમાં વધારો થશે. જો કે બાદમાં જાહેરમતનું સન્માન કરીને જજોએ તેમની સંપત્તિની વિગતો જાહેર કરવાનો નિર્ણય કર્યો હતો.